រាជធានីភ្នំពេញ ៖ តារាចម្រៀង និងជាតារាសម្ដែង កញ្ញា វណ្ណា វត្តី បានទទួលស្គាល់ថា ខ្លួនពិតជាស្ងប់ស្ងាត់ពីសិល្បៈនាពេលចុងក្រោយនេះ បន្ទាប់ពីជក់សូរនឹងថៅកែ។ យ៉ាងណាមិញ នាងថា មិនបោះបង់សិល្បៈនោះទេ បើទោះជាក្នុងពេលនេះថៅកែៗទាញពេលវេលារបស់នាងច្រើនជាងក៏ដោយ។
បើតាមប្រភពជិតស្និទ្ធិបានទម្លាយថា វណ្ណា វត្តី កំពុងរយាលឆ្ងាយពីសិល្បៈនៅក្នុងពេលនេះ ដោយសារតែនាងវក់ជាមួយនឹងថៅកែៗ ដោយចំណាយពេលច្រើនតែនៅតាមខេត្ត អមដោយវត្តមានថៅកែៗ និងបុរសសេដ្ឋី។
ប្រភពដដែលបន្តទម្លាយថា នាងមិនត្រឹមតែមិនខ្វល់នឹងការងារសប្បុរសធម៌ ឬការងារសង្គមនោះទេ សូម្បីតែការងារសិល្បៈនានាក៏នាងស្ទើរតែលែងចង់រវល់ផងដែរ ចាប់តាំងពីនាងបានស្គាល់ថៅកែធំៗ ហើយជាប់សូរទៅណាមកណាតែជាមួយបុរសៗទ្រព្យស្ដុកទាំងនោះ។ នាងចំណាយពេលស្ទើរតែ៣០ថ្ងៃក្នុងមួយខែ ជាមួយតែថៅកែៗ ក្នុងគម្រោងដើរមើលដីធ្លីតាមខេត្តគ្មានពេលសម្រាក។
យ៉ាងណាមិញ សកម្មភាពដែលនាងកំពុងធ្វើនៅក្នុងពេលពេលនេះ មានការអះអាងថាទទួលបានចំណូលច្រើនមិនធម្មតានោះឡើយ ទើបនាងសប្បាយនឹងមុខជំនួញថ្មីនេះ រហូតលែងខ្វល់នឹងការងារសិល្បៈ។
ចំណែកកញ្ញា វណ្ណា វត្តី ក៏បានសារភាពថា នាងពិតជាមិនសូវបានគិតគូរពីការងារសិល្បៈប្រមាណជាង២ខែចុងក្រោយនេះ បន្ទាប់ពីនាងបានស្គាល់ដៃគូ ហើយចាប់ដៃគ្នារកស៊ីខាងនាំថៅកែខ្មែរ-ចិន និងជនជាតិផ្សេងៗដើរមើលដី។ មុខរបរថ្មីនេះ ដ្បិតតែធ្វើឱ្យនាងនៅខេត្តច្រើនជាងនៅភ្នំពេញ ហើយត្រូវធ្វើដំណើរពីមួយកន្លែងទៅមួយកន្លែងក៏ពិតមែន ប៉ុន្តែសម្រាប់ចំណូលគឺក្រែល ជាពិសេសក្នុងពេលណែនាំភ្ញៀវចិន ឬថៅកែៗ ឱ្យទិញដីបានមួយប្លង់ៗ ដែលមានទំហំច្រើនហិកតា។ (កែសម្រួលដោយ ៖ បុប្ផា)
ចែករំលែកព័តមាននេះ