រាជធានីភ្នំពេញ ៖ រវល់តែផ្តោតអារម្មណ៍លើលោកទេព រិនដារ៉ូ ដែលមានវ័យចំណាស់ទៅហើយ នៅតែមិនទាន់ជ្រើសយកនារីណាម្នាក់រៀបការជាគូគាប់ និងជីវិតសិល្បៈបច្ចុប្បន្នរបស់លោក មហាជនប្រហែលជាភ្លេចប្រវត្តិជីវិតអតីតកាលរបស់លោកបាត់ទៅហើយ ឬនៅចាំតិចតួច ខណៈអ្នកជំនាន់ក្រោយមិនបានដឹងទេ ។ កោះសន្តិភាពសូមបង្ហាញជូនពីប្រវត្តិជីវិតរបស់លោកទេព រិនដារ៉ូ ដែលនាំ
រាជធានីភ្នំពេញ ៖ រវល់តែផ្តោតអារម្មណ៍លើលោកទេព រិនដារ៉ូ ដែលមានវ័យចំណាស់ទៅហើយ នៅតែមិនទាន់ជ្រើសយកនារីណាម្នាក់រៀបការជាគូគាប់ និងជីវិតសិល្បៈបច្ចុប្បន្នរបស់លោក មហាជនប្រហែលជាភ្លេចប្រវត្តិជីវិតអតីតកាលរបស់លោកបាត់ទៅហើយ ឬនៅចាំតិចតួច ខណៈអ្នកជំនាន់ក្រោយមិនបានដឹងទេ ។ កោះសន្តិភាពសូមបង្ហាញជូនពីប្រវត្តិជីវិតរបស់លោកទេព រិនដារ៉ូ ដែលនាំឱ្យក្លាយជាតារាភាពយន្តរហូតមកដល់បច្ចុប្បន្ន ។
កាលពីពេល ថ្មីៗនេះ លោកទេព រិនដារ៉ូ បាននិទានប្រវត្តិជីវិតរបស់លោកឱ្យដឹងថា លោកមានទឹកចិត្តស្រឡាញ់ចូលចិត្តសិល្បៈភាពយន្តណាស់ ឱ្យតែខ្សែភាពយន្តខ្មែរយើងបញ្ចាំងតាមរោង គឺលោកទៅមើលជាប្រចាំ ។ លោកចាំបានថាក្រោយឆ្នាំ១៩៧៩ លោកធ្លាប់ទៅមើលកុនរឿង «ចិត្តចងចាំ» ដែលសម្តែងដោយលោកខៃ ប្រសិដ្ឋ និងអ្នកនាងអ៊ុំ កណ្ណរី ។ លោកពេញចិត្តណាស់ ស្រឡាញ់ណាស់ការសម្តែង និងគិតថា បើក្លាយជាអ្នកសម្តែង មិនដឹងជាសប្បាយចិត្តយ៉ាងណាទេ ។ មុនពេលក្លាយជាតារាភាពយន្ត លោកធ្វើការផ្នែកយន្តហោះដែលរៀនចប់ពីសហភាពសូវៀត។
ប្រវត្តិបានក្លាយជាតារាភាពយន្ត គឺលោកទេព រិនដារ៉ូ មិនបានឆ្លងកាត់ការប្រឡងទេពកោសល្យទេ ។ ជាសំណាងរបស់លោកដោយមានទម្រង់មុខត្រូវចិត្តអ្នកដឹកនាំរឿង ពិសេសគឺសក់របស់លោកប្លែកពីតួប្រុសដទៃ ក៏បានឱកាសចូលរួមសម្តែងភាពយន្ត ។ លោកទេព រិនដារ៉ូ ប្រឡូកក្នុងពិភពសិល្បៈភាពយន្តក្រោយលោកខៃ ប្រសិដ្ឋ និងអ្នកនាងចាន់ តារាទី ១ឆ្នាំ ឬ២ឆ្នាំ ។
លោកទេព រិនដារ៉ូ ចាំថា មានថ្ងៃមួយលោកជិះកង់ចេញពីកន្លែងធ្វើការនៅអាកាសយានដ្ឋានពោធិ៍ចិនតុង មានអ្នកដឹកនាំរឿងម្នាក់ជិះរថយន្តតាមលោកពីក្រោយ និងចុចស៊ីផ្លេរហូត ។ គេបានសួរនាំលោកពីរឿងថតកុន តែលោកថា លោកថតមិនកើតទេ ព្រោះតែកន្លែងធ្វើការរបស់លោកមានច្បាប់តឹងតែង បើចង់ឱ្យលោកសម្តែងទាល់តែសុំច្បាប់ត្រឹមត្រូវ មានលិខិតស្នាមស្នើដល់ថ្នាក់លើ ។
បន្ទាប់មក គេបានរត់ការរហូតមានការយល់ព្រមពីថ្នាក់លើ ធ្វើឱ្យលោកទេព រិនដារ៉ូ មានឱកាសថតភាពយន្តលើកដំបូងក្នុងឆ្នាំ១៩៨៩ ។ រឿងដែលលោកសម្តែងបីបួនរឿងដំបូងមិនទាន់ទទួលបានការគាំទ្រទេ ។ លោកចាប់ផ្តើមគេស្គាល់ឈ្មោះ និងចាប់ចិត្តតាមរយៈរឿង «អាថ៌កំបាំងកិច្ចសន្យាស្នេហ៍» របស់នាយកដ្ឋានភាពយន្ត ។ លោកទេព រិនដារ៉ូ សម្តែងរឿងនោះជាមួយអ្នកនាងអម្ពរ ទេវី សមគ្នាណាស់ ទើបចាប់ពីពេលនោះមក អ្នកទាំងពីរក្លាយជាដៃគូសម្តែងដែលមហាជនទទួលស្គាល់រហូតយល់ច្រឡំថា ពួកលោកស្រឡាញ់គ្នាក្រៅឆាកទៀតផង ។
តារាសម្តែងល្បីឈ្មោះ និងពូកែរក្សារូបរាងឱ្យនៅតែសង្ហា មិនមានក្បាលពោះរូបនេះនិទានថា នៅជំនាន់របស់លោកគេចាប់ដៃគូសម្តែងរវាងតារាប្រុស និងតារាស្រីតាមទីផ្សារសិល្បៈដែលមហាជននិយមដូចជា រូបលោកដៃគូសម្តែងជាមួយអ្នកនាងអម្ពរ ទេវី លោកខៃ ប្រសិដ្ឋ គូជាមួយអ្នកនាងចាន់ តារាទី និងសុខ ស្រីមុំ គូជាមួយលោកសម តារា ជាដើម ។
លោកទេព រិនដារ៉ូ និយាយថា ភាពជោគជ័យដែលលោកមានរាប់ឆ្នាំបែបនេះកើតចេញពីការស្រឡាញ់សិល្បៈ ប្រៀបបីដូចជាស្នេហារវាងមនុស្សពីរនាក់ បើកាលណាស្រឡាញ់គ្នាចេះយកចិត្តទុកដាក់មើលថែទាំគ្នា អត់ធ្មត់យោគយល់គ្នាដើម្បីថែរក្សាចំណងស្នេហ៍ ។ ចំណែកលោកស្រឡាញ់សិល្បៈ និងជោគជ័យបែបនេះមកពីខំព្យាយាម តស៊ូ និងមិនដែលធ្វេសប្រហែសខ្លួនឡើយ ។ លោកស្តាប់រៀមច្បងជាប្រចាំ រៀនពីអ្នកមានបទពិសោធន៍រហូត មិនតាំងខ្លួនថាជាអ្នកល្បីទេ ។ ការសម្តែងត្រូវតែហាត់រៀនជាប្រចាំមិនចេះចប់ទេ តែងតែមានការរំលេចអ្វី ថ្មីៗជានិច្ច ។ តារា ម្នាក់ៗគួរតែស្វែងយល់ពីចំណុចនេះ ដែលលោកធ្លាប់មានបទពិសោធន៍ ។ អ្នកសម្តែងជំនាន់នេះ មានអ្នកមានទេពកោសល្យល្អ និងក្លាហានច្រើន ។ តារាជំនាន់នេះមិនសូវចេះអឹមអៀនច្រើនដូចកាលពីជំនាន់លោកទេ ៕
ចែករំលែកព័តមាននេះ