រាជធានីភ្នំពេញ ៖ បុរសដែលជាកម្មករតម្លើងបង្គោលអង់តែនទូរសព្ទម្នាក់ បានធ្លាក់ពីលើអង់តែន ដែលកំពុងដំណើរការមិនទាន់រួចរាល់តម្លើង កម្ពស់ប្រមាណ៣៥ម៉ែត្រ បណ្ដាលឲ្យស្លាប់បាត់បង់ជីវិតភ្លាមៗនៅនឹងកន្លែងយ៉ាងរន្ធត់ ។
ហេតុការណ៍មួយនេះ បានកើតឡើងកាលពីវេលាម៉ោង៣និង១០នាទីរសៀលថ្ងៃទី១៤ ខែកញ្ញា ឆ្នាំ២០២៦ នៅចំណុចដីឡូត៌មួយកន្លែង ស្ថិតនៅក្នុងភូមិសាក់សំពៅ សង្កាត់សាក់សំពៅ ខណ្ឌដង្កោ រាជធានីភ្នំពេញ ។
បុរសរងគ្រោះរូបនោះឈ្មោះ ខាន់ វុទ្ធី អាយុ៣០ឆ្នាំ មុខរបរកម្មករតម្លើងអង់តែទូរសព្ទខាងលើ មានស្រុកកំណើតនៅភូមិជ្រោយដង ឃុំសំរោងធំ ស្រុកគៀនស្វាយ ខេត្តកណ្តាល ។
បុរសម្នាក់ឈ្មោះ ហ៊ង សេន អាយុ ២៨ឆ្នាំ បានបំភ្លឺប្រាប់ឲ្យសមត្ថកិច្ចដឹងថា វេលាម៉ោង៣រសៀលថ្ងៃកើតហេតុ រូបគាត់ និងបុរសរងគ្រោះបានឡើងទៅលើបង្គោលអង់តែន ដែលកំពុងដំណើរការតម្លើងកម្ពស់ប្រមាណ៣៥ម៉ែត្រ ដើម្បីតម្លើងដែកបង្គោលតឡើងទៅលើទៀត។ លុះរយៈពេលប្រមាណ១០នាទីក្រោយមក គឺនៅវេលាម៉ោង៣និង១០នាទីរសៀលថ្ងៃខែឆ្នាំដដែល ស្រាប់តែឮសូរសំឡេងវត្ថុអ្វីមួយធ្លាក់ជាមួយជាមួយដែកនៅខាងក្រោម។ ពេលនោះគាត់បានក្រឡេកមើលមកក្រោម ក៏បានឃើញបុរសរងគ្រោះឈ្មោះខាន់ វុទ្ធី ធ្លាក់ទៅដល់ដីបាត់ទៅហើយ រួចក៏បានរាយការណ៏ជូនសមត្ថកិច្ចតែម្ដង ។
ដោយឡែកកម្មករដទៃទៀត បាននិយាយថា នៅមុនពេលកើតហេតុ បុរសរងគ្រោះបានឆាតផង ខលផងទៅប្រាប់ក្រុមគ្រួសារនៅឯផ្ទះឲ្យដើរទារប្រាក់ដែលគេជំពាក់គាត់ឲ្យអស់ផង បន្ទាប់មក ក៏បានឡើងទៅធ្វើការនៅលើបង្គោលអង់តែនទូរសព្ទខាងលើនោះ ។ ខណៈនោះដែរ ពុំមាននរណាបានចាប់អារម្មណ៍ថា គាត់ពាក់ខ្សែក្រវាត់សុវត្ថិភាពដែរ ឬអត់នោះទេ ប៉ុន្តែអាចប្រហែលជាអត់ពាក់ច្រើនជាង លុះដល់ពេលកើតហេតុ ស្រាប់តែធ្លាក់ពីលើបង្គោលអង់តែននោះទាំងកំរោល បណ្ដាលឲ្យស្លាប់បាត់បង់ជីវិតភ្លាមៗនៅនឹងកន្លែងយ៉ាងរន្ធត់ ។
ក្រោយពេលកើតហេតុកម្លាំងអាជ្ញាធរ និងសមត្ថកិច្ចសង្កាត់សាក់សំពៅ និងខណ្ឌដង្កោ បានចុះទៅកាន់ទីនោះ ពិនិត្យជាក់ស្ដែង បន្ទាប់មកបានរាយការណ៍បន្តទៅកាន់កម្លាំងការិយាល័យបច្ចេកទេសនិងវិទ្យាសាស្ត្រ នៃស្នងការដ្ឋាននគរបាលរាជធានីំភ្នំពេញ ចុះទៅធ្វើការពិនិត្យកោសល្យវិច័យសាកសពបុរសរងគ្រោះនោះផងដែរ ។
យោងតាមការពិនិត្យកន្លែងកើតហេតុ ពិនិត្យសាកសព និងព័ត៌មានប្រមូលបាន ឯកឧត្តមវេជ្ជបណ្ឌិត ជាង រ៉េន គ្រូពេទ្យកោសល្យវិច័យ សាលាដំបូងរាជធានីភ្នំពេញ ព្រមទាំងកម្លាំងការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលរាជធានីំភ្នំពេញ បញ្ជាក់ថា ជនរងគ្រោះស្លាប់ដោយសារប៉ះទង្គិចក្បាល និងខ្លួនប្រាណធ្ងន់ធ្ងរ (ដោយធ្លាក់ពីលើបង្គោលអង់តែនកម្ពស់៣៥ម៉ែត្រ) ហើយក្រោយពេលពិនិត្យរួច ក៏បានប្រគល់សាកសពជូនប្អូនប្រុសយកទៅធ្វើបុណ្យនៅស្រុកកំណើត ៕
ចែករំលែកព័តមាននេះ