សៀមរាប ៖ ខណៈចំនួនភ្ញៀវទេសចរបរទេសបានមកទស្សនាប្រទេសកម្ពុជាក្នុងរយៈ
ពេល ៧ ខែដើមឆ្នាំ២០១៩ នេះមានចំនួនសរុប ៣.៨ លាននាក់នឹងមានកំណើនប្រមាណជាង ១១ ភាគរយ ស្រាប់តែតំបន់ សៀមរាប-អង្គរបែរជាចំនួនភ្ញៀវទេសចរបរទេសមានការធ្លាក់ចុះ
យ៉ាងខ្លាំង ក្នុងកម្រិតប្រមាណ ៩ ភាគរយ ដែលជាការធ្លាក់ចុះមិនធ្លាប់កើតមានពីមុនមក រហូតម្ចាស់អាជីវកម្មសណ្ឋាគារក៏ដូចជាអាជីករតូចធំត្អូញត្អែរនិងបង្ហាញកង្វល់ពីការបាត់បង់
ចំណូលផ្គត់ផ្គង់ជីវភាព ។
ក្នុងន័យស្តាឡើងវិញ ឬក៏ទប់ស្កាត់នូវការធ្លាក់ចុះចំនួនភ្ញៀវទេសចរបរទេសនៅសៀមរាប-អង្គរ ដែលជាតំបន់ប្រាសាទអង្គរវត្ដដ៏ល្បីល្បាញរបស់ពិភពលោកបន្តទៀតនោះ រាជរដ្ឋាភិបាលកម្ពុជាបាននិងកំពុងយកចិត្តទុកដាក់យ៉ាងខ្លាំងចំពោះបញ្ហានេះ ព្រោះមូលហេតុ ចម្បងនៃការធ្លាក់ចុះភ្ញៀវទេសចរបរទេស គឺបណ្តាលមកពីការរងឥទ្ធិពលនៃ សង្គ្រាមពាណិជ្ជ កម្មចិន-អាមេរិក ។ ជាក់ស្តែងចំនួនភ្ញៀវទេសចរចិន ក្នុងរយៈពេល ៦ខែនេះ គឺមានការធ្លាក់ចុះទូទាំងពិភពលោក ហើយចំណាយរបស់ទេសចរចិនក៏ធ្លាក់ចុះ១០ ភាគរយ ។ ហើយដើម្បីដោះស្រាយបញ្ហាប្រឈមនោះរាជរដ្ឋាភិបាល កម្ពុជាតាមរយៈគណៈកម្ម ការអន្តរក្រសួងបានដាក់ចេញនូវយុទ្ធសាស្ត្រ៤សំដៅជំរុញកំណើនភ្ញៀវទេសចរនៅតំបន់នោះឡើងវិញ ។
លោករដ្ឋមន្ត្រីក្រសួងទេសចរណ៍ ថោង ខុន បានអះអាងថាការធ្លាក់ចុះចំនួនភ្ញៀវទេសចរបរទេស ជាពិសេសទេសចរចិន ក៏បានប៉ះពាល់ដល់កម្ពុជាផងដែរ ព្រោះទេសចរចិនឈរចំណាត់ថ្នាក់លេខ ១ ។ តួយ៉ាងក្នុងមួយឆ្នាំៗគឺមានទេសចរចិនប្រមាណ ១ លាននាក់បានមកទស្សនាខេត្តសៀមរាប ឬមានចំនួន២ លាននាក់ទូទាំងប្រទេស ។ លោក ថោង ខុន មានប្រសាសន៍បញ្ជាក់ថា «ចំនួនទេសចិនបានមកទស្សាននៅខេត្តសៀមរាបបានធ្លាក់ចុះ ៩ ភាគរយ ។ ក៏ប៉ុន្តែចង់ឲ្យបងប្អូនសម្លឹងឲ្យឃើញអំពីសភាពការណ៍រួម របស់សកលលោក ព្រោះអ្វីដែលប៉ះពាល់មិនមែនប៉ះពាល់តែកម្ពុជាទេ គឺប៉ះពាល់គ្រប់ ប្រទេសទាំងអស់ គ្រប់គោលដៅទាំងអស់នៅក្នុងអាស៊ាន នៅក្នុងអាស៊ី ក៏មានបញ្ហា នៃការថយចុះនៅសៀមរាប ព្រោះទេសចរចិនជាគោលដៅធំ » ។ តើផែនការយុទ្ធសាស្ត្រទាំង៤ មានអ្វីខ្លះ ហើយយុទ្ធសាស្ត្រនេះពិតជាអាចទាញកំណើនភ្ញៀវទេសចរបរទេសមកទស្សនាខេត្តសៀមរាបឡើងវិញ ឬយ៉ាងណា ?
សូមបញ្ជាក់ថា ការប្រកាសដាក់ចេញផែនការយុទ្ធសាស្ត្រជាចាំបាច់នេះត្រូវបានធ្វើ
ឡើងនាឱកាសកិច្ចប្រជុំលើកទី៣ របស់គណៈកម្មការអន្តរក្រសួងដើម្បីរៀបចំផែនការមេ
អភិវឌ្ឍន៍ទេសចរណ៍នៅខេត្តសៀមរាប នៅសណ្ឋាគារសុខាល័យ ខេត្តសៀមរាប នាថ្ងៃទី១៦ ខែកញ្ញា ឆ្នាំ២០១៩ ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងលោក សាយ សំអាល់ រដ្ឋមន្ត្រីក្រសួងបរិស្ថាន ព្រមទាំងថ្នាក់ដឹកនាំមួយចំនួន ដែលជាសមាជិកនៃ
គណៈកម្មការ អន្តរក្រសួង ។
លោក ថោង ខុន បានថ្លែងឲ្យដឹងថា អង្គរប្រជុំគណៈកម្មការ អន្តរក្រសួងបានប្រកាស ដាក់ចេញគម្រោងផែនការមេ សម្រាប់អភិវឌ្ឍន៍វិស័យទេសចរណ៍ ខេត្តសៀមរាប និងផែនការ សកម្មភាពការងារអនុវត្តចំពោះមុខ រយៈពេលខ្លី ឆ្នាំ២០១៩-២០២០ ក្រោមទិសស្លោក «ប្រែក្លាយបញ្ហាប្រឈមទៅជាឱកាស»។ លោករដ្ឋមន្ត្រីក្រសួងទេសចរណ៍បានបន្តថា ចំណែកផែនការយុទ្ធសាស្ត្រទាំង៤ ដែលនឹងជួយស្តារឡើងវិញនូវកំណើតភ្ញៀវទេសចរមកទស្សនាខេត្តសៀមរាបនោះ គឺរួមមាន៖ ១-ពិពិធកម្មផលិតផលទេសចរណ៍ថ្មី និងការពន្យារ ពេលស្នាក់នៅរបស់ភ្ញៀវទេសចរ ២-បង្កើតភាពប្រកួតប្រជែង ៣-បង្កើតការតភ្ជាប់ និង ៤-បង្កើតអត្តសញ្ញាណថ្មីនៃតំបន់ សៀមរាប។
ទន្ទឹមនោះគណៈកម្មការអន្តរក្រសួងក៏បានកំណត់យកតំបន់បឹងទន្លេសាប ភ្នំគូលែន ទីក្រុងសៀមរាប និងតំបន់ជុំវិញ ជាតំបន់ដែលត្រូវអភិវឌ្ឍន៍ទៅជាគោលដៅទេសចរណ៍ ដ៏ទាក់ទាញថ្មី ក្រៅពីប្រាសាទអង្គរផងដែរ ។ លោករដ្ឋមន្ត្រីបានបញ្ជាក់ថា ចំពោះផែនការអភិវឌ្ឍន៍ទេសចរណ៍នៅតំបន់បឹងទន្លេសាប គឺត្រូវ សិក្សាបង្កើតសកម្មភាព កម្សាន្តបន្ថែមលើបឹងទន្លេសាប ដូចជា សេវាស្នាក់នៅជាមួយប្រជាជននៅលើទឹក ឬនៅតាមភូមិមាត់ទឹក ការជិះរទេះគោក្របី ឬដើរកម្សាន្តតាមភូមិជាបឹងទន្លេសាបជាលក្ខណៈកញ្ចប់ ដែលអាចពន្យារពេលការស្នាក់ នៅរបស់ទេសចរណ៍។
បន្ថែមពីលើនេះ ក៏ត្រូវពង្រឹងគុណភាពសេវាកម្មនៅតាមមូលដ្ឋានអាជីវកម្មទេសចរណ៍ នៅក្នុង តំបន់នេះ។ ក្រៅពីនេះ ក៏មានគម្រោងរៀបចំរៀបចំជាភូមិទេសចរណ៍ធម្មជាតិ (Eco-village) ដែលមាន រចនាប័ទ្មខ្មែរជនបទស៊ីចង្វាក់គ្នាជាមួយភូមិធម្មជាតិនីមួយៗ ដោយមានការ វិនិយោគបដិភាគ កម្រិតណាមួយរបស់វិស័យសាធារណៈ រួមទាំងការកែលម្អផ្លូវទៅ កាន់កំពង់
ផែបឹងទន្លេសាប៖ កំពង់ភ្លុក កំពង់ឃ្លាំង មេជ្រៃ និងបឹងពារាំងថែមទៀត ។ លោករដ្ឋមន្ត្រីបានថ្លែងបន្តថាចំណែកនៅឧទ្យានជាតិគូលែនក៏ត្រូវរៀបចំផែនការមេអភិវឌ្ឍន៍ រមណីយដ្ឋានឧទ្យានភ្នំគូលែន ជាទេសចរណ៍បែបអេកូទេសចរណ៍ ទេសចរណ៍ផ្សងព្រេង និងទេសចរណ៍សាសនានិង រៀបចំជាខ្សែដំណើរកម្សាន្តជាលក្ខណៈ Trekking និង Hiking តាមកម្រិតខុសៗគ្នា។ ត្រូវបង្កើតជាមជ្ឈមណ្ឌលព័ត៌មានជីវចម្រុះក្នុងឧទ្យាន ដើម្បីផ្តល់ ព័ត៌មាន សេដ្ឋកិច្ច និងអប់រំពីជីវចម្រុះ និងបរិស្ថានរបស់ឧទ្យាន និងអាចបណ្តុះលក់ពូជផ្កា និងរុក្ខជាតិមួយចំនួនដាក់បង្ហាញ និងលក់ជូនភ្ញៀវ។
ទន្ទឹមនោះក៏ត្រូវរៀបចំសម្បទាទ្រទ្រងវិស័យទេសចរណ៍ ឱ្យមានលក្ខណៈជានិរន្តរ
ភាព។ បង្កើតសួនទេសចរណ៍នៅឧទ្យានភ្នំគូលែន។ ជំរុញការចូលរួមរបស់សហគមន៍ មូលដ្ឋានក្នុងវិស័យទេសចរណ៍។ បញ្ឈប់ការកាប់បំផ្លាញព្រៃឈើខុសច្បាប់ តាមរយៈការចង ក្រងជាសហគមន៍ទេសចរណ៍។ រៀបចំហេដ្ឋារចនាសម្ព័ន្ធមួយចំនួននៅតំបន់ទឹកធ្លាក់ធំ និងព្រះអង្គរធំ និងតំបន់ទេសចរសំខាន់ៗផ្សេងៗទៀត ឲ្យអាចទទួលទេសចរវ័យចំណាស់បាន ដោយរៀបចំឲ្យហេដ្ឋារចនាសម្ព័ន្ធស៊ីចង្វាក់គ្នាជាមួយធម្មជាតិ និងវប្បធម៌របស់ឧទ្យានភ្នំគូ លែន។
ក្រៅពីការងារខាងលើនោះយើងគម្បីត្រូវកែលម្អរចនាសម្ព័ន្ធផ្លូវទៅកាន់ប្រាសាទ និងរមណីយ ដ្ឋានចម្បងៗនៅក្នុងព្រៃ ដើម្បីធ្វើដំណើរមានភាពងាយស្រួល និងរយៈខ្លី។ បង្កើតព្រឹត្តការណ៍ សាសនាប្រចាំឆ្នាំ ដូចជា ទិវាពិសាខបូជាជាដើម និងជំរុញទេសចរសាសនាមកកាន់តំបន់ សក្ការៈនៅលើភ្នំគូលែន ។ ផ្តើមពីនោះ ក៏មានគម្រោងបង្កើត Siem Reap Pass t’mugsm ក្រោម យុទ្ធនាការ «SRP Beyond temple» ដែលតភ្ជាប់ការទស្សនាតំបន់ទេសចរណ៍សំខាន់ៗ ជាកញ្ចប់រួមមាន ៖ ប្រាសាទអង្គរ និងប្រាសាទក្រៅតំបន់អង្គរ , ប្រាសាទអង្គរ និងបឹង ទន្លេសាប , ប្រាសាទអង្គរ និងភ្នំគូលែន, ប្រាសាទអង្គរ និងទីតាំងទេសចរណ៍ក្នុងក្រុង និងប្រាសាទអង្គរ និងតំបន់គោលដៅ ទេសចរណ៍នៅខេត្តជុំវិញផងដែរ ។
លោក ថោង ខុន បានបញ្ជាក់ឲ្យដឹងដែរថា ដោយឡែកទីក្រុងសៀមរាបត្រូវរៀបចំ
បង្កើតវីថីម្ហូបអាហារ ដើម្បីជំរុញបង្កើនចំនួនទេសចរណ៍ ជាតិ និងអន្តរជាតិ។ ពិនិត្យលទ្ធភាព រៀបចំនៅកំណាត់ផ្លូវ៦០ម៉ែត្រ ក្បែររង្វង់មូលខ្យុងយូរ ឬកន្លែងណាមួយសមស្រប ដែលរដ្ឋ
បាលខេត្តសៀមរាបអាចផ្តល់បាន ដើម្បីធ្វើជាតំបន់ Smart Grand Siem Reap នាពេល
អនាគត ក្នុងគោលបំណងបង្វែរការអភិវឌ្ឍធំៗទៅកាន់ទីក្រុងថ្មីនេះ ហើយរក្សាអត្តសញ្ញាណ
ទីក្រុងចាស់មិនឱ្យបាត់ទិដ្ឋភាពជា «ទីក្រុងបេតិកភណ្ឌ»។ កែលម្អផ្លូវមាត់ស្ទឹងសៀមរាប ឱ្យក្លាយជាស្ទឹងទេសចរណ៍ប្រណីត (ចាប់ពីព្រះរាជដំណាក់ រហូតដល់បឹងទន្លេសាប)។ ពង្រឹងផ្លូវថ្មើរជើងឱ្យបានច្រើនជាងមុន ជាពិសេសផ្លូវថ្មើរជើងនា ពេលរាត្រី។ រៀបចំសណ្តាប់ធ្នាប់ និងសោភ័ណភាពចិញ្ចើមថ្នល់។ បន្តកែលម្អការគ្រប់គ្រង សំណល់រឹង និងរាវ។
ចំពោះតំបន់ប្រាសាទអង្គរក៏ត្រូវសិក្សានិងដាក់ឱ្យដំណើរការគម្រោងទស្សនាប្រាសាទអង្គរ ពេលរាត្រី។ ការបញ្ចាំងភ្លើង និងការទស្សនាក្រៅប្រាសាទដើម្បី នាពេលរាត្រី តែត្រូវការពារ សុវត្ថិភាពប្រាសាទ និងវត្ថុបុរាណ។ រៀបចំខ្សែទស្សនកិច្ចពិសេស Angkor Night សម្រាប់ ទស្សនាប្រាសាទមួយចំនួននាពេលរាត្រី។ ជំរុញការរៀបចំទេសចរជិះកង់ ដោយសារ ទេសចរណ៍ប្រភេទនេះកំពុងកើនឡើងយ៉ាងខ្លាំង និងនាំមកនូវតម្លៃបន្ថែមច្រើន។ លោករដ្ឋមន្ត្រីបានលើកឡើងថា ដើម្បីត្រៀមខ្លួនទទួលវត្តមានភ្ញៀវទេសចរ ដែលនឹងមានការកើនឡើងនាពេលខាងមុខនោះ គណៈកម្មការអន្តរក្រសួងនេះក៏មានគម្រោងសិក្សា បង្កើត ក្រុងសៀមរាបថ្មីមួយ ដែលមានការអនុញ្ញាតឱ្យមានការកសាងអគារទំនើបៗ និងត្រូវមាន អាកាសយានដ្ឋានអន្តរជាតិធំថ្មីនៅទីនោះផងដែរ។ ក្រុងសៀមរាបថ្មីនេះ ត្រូវបានបង្ហើបថា មានទីតាំងស្ថិតនៅទិសខាងកើតក្រុងសៀមរាបបច្ចុប្បន្ន មានចម្ងាយប្រមាណ៦០គីឡូ ម៉ែត្រ៕ កែសម្រួលដោយ ៖សុឃាក់
ចែករំលែកព័តមាននេះ