សហគ្រិនជាច្រើនរូបជួបប្រទះនឹងបញ្ហាហត់នឿយនឹងការងារ ឬការគ្រប់គ្រងអាជីវកម្មរបស់ខ្លួន ដែលបង្កហានិភ័យដល់សុខភាពផ្លូវកាយនិងផ្លូវចិត្ត ។ លើសពីនេះទៅទៀត ការហត់នឿយបែបនេះអាចប៉ះពាល់ដល់ទំនាក់ទំនង សមត្ថភាពក្នុងការគិត និងការបំពេញការងារប្រចាំថ្ងៃរបស់អ្នកផងដែរ ។ ការស្រាវជ្រាវបង្ហាញមកថា…
សហគ្រិនជាច្រើនរូបជួបប្រទះនឹងបញ្ហាហត់នឿយនឹងការងារ ឬការគ្រប់គ្រងអាជីវកម្មរបស់ខ្លួន ដែលបង្កហានិភ័យដល់សុខភាពផ្លូវកាយនិងផ្លូវចិត្ត ។ លើសពីនេះទៅទៀត ការហត់នឿយបែបនេះអាចប៉ះពាល់ដល់ទំនាក់ទំនង សមត្ថភាពក្នុងការគិត និងការបំពេញការងារប្រចាំថ្ងៃរបស់អ្នកផងដែរ ។
ការស្រាវជ្រាវបង្ហាញមកថា ការជួបប្រទះនឹងស្ត្រេសច្រើនហួសហេតុប៉ះពាល់ដល់ការចងចាំ សមត្ថភាពក្នុងការសម្រេចចិត្ត ការគ្រប់គ្រងអារម្មណ៍ និងសមត្ថភាពក្នុងការផ្តោតស្មារតីនិងយកចិត្តទុកដាក់ផងដែរ ។ មានច្រើនករណីដែលសហគ្រិនដឹងពីបញ្ហា ឬមូលហេតុដែលបង្កឲ្យមានការស្ត្រេសខាងលើ ប៉ុន្តែពួកគេមិនទទួលស្គាល់វាព្រោះពួកគេនឹងត្រូវធ្វើការផ្លាស់ប្តូរដែលពួកគេគិតថាមិនអាចកើតមានឡើង ។
អ្វីដែលសហគ្រិនគួរធ្វើគឺគិតឡើងវិញពីរាល់ទស្សនៈដែលបង្កការស្ត្រេស និងនាំយកការងារបន្ថែមដល់ពួកគេ ។ មិនថាការគិតថាបុគ្គលិករបស់ខ្លួនមិនមានសមត្ថភាពក្នុងការបំពេញការងារទាំងនោះ ឬអតិថិជនដែលមិនយល់ពីភាពលំបាករបស់អ្នកឡើយ ។ អ្នកត្រូវចងចាំថា សម្រាប់គ្រប់បញ្ហាតែងតែមានដំណោះស្រាយយ៉ាងហោចណាស់ក៏មួយដែរ ។ ជាទូទៅអ្វីដែលបង្កឲ្យមានការស្ត្រេសមិនមែនជាបញ្ហាទេ តែគឺទស្សនៈដែលសហគ្រិនមានលើបញ្ហាទាំងនោះ ។
កត្តាទីពីរដែលសហគ្រិនត្រូវទទួលស្គាល់គឺបញ្ហាក្នុងក្រុមហ៊ុន ឬអាជីវកម្មរបស់អ្នក ។ តើមានផ្នែកណាខ្លះក្នុងក្រុមហ៊ុន ឬអាជីវកម្មរបស់អ្នកដែលត្រូវការការផ្លាស់ប្តូរ? តើមានផ្នែកណាដែលត្រូវការការធ្វើបច្ចុប្បន្នភាព? សហគ្រិនមិនគួរភ័យខ្លាចការផ្លាស់ប្តូរទេ និងត្រូវចងចាំថា អាជីវកម្មដែលជោគជ័យភាគច្រើនជាអាជីវកម្មដែលដើរទាន់ការផ្លាស់ប្តូរផ្សេងៗក្នុងសង្គម និងទីផ្សារ ។
កត្តាចុងក្រោយដែលសហគ្រិនត្រូវត្រួតពិនិត្យឡើងវិញគឺគោលដៅ និងយុទ្ធសាស្ត្រ ។ ពេលខ្លះអ្នកនឿយហត់និងការងារព្រោះតែអ្នកខ្វះភាពច្បាស់លាស់ ឬមានភាពស្មុគស្មាញច្រើន ។ ដូច្នេះប្រសិនបើអ្នកស្ត្រេសព្រោះតែមិនអាចសម្រេចគោលដៅអ្នកបាន អ្នកត្រូវមើលឡើងវិញថាគោលដៅរបស់អ្នកមានបញ្ហាឬទេ? ហើយយុទ្ធសាស្ត្រដែលអ្នកប្រើដើម្បីសម្រេចគោលដៅទាំងនោះតើមានប្រសិទ្ធិភាពទេ?
បន្ទាប់ពីឆ្លើយសំណួរទាំងនោះហើយ អ្នកត្រូវកែសម្រួលគោលដៅ ឬយុទ្ធសាស្ត្រឡើងវិញដើម្បីឲ្យសមរម្យតាមសមត្ថភាពនិងធនធានដែលអ្នកមាន ៕ កែសម្រួលដោយ ៖ សុឃាក់
ចែករំលែកព័តមាននេះ