ខេត្តកំពង់ធំ ៖ លោកវរសេនីយ៍ឯក ខេន ឈុនគ័រ អធិការនគរបាលស្រុកកំពង់ស្វាយប្រាប់ថា ប្រតិបត្តិការចុះបង្ក្រាបល្បែងស៊ីសងអាប៉ោងបានធ្វើឡើងកាលពីវេលាម៉ោង៣និង៥០ នាទីរសៀលថ្ងៃទី២២ ខែកញ្ញា ឆ្នាំ២០១៩ ដោយឃាត់ខ្លួនអ្នកលេងល្បែងបានចំនួន៦នាក់នៅចំណុចផ្ទះរបស់ឈ្មោះ ឈិត ស៊ន ភេទប្រុស អាយុ៦២ឆ្នាំ នៅក្នុងភូមិសំបូរ ឃុំព្រៃគុយ ស្រុកកំពង់ស្វាយ ខេត្តកំពង់ធំ ។
អ្នកលេងល្បែងចំនួន៦នាក់ខាងលើរួមមាន ១-ឈ្មោះ តុន ឃ្លី ភេទប្រុស អាយុ៥៣ឆ្នាំ ២-ឈ្មោះ គ្រី យ៉ា ភេទប្រុស អាយុ៤២ឆ្នាំ អ្នកទាំងពីរនាក់នៅភូមិឥន្ទកុមារ ឃុំកំពង់ស្វាយ ស្រុកកំពង់ស្វាយ ។
៣-ឈ្មោះ សែត ផាន ភេទប្រុស អាយុ៦៤ឆ្នាំ នៅភូមិតាព្រាច ឃុំទីពោរ ស្រុកសន្ទុក ៤-ឈ្មោះ សៀង ប៉ា ភេទប្រុស អាយុ៥៩ឆ្នាំ នៅភូមិបញ្ញាជី ឃុំត្បូងក្រពើ ស្រុកសន្ទុក ៥-ឈ្មោះ ង៉ែត គ្រី ភេទប្រុស អាយុ៦៥ឆ្នាំ នៅភូមិព្រៃគុយ ឃុំព្រៃគុយ ស្រុកកំពង់ស្វាយ និង៦-ឈ្មោះ ឈិត ស៊ាង ភេទប្រុស អាយុ២៦ឆ្នាំ នៅភូមិសំបួរ ឃុំព្រៃគុយ ស្រុកកំពង់ស្វាយ ។
ចំណែកវត្ថុតាងដែលសមត្ថកិច្ចដកហូតបានរួមមាន កំរាលហាន់តោចំនួន១, ចានបាញ់អាប៉ោងចំនួន១, ផ្តិលជ័រខៀវគ្របអាប៉ោងចំនួន១, កូនក្រម៉ាពោះគោក្រហមចំនួន១, ម៉ូតូចំនួន៤គ្រឿង ចំណែកមេអាប៉ោង និងលុយត្រូវបានម្ចាស់យកលាក់ទុកបាត់អស់ ។
លោកអធិការនគរបាលស្រុកកំពង់ស្វាយបានបន្តថា ជនជាមុខសញ្ញាលេងល្បែងអាប៉ោងទាំង៦នាក់ រួមនឹងវត្ថុតាងត្រូវបានកម្លាំងជំនាញអធិការដ្ឋាននគរបាលស្រុកកំពង់ស្វាយ កសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តកំពង់ធំ ដើម្បីចាត់ការបន្តរតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ