អតិថិជនតែងតែវាយតម្លៃលើផលិតផល ឬសេវាដែលពួកគេទិញទោះជាពេលខ្លះពួកគេធ្វើដូច្នេះដោយមិនដឹងខ្លួនពិតមែនក្តី ។ ពេលដែលកាហ្វេដែលអ្នកឆុងមិនឈ្ងុយឆ្ងាញ់ដូចមុន ឬពេលដែលផលិតផលរបស់អ្នកឆាប់ខូចជាងមុន អតិថិជនតែងតែដឹង ។ ហើយពេលខ្លះព្រោះតែជួបប្រទះភាពខ្វះខាតគុណភាពម្តង វាអាចផ្លាស់ប្តូរទស្សនៈពួកគេលើប្រេនរបស់អ្នកទាំងស្រុង និងធ្វើឲ្យអ្នកបាត់បង់អតិថិជនផងដែរ ។
ប៉ុន្តែគ្រាន់តែដឹងថាគុណភាពផលិតផល ឬសេវាអាចប៉ះពាល់ដល់ប្រេន ការលក់ និងភាពស្មោះត្រង់របស់អតិថិជននៅមិនគ្រប់គ្រាន់ទេ ។ អាជីវកម្ម និងក្រុមហ៊ុនត្រូវតែផ្តល់អាទិភាពខ្ពស់ដល់គុណភាពទៅវិញ ។ ខាងក្រោមនេះ គឺជាគន្លឹះងាយៗដែលអ្នកអាចអនុវត្ត ដើម្បីបង្កើនគុណភាព និងរក្សាជំនឿទុកចិត្តរបស់អតិថិជនលើប្រេនរបស់អ្នក ៖
១. ការលើកកម្ពស់ និងគ្រប់គ្រងគុណភាព ៖ ទាំងក្រុមហ៊ុនតួច និងធំសុទ្ធតែត្រូវផ្តោតសំខាន់លើគុណភាពទាំងអស់ ហើយពួកគេអាចរួមបញ្ចូលគុណភាពជាផ្នែកមួយនៃប្រេនរបស់ពួកគេផងដែរ ។ ប្រាកដណាស់ការធ្វើដូច្នេះមានន័យថា អាជីវករត្រូវតែធានាថា ផលិតផល និងសេវាពិតជាឆ្លុះបញ្ចាំងគុណភាពដូចដែលបានផ្សព្វផ្សាយពិតមែន ។ ដើម្បីធ្វើដូច្នេះអាជីវករអាចអនុវត្តវិធីសាស្ត្រជាច្រើន ។
វិធីទីមួយ គឺការគ្រប់គ្រង និងតាមដានគុណភាពគ្រប់ដំណាក់កាល ។ អាជីវករគួរតែមានមនុស្សដើរតួជាអ្នកត្រួតពិនិត្យគុណភាពក្នុងគ្រប់ដំណាក់កាលរហូតដល់ដៃអតិថិជន ។ វិធីទីពីរ គឺការបង្កើតវប្បធម៌ដែលឲ្យតម្លៃលើគុណភាព ។ វាមានន័យថា បុគ្គលិកគ្រប់កម្រិតត្រូវតែចេះឲ្យតម្លៃលើគុណភាពផលិតផល និងសេវាកម្មដែលផ្គត់ផ្គង់ចេញទៅ ។ វិធីចុងក្រោយ គឺការស្តាប់តាមមតិយោបល់របស់អតិថិជន ។ ការតាមដានមតិយោបល់លើប្រព័ន្ធសង្គម ឬការស្ទង់មតិផ្សេងៗរួចធ្វើការកែសម្រួល គឺជាកត្តាសំខាន់ដែលបង្កើនជំនឿទុកចិត្តអតិថិជន ។
២. ការឆ្លើយតបនឹងបញ្ហា ៖ ទោះជាមានការលើកកម្ពស់ និងគ្រប់គ្រងគុណភាពល្អឥតខ្ចោះយ៉ាងណាក៏តែងមានករណីមួយ ឬពីរដែលអ្នកផ្គត់ផ្គង់ផលិតផល ឬសេវាដែលមិនមានគុណភាពល្អដែរ ។ ក្នុងករណីដូច្នេះ អាជីវកម្មត្រូវតែមានរៀបចំយុទ្ធសាស្ត្រក្នុងការឆ្លើយតបបានត្រឹមត្រូវស្រេច ។
ដំណាក់កាលទីមួយ គឺការទំនាក់ទំនងជាមួយនឹងអតិថិជន ។ អាជីវកម្មគួរតែឆ្លើយតបបានយ៉ាងឆាប់រហ័ស និងមានភាពស្មោះត្រង់ប្រសិនបើមានបញ្ហា ។ ក្រៅពីនេះហើយអាជីវកម្មត្រូវស្វែងរកដំណោះស្រាយឲ្យបានឆាប់រហ័ស និងធានាថា បញ្ហានេះនឹងមិនកើតឡើងនៅថ្ងៃមុខឡើយ ៕ កែសម្រួលដោយ ៖ សុឃាក់
ចែករំលែកព័តមាននេះ