រាជធានីភ្នំពេញ ៖ បុរសម្នាក់ដែលអះអាងថា ជាកីទ្បាករប្រដាល់ហើយញៀនថ្នាំ និងត្រូវក្លិបបណ្តេញចេញ បានត្រូវនគរបាលប៉ុស្តិ៍ឫស្សីកែវ និងប្រជាការពារសង្កាត់ ឃាត់ខ្លួនវាយខ្នោះ ខណៈបុរសរូបនេះ ដើរតាមផ្លូវអុកទ្បុកអ្នកលក់ដូរ និងវាយរថយន្តអ្នកដំណើរនៅតាមដងផ្លូវ ។ ការឃាត់ខ្លួនបុរសញៀនថ្នាំរូបនេះ បានធ្វើឱ្យមានការភ្ញាល់ផ្អើលយ៉ាងខ្លាំង កាលពីវេលាម៉ោង១០និង៥០នាទីព្រឹក ថ្ងៃទី២៧ មីនា នៅលើកំណាត់ផ្លូវជាតិលេខ៥ មុខរោងចក្រដាយយ៉ាំង ក្នុងភូមិមិត្តភាព សង្កាត់ឫស្សីកែវ ខណ្ឌឫស្សីកែវ ។
បុរសម្នាក់នេះ ពុំត្រូវបានប្រាប់ឱ្យស្គាល់ឈ្មោះទេ អត់ពាក់អាវនិងញៀនថ្នាំនិយាយលែងដឹងខុសត្រូវអ្វីទាំងអស់ ។ ទោះបីជាយ៉ាងណា បុរសនោះប្រាប់នគរបាលថា ខ្លួនធ្លាប់ជាកីទ្បាករប្រដាល់ម្នាក់ធ្លាប់ទ្បើងវាយនៅស្ថានីយទូរទស្សន៍ស៊ីធីអិន ហើយត្រូវក្លិបបណ្តេញចេញមិនឱ្យវាយទៀត ។ ចំណែកមន្ត្រីនគរបាលក៏បានអះអាងថា ជននេះ ជាកីទ្បាករប្រដាល់ម្នាក់ដែរ តែពុំបានប្រាប់ឱ្យដឹងពីឈ្មោះទ្បើយ ។
បើតាមមន្ត្រីនគរបាលមូលដ្ឋានឱ្យដឹងថា នៅមុនពេលចាប់ខ្លួន បុរសម្នាក់នេះបានធ្វើដំណើរនៅតាមផ្លូវភ្លោះ ក្នុងសង្កាត់គីទ្បូម៉ែត្រលេខ៦ ហើយគំរាមវាយរថយន្តនិងអុកទ្បុកអ្នកលក់ដូរនៅតាមដងផ្លូវ តែមិនបង្កឱ្យមានអ្នកណាម្នាក់រងរបួសនិងរងការខូចខាតនោះទេ ។ ខណៈនោះនគរបាលក៏បានដេញចាប់ ហើយជននេះរត់រហូតដល់ភូមិមិត្តភាព ក៏ត្រូវនគរបាលប៉ុស្តិ៍សង្កាត់ឫស្សីកែវ និងប្រជាការពារសង្កាត់ ជាច្រើននាក់ចាប់បានវាយខ្នោះទៅក្រោយ ធ្វើឱ្យមានការភ្ញាក់ផ្អើលទាំងព្រឹក រួចបញ្ជូនមកកាន់ប៉ុស្តិ៍នគរបាល ។
នៅពេលមកដល់ប៉ុស្តិ៍នគរបាល បុរសនេះ បានអុកទ្បុកស្រែកទ្បូទ្បាទាត់ធាក់តុទៀត ។ លុះប្រមាណ២ម៉ោងក្រោយមក កីទ្បាករប្រដាល់រូបនេះ បានស្ងប់អារម្មណ៍ហើយត្រូវបាននគរបាលឱ្យត្រទ្បប់ទៅវិញ ព្រោះមិនដឹងទុកបញ្ជូនទៅណា ៕
ចែករំលែកព័តមាននេះ