ខេត្តពោធិ៍សាត់ ៖ ផ្ទះចំនួន៣ខ្នងនៅភូមិក្រូចឆ្មារ ឃុំលាច ស្រុកភ្នំក្រវាញ ត្រូវអគ្គិភ័យលេបត្របាក់អស់ទាំងស្រុងសល់តែផេះផង់ កាលពីវេលាម៉ោង៣ និង៣០នាទីរសៀល ថ្ងៃទី២៧ មីនា ២០១៤ ដែលជំហានដំបូងសមត្ថកិច្ចសន្និដ្ឋានថា បណ្តាលមកពីទុស្សេខ្សែភ្លើង ខណៈពេលម្ចាស់ផ្ទះកើតហេតុមិននៅរវល់ទៅធ្វើម្ហូបការនៅឯចុងភូមិ។
ខេត្តពោធិ៍សាត់ ៖ ផ្ទះចំនួន៣ខ្នងនៅភូមិក្រូចឆ្មារ ឃុំលាច ស្រុកភ្នំក្រវាញ ត្រូវអគ្គិភ័យលេបត្របាក់អស់ទាំងស្រុងសល់តែផេះផង់ កាលពីវេលាម៉ោង៣ និង៣០នាទីរសៀល ថ្ងៃទី២៧ មីនា ២០១៤ ដែលជំហានដំបូងសមត្ថកិច្ចសន្និដ្ឋានថា បណ្តាលមកពីទុស្សេខ្សែភ្លើង ខណៈពេលម្ចាស់ផ្ទះកើតហេតុមិននៅរវល់ទៅធ្វើម្ហូបការនៅឯចុងភូមិ។
លោកវរសេនីយ៍ត្រី វង សាវេត អធិការនគរបាលស្រុកភ្នំក្រវាញបានឱ្យដឹងថា ផ្ទះទីមួយថ្មក្រោមឈើលើ(នៅកណ្តាលគេ) ក្រាលក្តារ ជញ្ជាំងក្តារ ប្រក់ក្បឿង ម្ចាស់ផ្ទះឈ្មោះសយ ហាង ហៅគក់ ជាចុងភៅធ្វើម្ហូបការ។ ផ្ទះទី២ ថ្មក្រោមឈើលើដូចគ្នា(នៅខាងត្បូង) ក្រាលក្តារ ជញ្ជាំងក្តារ ប្រក់ក្បឿង ម្ចាស់ផ្ទះឈ្មោះព្រំ ឆោមវិបុល ជាមន្ត្រីនគរបាលខេត្តពោធិ៍សាត់ និងផ្ទះទី៣(នៅខាងជើង) ធ្វើអំពីឈើប្រក់ស័ង្កសីម្ចាស់ផ្ទះឈ្មោះយ៉ែម មុន្នី ជាប្រជាពលរដ្ឋរស់នៅភូមិក្រូចឆ្មារ។
បើតាមការស្រាវជ្រាវអគ្គិភ័យនេះចាប់ផ្តើមឆេះចេញពីផ្ទះចុងភៅម្ហូបការដែលនៅកណ្តាលគេ ខណៈម្ចាស់មិននៅផ្ទះរវល់ទៅធ្វើចុងភៅម្ហូបការគេនៅចុងភូមិ បន្ទាប់មកទើបរាលទៅឆេះផ្ទះ២ដែលនៅជាប់ជញ្ជាំងខាងត្បូង និងខាងជើងទៀត។ ពេលនោះអ្នកជិតខាងបាននាំគ្នាជួយដងទឹកពន្លត់ និងរាយការណ៍ប្រាប់សមត្ថកិច្ចបញ្ជូនរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តចំនួន២គ្រឿងមកជួយអន្តរាគមន៍ដោយប្រើប្រាស់ទឹកអស់៦ស៊ីទែន ព្រមទាំងមានរថយន្តដឹកទឹកលក់ឯកជនមួយចំនួនទៀតទើបភ្លើងរលត់ទាំងស្រុង មិនរាលដាលដល់ផ្ទះជិតខាងបន្តទៀត។
ពាក់ព័ន្ធនឹងគ្រោះអគ្គិភ័យនេះផ្ទះចុងភៅធ្វើម្ហូបការមិនបានយកទ្រព្យសម្បត្តិចេញទាន់ទេ គឺឆេះអស់តែម្តង ចំណែក២ផ្ទះទៀតយកអីវ៉ាន់បានមួយចំនួន៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ