រាជធានីភ្នំពេញ ៖ អ្នកភូមិមកពីសហគមន៍បឹងកក់ ថ្មគោល និងបុរីកីឡា សរុបប្រមាណ៧០នាក់ ដែលម្នាក់ៗខ្លះកាន់ផ្កាឈូក និងធូបមួយបាច់អុជហុយទ្រលោម នាំគ្នាប្រមូលផ្តុំនៅមុខក្រសួងយុត្តិធម៌ និងតុលាការកំពូល តាមបណ្តោយវិថីសុធារស ក្នុងសង្កាត់ចតុមុខ ខណ្ឌដូនពេញ កាលពីព្រឹកថ្ងៃទី២៨ មីនា ដើម្បីទាមទារសុំឱ្យដោះលែងអ្នកតវ៉ាដីធ្លីនៅបឹងកក់ លោក ចាន់ ពុទ្ធិស័ក្តិ លោក វន់ ពៅ
រាជធានីភ្នំពេញ ៖ អ្នកភូមិមកពីសហគមន៍បឹងកក់ ថ្មគោល និងបុរីកីឡា សរុបប្រមាណ៧០នាក់ ដែលម្នាក់ៗខ្លះកាន់ផ្កាឈូក និងធូបមួយបាច់អុជហុយទ្រលោម នាំគ្នាប្រមូលផ្តុំនៅមុខក្រសួងយុត្តិធម៌ និងតុលាការកំពូល តាមបណ្តោយវិថីសុធារស ក្នុងសង្កាត់ចតុមុខ ខណ្ឌដូនពេញ កាលពីព្រឹកថ្ងៃទី២៨ មីនា ដើម្បីទាមទារសុំឱ្យដោះលែងអ្នកតវ៉ាដីធ្លីនៅបឹងកក់ លោក ចាន់ ពុទ្ធិស័ក្តិ លោក វន់ ពៅ សកម្មជនសិទ្ធិមនុស្ស និងកម្មករចំនួន១៩នាក់ទៀត ដែលកំពុងត្រូវឃុំខ្លួននៅពន្ធនាគារត្រពាំងផ្លុង ខេត្តកំពង់ចាម ។
មន្ត្រីនគរបាលខណ្ឌដូនពេញ និយាយថា នៅវេលាម៉ោង៨ និង៤០នាទីព្រឹក ថ្ងៃទី២៨ មីនា មានពលរដ្ឋប្រមាណ៧០នាក់ ដែលមហាជនគ្រប់គ្នាស្គាល់យ៉ាងច្បាស់ ដោយសារតែការដើរតវ៉ាផ្សេងៗស្ទើរជារៀងរាល់ថ្ងៃ ដូចអត់រកសុី ឬធ្វើការងារអ្វីសោះ មកពីបីសហគមន៍ផ្សេងគ្នា គឺសហគមន៍បឹងកក់ សហគមន៍បុរីកីឡា និងសហគមន៍ថ្មគោល ហើយម្នាក់ៗមានកាន់ផ្កាឈូក និងធូបមួយបាច់ អុចហុយផ្សែងទ្រលោមផង បាននាំគ្នាឈរនៅមុខច្រកចេញចូលក្រសួងយុត្តិធម៌ ដើម្បីសួរនាំពីការដាក់ញត្តិរបស់ពួកគេនាពេលកន្លងមក។
បន្ទាប់មក ពួកគេបានបន្តដំណើរមកដល់មុខតុលាការកំពូល ហើយស្រែកទាមទារឱ្យតុលាការកំពូល ជួយអន្តរាគមន៍ដោះលែងសកម្មជនពួកគេទាំង៣នាក់ និងកម្មករ១៨នាក់ទៀតជាបន្ទាន់ ហើយនាំគ្នាដើរដង្ហែជុំវិញតុលាការកំពូលទៀតផង ។ ការទាមទាររបស់សហគមន៍ទាំង៣ខាងលើនេះ មិនមែនទើបតែជាលើកទីមួយទេ គឺពួកគេធ្លាប់ធ្វើរាប់លើករាប់ដងមិនអស់មកហើយ ដោយមិនមានច្បាប់អនុញ្ញាតពីសាលារាជធានីភ្នំពេញទេ ហើយក៏មិនមានការរារាំងពីកម្លាំងសមត្ថកិច្ចដែរ ។ លោកអភិបាលរាជធានីភ្នំពេញ ធ្លាប់បានហៅក្រុមអ្នកតវ៉ាទាំងនេះថា មានអាជីពខាងធ្វើបាតុកម្ម ។
តំណាងសហគមន៍តវ៉ាដីធ្លីដ៏រ៉ាំរ៉ៃនេះ និយាយថា ការដង្ហែក្បួនសុំឱ្យមានកិច្ចអន្តរាគមន៍ពីតុលាការកំពូលម្តង ជាពីរដងនេះ គឺធ្វើឡើងដោយអហិង្សា និងមានសណ្តាប់ធ្នាប់ល្អ រហូតទាល់តែបានសម្រេចគោលដៅ ទើបឈប់ធ្វើ ក៏ប៉ុន្តែបញ្ហាដីធ្លី ដាច់ខាតត្រូវតែទាមទារឱ្យដោះស្រាយចំណុចដែលសហគមន៍ចង់បានផងដែរ ។ មន្ត្រីសាលាខណ្ឌដូនពេញ ឱ្យដឹងថា នៅវេលាម៉ោងជិត១១ព្រឹក ថ្ងៃដដែល ពួកសហគមន៍ទាំង៣ បាននាំគ្នារំសាយទៅលំនៅឋានវិញ ដោយមិនមានបាតុភាពអ្វីកើតឡើងទេ តែពួកគេបាននិយាយថា បើគ្មានការដោះលែងសកម្មជនរបស់ពួកគេទាំង៣នាក់ និងកម្មករ១៨នាក់ នោះទេ ពួកគេនឹងនៅតែបន្តការតវ៉ាទាមទាររហូត ៕
ចែករំលែកព័តមាននេះ