មនុស្សខ្លះតែងលើកឡើងថា «ហូបប្រៃខ្លាំង នាំឱ្យកើតជំងឺទឹកនោមប្រៃ» ដែលវាចានេះហាក់ដូចជាត្រូវខ្លះដែរ តែមិនចំទាំងស្រុងទេ ។ តាមពិតទឹកនោមប្រៃ គឺជាជំងឺមួយប្រភេទដែលកើតមានច្រើននៅលើពិភពលោក ជាការវិវឌ្ឍពីអ្នកកើតមានជំងឺលើសឈាម ជំងឺទឹកនោមផ្អែមយ៉ាងឆាប់រហ័ស ហើយបើសិនជាមិនបានព្យាបាលឱ្យបានត្រឹមត្រូវទេនឹងអាចធ្វើឱ្យស្លាប់ ។
ជួបជាមួយលោកសាស្រ្ដាចារ្យមហាបរិញ្ញាវេជ្ជបណ្ឌិត សេង សេរី ឯកទេសជំងឺទឹកនោមផ្អែមនៃមន្ទីរពេទ្យព្រះកុសុមៈ បានប្រាប់កោះសន្ដិភាពថា ដើម្បីដឹងច្បាស់ថា លោកអ្នកកើតមានជំងឺទឹកនោមប្រៃ ឬអត់នោះទាល់តែយកទឹកនោមទៅពិនិត្យ ។ កាលណាបើពិនិត្យឃើញមានជាតិប្រូតេអីុន(ជាតិសាច់)នៅក្នុងទឹកនោម នោះគេអាចបញ្ជាក់ថា លោកអ្នកប្រាកដជាកើតមានជំងឺទឹកនោមប្រៃហើយ ។ ជាធម្មតានៅក្នុងតម្រងនោមដែលមានសុខភាពល្អ ពេលគេយកទឹកនោមទៅពិនិត្យមិនមានជាតិប្រូតេអីុននៅក្នុងទឹកនោមនោះទេ អ្នកដែលកើតមានជំងឺទឹកនោមប្រៃអាចបណ្ដាលមកពីបញ្ហាមួយចំនួនដូចជា ៖
១-អាចបណ្ដាលមកពីលោកអ្នកកំពុងកើតមានជំងឺលើសឈាម និងជំងឺទឹកនោមផ្អែម កាលណាមិនបានព្យាបាលទេ ឬព្យាបាលដែរ តែមិនបានត្រឹមត្រូវតាមវេជ្ជបញ្ជា ថ្ងៃណាមួយជំងឺនេះអាចនឹងវិវឌ្ឍន៍ទៅរកជំងឺទឹកនោមប្រៃយ៉ាងប្រាកដ ។
២-អាចកើតមានដោយសារការប្រើប្រាស់ឱសថមួយចំនួន ដែលមានផលប៉ះពាល់ដល់តម្រងនោម យូរៗទៅអាចធ្វើឱ្យកើតជំងឺឺទឹកនោមប្រៃ ។
កាលបើលោកអ្នកកើតមានជំងឺទឹកនោមប្រៃហើយ ជាសញ្ញាបញ្ជាក់ថា នឹងអាចឈានទៅកើតជំងឺខ្សោយក្រលៀន ពេលនោះអ្នកអាចប្រឈមនឹងការលាងឈាម និងវះកាត់ប្ដូរក្រលៀនថ្មីផងដែរ ។
គួរចងចាំថា បើលោកអ្នកកើតមានជំងឺទឹកនោមប្រៃនោះនឹងអាចបង្កទៅជាជំងឺលើសឈាម ជំងឺទឹកនោមផ្អែម ជំងឺហើមដៃ ហើមជើង ហើមមុខ ហើមខ្លួន ហើយបាត់បង់គ្រាប់ឈាមក្រហមធ្ងន់ធ្ងរ ។ ដូច្នេះដើម្បីការពារកុំឱ្យហើមខ្លាំង គ្រូពេទ្យបានណែនាំឱ្យអ្នកជំងឺចៀសវាងការទទួលទានប្រៃខ្លាំង និងអាហារដែលមានសាច់ឬខ្លាញ់ច្រើនពេក ។ ធម្មតានៅក្នុងផ្លែឈើនីមួយៗតែងតែមានជាតិប្រៃស្រាប់ ដូច្នេះគេបានហាមមិនឱ្យទទួលទានផ្លែឈើច្រើនពេកទេ ។
មនុស្សភាគច្រើនតែងយល់ថា ការទទួលទានប្រៃគឺជាមូលហេតុដែលនាំឱ្យកើតជំងឺទឹកនោមប្រៃ ត្រង់នេះក៏ត្រូវខ្លះដែរ ព្រោះថាការបរិភោគអាហារប្រៃពេលអាចធ្វើឱ្យកើតជំងឺលើសឈាម ដែលអាចវិវឌ្ឍទៅរកជំងឺទឹកនោមប្រៃ ។ បច្ចុប្បន្ន មនុស្សដែលមានអាយុចាប់ពី៤០ឆ្នាំឡើងទៅ ត្រូវតែប្ដូររបបអាហារ ចៀសវាងការទទួលទានប្រៃពេក ខ្លាញ់ច្រើនពេក ត្រូវធ្វើលំហាត់ប្រាណឱ្យបានទៀតទាត់ និងត្រូវទទួលទានបន្លែ ផ្លែឈើឱ្យបានច្រើន ។
ចំពោះរោគសញ្ញានៃជំងឺទឹកនោមប្រៃនេះមានអាការៈ ស្លេកស្លាំង ហើមមុខមាត់ ហើមដៃជើង អស់កម្លាំង ចេញរមាស់ពេញខ្លួន ទទួលទានអាហារមិនបាន ល្ហិតហ្ហៃ ស្គមរីងរៃ ឡើងលឿងសាច់ ជាដើម ។ ចំណែកឯការព្យាបាលជាទូទៅត្រូវព្យាបាលពីមូលហេតុរបស់ជំងឺនេះជាមុនសិន ។ កាលណាបើទុកយូរ ជំងឺនេះអាចធ្វើឱ្យលោកអ្នកស្លាប់បាន បើសិនជាមិនបានព្យាបាល ។ នៅប្រទេសកម្ពុជា ជំងឺទឹកនោមប្រៃកើតមានច្រើនណាស់ដែលមានបរិមាណពី៥ទៅ១០ភាគរយ ហើយជំងឺនេះវិវឌ្ឍមកពីអ្នកកើតជំងឺលើសឈាម និងទឹកនោមផ្អែម ៕
ចែករំលែកព័តមាននេះ