រាជធានីភ្នំពេញ ៖ កាលពីរាត្រីថ្ងៃទី២៨ មីនា ឆ្នាំ២០១៤ នៅពហុកីឡដ្ឋានជាតិអូឡាំពិក អង្គការដើម្បីភាពញញឹមនៃកុមារ បានរៀបចំកម្មវិធីតន្ត្រីសប្បុរសធម៌ ដោយដាក់តាំងបង្ហាញមុខម្ហូបខ្មែរ ប្លែកៗមកពីទូទាំងប្រទេស ជូនមហាជនទស្សនា និងភ្លក់រសជាតិ ។ កម្មវិធីប្រគំតន្ត្រីនោះ បង្កើតឡើងដើម្បីប្រមូលប្រាក់ជួយឧបត្ថម្ភដល់កុមារកំព្រាដែលកំពុងតែត្រូវការជំនួយ ផ្សេងៗសម្រាប់ការសិក្សា និងរស់នៅប្រចាំថ្ងៃ ។ លើសពីនេះមានអ្នកចូលរួមភ្លក់រសជាតិអាហារខ្មែរយ៉ាងច្រើនកុះករ ។
កញ្ញាសុខ មុនីកា ជាអ្នកចូលរួមទស្សនាការប្រគំតន្ត្រី និងបង្ហាញមុខម្ហូបខ្មែរឆ្នាំ២០១៤ មកពីសង្កាត់ជ្រោយចង្វា និងជានិស្សិតសាកលវិទ្យាល័យជាតិគ្រប់គ្រង និយាយថា នាងទើបតែបានចូលរួមទស្សនាមុខម្ហូបខ្មែរជាលើកទី១ ដោយបានដឹងតាមរយៈសារព័ត៌មានចុះផ្សាយ ។ នាងចាប់អារម្មណ៍ចង់មើល ព្រោះមានសុទ្ធតែមុខម្ហូបខ្មែរដាក់តាំងមកពីតាមតំបន់នានា ។ ម្ហូបខ្លះនាងអត់ដែលបានឃើញទេ ។ នាងភ្ញាក់ផ្អើលពេលឃើញមុខម្ហូបខ្មែរយើងទាក់ទាញមនុស្សចូលរួមច្រើនកកកុញស្ទើរតែមិនគួរឱ្យជឿ ។ ម្នាក់ៗសួរនាំពីអាហារ ប្លែកៗ និងអង្គុយហូបយ៉ាងឆ្ងាញ់ សូម្បីតែជនបរទេសក៏មានច្រើនដែរ។
លោកព្រំ កក្កដា ចុងភៅប្រចាំភោជនីយដ្ឋានមួយនៅតាមដងមហាវិថីម៉ៅសេទុង នៃរាជធានីភ្នំពេញ និយាយថា លោកសប្បាយចិត្តដែលបានចូលរួមក្នុងពិព័រណ៍មុខម្ហូបខ្មែរនេះ ។ លោកបានទស្សនាផង និងស្វែងយល់ពីម្ហូបអាហារដើម្បីយកទៅបញ្ចេញស្នាដៃនៅហាងរបស់លោកផង ។
លោកម៉ៅ រក្សា តំណាងក្រុមមកពីខេត្តព្រៃវែង និងស្វាយរៀង ឱ្យដឹងថា ឆ្នាំនេះក្រុមរបស់លោកបានដាក់តាំងមុខម្ហូបខ្មែរមួយចំនួនដូចជា មុខម្ហូបត្រីចំហុយ និងខទីវ និងសម្លម្ជូរស្លឹកថ្នឹង ។ ម្ហូបអាហារដែលក្រុមលោកដាក់បង្ហាញគឺ លក់ដាច់ស្ទើរតែដួសឱ្យភ្ញៀវមិនទាន់ ។ អ្វីដែលសំខាន់គឺខ្មែរយើងមកមើលមិនសាញតម្លៃឡើយ ព្រោះចង់ស្គាល់អាហារខ្មែរ និងចង់ចូលរួមជួយកុមារកំព្រាដែលកំពុងតែខ្វះខាត ។ ដូចនេះហើយលោកសង្កេតឃើញមនុស្សមកចូលរួមច្រើនមែនទែន គឺឡើងណែនទីតាំងប្រារព្ធពិធី ។ នេះបញ្ជាក់ថា ខ្មែរមានទឹកចិត្តជួយខ្មែរដែលសុទ្ធតែជាជនរួមជាតិទាំងអស់គ្នា ។
នេះជាព្រឹត្តិការណ៍លើកទី៨ សម្រាប់រាត្រីតន្ត្រីសប្បុរសធម៌របស់អង្គការដើម្បីភាពញញឹមនៃកុមារ ។ ពិធីនោះមានមហាជនចូលរួមជាង៩ពាន់នាក់ លើសពីការរំពឹងទុក ។ ចុងភៅមកពីខេត្តចំនួន១៨ បានបង្ហាញម្ហូបអាហារបែបប្រពៃណីជាតិ ជាម្ហូបអាហារប្រចាំតំបន់ នីមួយៗចំនួន៤៦មុខ និងម្ហូបអាហារសម័យបច្ចុប្បន្នជាច្រើនមុខទៀត ។
ក្នុងកម្មវិធីប្រគំតន្ត្រីនោះមានសម្តែងរបាំជូនពរ របាំមេអំបៅ និងរបាំត្រុដិ របស់កុមារកំព្រា ព្រមទាំងចម្រៀងសម័យ និងសិល្បៈជាច្រើនទម្រង់ទៀត ៕
ចែករំលែកព័តមាននេះ