រាជធានីភ្នំពេញ ៖ លោកជិន ម៉ាលីន អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌បានថ្លែងនៅព្រឹកថ្ងៃទី១៩ កញ្ញាថា «រដ្ឋាភិបាលបានសម្រេចបញ្ជូនលិខិតទៅកាន់ប្រទេសសមាជិកអាស៊ានដែលបានចុះសច្ចាប័នជាមួយកម្ពុជា ចំពោះករណីលោកសម រង្ស៊ី ដើម្បីនាំខ្លួនមកកាន់តុលាការកម្ពុជាអនុវត្តតាមច្បាប់ព្រហ្មទណ្ឌ ។ លោកជិន ម៉ាលីន លើកឡើងថា នេះមិនមែនជាលើកទី១ទេ ដែលលោកសម រង្ស៊ី បានប្រមាថអង្គព្រះមហាក្សត្រ តុលាការធ្លាប់បានផ្តន្ទាទោសដាក់ពន្ធនាគារ៤ឆ្នាំ ពីបទប្រមាថព្រះមហាក្សត្រកាលពីឆ្នាំ២០១៨ ហើយសាលក្រមបានចូលជាស្ថាពរ ។
ថ្លែងប្រាប់អ្នកសារព័ត៌មាននៅអង្គភាពអ្នកនាំពាក្យរដ្ឋាភិបាល ក្នុងសន្និសីទសារព័ត៌មានលោកជិន ម៉ាលីន បញ្ជាក់ថា លោកសមរង្ស៊ី ប្រព្រឹត្តបទល្មើសនេះចំនួនពីរដង ដោយបានសម្ភាសន៍ជាមួយវិទ្យុបរទេស(អាស៊ីសេរី)កាលពីថ្ងៃទី១២ ខែកញ្ញា ។ ទង្វើរបស់លោកសម រង្ស៊ី បែបនេះមិនអាចទទួលយកបានទេ នេះជាបទល្មើសតាមមាត្រា៤៣៧(ស្ទួន)នៃក្រមព្រហ្មទណ្ឌកម្ពុជា ។ មាត្រា៤៣៧(ស្ទួន)បានចែងថា ការប្រមាថចំពោះអង្គព្រះមហាក្សត្រត្រូវផ្តន្ទាទោសដាក់ពន្ធនាគារពី១ដល់៥ឆ្នាំ និងពិន័យជាប្រាក់ពី២លានរៀលដល់១០លានរៀល ។
ការប្រព្រឹត្តនេះបានរំលោភរហូតដល់រដ្ឋធម្មនុញ្ញនៃប្រទេសកម្ពុជាទៀតផង(មាត្រា៧និងមាត្រ៨) ហើយជាការប្រមាថដល់ប្រជាជាតិកម្ពុជាទាំងមូល ព្រោះព្រះមហាក្សត្រតំណាងឲ្យជាតិសាសន៍កម្ពុជា ។ ចៅក្រមមានឆន្ទានុសិទ្ធិក្នុងការសម្រេចទោស ដោយផ្អែកតាមច្បាប់ រួមមានការស្រូបទោស និងបូកទោសបញ្ចូលគ្នាតាមសំណុំរឿង នីមួយៗ ដែលជនជាប់ចោទបានប្រព្រឹត្ត ដោយគ្មាននរណាសន្និដ្ឋានទោសមុនចៅក្រមនោះទេ ។
ចំពោះដំណើរការនីតិវិធីច្បាប់ លោកជិន ម៉ាលីន បញ្ជាក់ថា ក្រោយពីបានទទួលព័ត៌មាន និងមានការពិភាក្សាថាសកម្មភាពរបស់ទណ្ឌិតសម រង្ស៊ី ជាបទល្មើសពាក់ព័ន្ធនឹងអង្គព្រះមហាក្សត្រ លោកអង្គវង្ស វឌ្ឍានា រដ្ឋមន្ត្រីក្រសួងយុត្តិធម៌បានធ្វើអធិបញ្ជាទៅព្រះរាជអាជ្ញាឲ្យចោទប្រកាន់លោកសម រង្ស៊ី ពីបទប្រមាថព្រះមហាក្សត្រ ។ ពេលនេះចៅក្រមបានចេញដីកានាំខ្លួនលោកសម រង្ស៊ី មកកាន់តុលាការ ។
ក្នុងសន្និសីទសារព័ត៌មាននេះដែរលោកបណ្ឌិតសភាចារ្យរស់ ចន្ត្រាបុត្រ បានថ្លែងថា សកម្មភាព និងទង្វើរបស់លោកសម រង្ស៊ី ប្រឆាំងនឹងរាជបល្ល័ង្ក និងប្រជាពលរដ្ឋខ្មែរប្រៀបដូចលោកសម រង្ស៊ី បានទាត់ចោលរដ្ឋធម្មនុញ្ញនៃប្រទេសកម្ពុជាដែលប្រជាពលរដ្ឋបានបោះឆ្នោតទទួលស្គាល់ ។ ការវាយប្រហារមកលើអង្គព្រះមហាក្សត្រនេះគឺប្រមាថប្រជាពលរដ្ឋខ្មែរទាំងមូល សូម្បីតែបរទេសក៏គេទទួលស្គាល់ដែរ ។ ដោយឡែក លោកសម រង្ស៊ី អត់ទទួលស្គាល់អ្វីដែលជាច្បាប់ និងរដ្ឋធម្មនុញ្ញកម្ពុជាទេ ។
លោកបណ្ឌិតសភាចារ្យរស់ ចន្ត្រាបុត្រ ទីប្រឹក្សាផ្ទាល់សម្ដេចតេជោហ៊ុន សែន នាយករដ្ឋមន្ដ្រី និងជាសាស្ដ្រាចារ្យវិទ្យាសាស្ដ្រនយោបាយបានថ្លែងថា «ប្រទេសដែលជាសមាជិកអាស៊ាន មិនគាំទ្រនយោបាយក្បត់ជាតិរបស់លោកសម រង្ស៊ី នោះទេ បើទោះបីជាប្រទេសទាំងនោះជាមិត្តរបស់សហរដ្ឋអាមេរិកក៏ដោយ។មូលហេតុដែលខ្ញុំអះអាងថា ប្រទេសអាស៊ានមិនគាំទ្រសកម្មភាពក្បត់ជាតិរបស់លោកសម រង្ស៊ី ដែលមានអាមេរិកនៅពីក្រោយខ្នងនោះ ព្រោះប្រទេសទាំងនោះក៏មានទំនាក់ទំនងរកស៊ីជាមួយមហាយក្សចិនផងដែរ ។ ជាមួយគ្នានេះប្រទេសអាស៊ាន ចង់បានតែការរក្សាសន្តិភាព និងស្ថិរភាព នៅក្នុងតំបន់រួមគ្នាប៉ុណ្ណោះ ។
ខ្ញុំមានជំជឿថា សហរដ្ឋអាមេរិកដឹងច្បាស់ណាស់នូវភូមិសាស្ត្រនយោបាយ ។ ខ្ញុំជឿថាអាមេរិកក៏មិនអាចនឹងអនុវត្តនូវគម្រោងផែនការរបស់ខ្លួននេះបានដែរ ។ នេះគ្រាន់តែនយោបាយមួយ សម្ពាធមួយរបស់នយោបាយអាមេរិក មកលើកម្ពុជាប៉ុណ្ណោះ ពីព្រោះប្រទេសនៅក្នុងតំបន់សព្វថ្ងៃនេះ គេមានទំនាក់ទំនងរកស៊ីជាមួយគ្នា ប្រទេសនៅក្នុងតំបន់អាស៊ី សូម្បីតែអូស្រា្តលី ជប៉ុន ក៏រកស៊ីជាមួយនឹងចិនដែរ ។ អ្វីដែលជាទំនាក់ទំនងនៅក្នុងតំបន់ គឺជាទំនាក់ទំនងនយោបាយ គឺជាទំនាក់ទំនងការទូត ជាទំនាក់ទំនងមួយដើម្បីរក្សាសន្តិភាព និងស្ថិរភាព នៅក្នុងទឹកដីអាស៊ី ក៏ដូចជាទឹកដីអាស៊ាន» ។
លោកផៃ ស៊ីផាន ប្រធានអង្គភាពអ្នកនាំពាក្យរដ្ឋាភិបាល ក្នុងសន្និសីទស្តីពីករណីប្រមាថព្រះមហាក្សត្រនេះ មានគោលបំណងផ្សព្វផ្សាយដល់សាធារណជន អំពីគោលការណ៍ និងវិធានការច្បាប់ដែលមានចែងជាធរមានក្នុងករណីដែលប៉ះពាល់ដល់ព្រះកិត្តិនាមអង្គព្រះមហាក្សត្រដែលជាទីសក្ការៈដ៏ខ្ពង់ខ្ពស់បំផុតរបស់ប្រជាជាតិកម្ពុជា ។ ប្រជាពលរដ្ឋគ្រប់រូបមានកាតព្វកិច្ចត្រូវតែគោរពច្បាប់ និងការពាររដ្ឋធម្មនុញ្ញ ពង្រឹងនីតិរដ្ឋ និងលុបបំបាត់នីទណ្ឌភាព ។ លោកសម រង្ស៊ី ត្រូវទទួលខុសត្រូវទង្វើរបស់ខ្លួនចំពោះមុខច្បាប់ជាកំហិត ដូចដែលបានចែងក្នុងក្រមព្រហ្មទណ្ឌ និងក្រមនីតិវិធីព្រហ្មទណ្ឌកម្ពុជា។
លោកកូយ សៅ ចៅក្រមសាលាដំបូងរាជធានីភ្នំពេញ កាលពីថ្ងៃទី៦ ខែកញ្ញា បានសម្រេចចេញដីកាបញ្ជូនទៅសមត្ថកិច្ចចាប់ខ្លួនលោកសម រង្ស៊ី មកប្រគល់ឲ្យសាលាដំបូងរាជធានីភ្នំពេញចាត់ការតាមច្បាប់ ។ លោកចៅក្រមក៏បានបញ្ជាដល់ប្រធានពន្ធនាគារត្រៀមឃុំខ្លួនជនរូបនេះ និងនាំទៅបង្ហាញខ្លួននៅចំពោះមុខចៅក្រមស៊ើបសួរនៃសាលាដំបូងរាជធានីភ្នំពេញ ។
លោកគី តិច មេធាវីរាជរដ្ឋាភិបាលកាលពីថ្ងៃទី១៣ ខែកញ្ញា ឆ្នាំ២០១៩ បានប្តឹងលោក សម រង្ស៊ី ករណីប្រមាថព្រះមហាក្សត្រ ដោយលោកមេធាវីបញ្ជាក់ប្រាប់តុលាការថាលោកសម រង្ស៊ី បាននិយាយប្រាប់វិទ្យុអាស៊ីសេរី និងផ្សាយតាមហ្វេសប៊ុកថា អ្នកនៅលើទឹកដីកម្ពុជាជាចំណាប់ខ្មាំងរបស់ហ៊ុន សែន សូម្បីតែព្រះមហាក្សត្រយើងក៏ជាចំណាប់ខ្មាំងរបស់ហ៊ុន សែន ដូចនេះលោកអត់ហ៊ានធ្វើអី លោកខ្លាចហ៊ុន សែន លោកចង់តែរក្សារាជបល្ល័ង្ក ដូចនេះយើងទុកព្រះអង្គមួយអន្លើ យើងមិនអាចរំពឹងព្រះមហាក្សត្រដែលជាអាយ៉ងរបស់ហ៊ុន សែនដូចសព្វថ្ងៃនេះទេ…»។ លោកសម រង្ស៊ី មានសំណុំរឿង១៤នៅតុលាការ ហើយមាន៦សំណុំរឿងសាលក្រមបានចូលជាស្ថាពរ និងប្រមាណ៨សំណុំរឿងទៀតកំពុងដំណើរការនៅតុលាការ ៕
ចែករំលែកព័តមាននេះ