ខេត្តបាត់ដំបង ៖ លោកជួប ណូ មេបញ្ជាការមូលដ្ឋានកងរាជអាវុធហត្ថស្រុកសំឡូត រងការចោទប្រកាន់ថា បានប្រើប្រាស់វត្ថុរឹងចាក់ភ្នែកមេបញ្ជាការរងរបស់ខ្លួនម្នាក់ បណ្ដាលឱ្យរងបួសយ៉ាងធ្ងន់ធ្ងរ ដោយសាររឿងបាត់ឌីណាម៉ូរថយន្តបាកុង ។…
ខេត្តបាត់ដំបង ៖ លោកជួប ណូ មេបញ្ជាការមូលដ្ឋានកងរាជអាវុធហត្ថស្រុកសំឡូត រងការចោទប្រកាន់
ថា បានប្រើប្រាស់វត្ថុរឹងចាក់ភ្នែកមេបញ្ជាការរងរបស់ខ្លួនម្នាក់ បណ្ដាលឱ្យរងបួសយ៉ាងធ្ងន់ធ្ងរ ដោយសាររឿងបាត់ឌីណាម៉ូរថយន្តបាកុង ។ នេះបើតាមប្រភពពីអង្គភាពដែលបានទម្លាយឲ្យដឹង នៅព្រឹកថ្ងៃទី១៧ កញ្ញា ដែលរឿងរ៉ាវនេះត្រូវគេបិទបាំងស្ងាត់ដូចចោរលួចសេះ ។
បើតាមប្រភពព័ត៌មានដែលកោះសន្តិភាពទទួលបានពីអំពើហិង្សា ដែលបង្កឡើងដោយមេបញ្ជាការមូលដ្ឋានកងរាជអាវុធហត្ថស្រុកសំឡូត ឈ្មោះជួប ណូ នេះបានកើតឡើងកាលពីយប់ថ្ងៃទី១៣ កញ្ញា នៅក្នុងអង្គភាពរបស់ខ្លួនតែម្ដង ។ លោកជួប ណូ បានរងការប្ដឹងចោទប្រកាន់ថា ទំនងបានប្រើប្រាស់សោររថយន្តរបស់ខ្លួនចាក់ទៅលើភ្នែកខាងឆ្វេងមេបញ្ជាការរងរបស់ខ្លួនឈ្មោះឈឿន សុផាត បណ្ដាលឲ្យរងរបួសយ៉ាងធ្ងន់ធ្ងរ ក្រោយពីផ្ទុះជម្លោះជាមួយគ្នារឿងបាត់ឌីណាម៉ូរថយន្តបាកុង ដែលរឹបអូសបានពីបទល្មើសព្រៃឈើកន្លងទៅនេះ ។
មន្ត្រីកងរាជអាវុធហត្ថបាននិយាយថា នៅយប់កើតហេតុនោះ លោកជួប ណូ បានចោទលោកឈឿង
សុផាត ថា បានលួចយកឌីណាម៉ូរថយន្តបាកុង ក្នុងអំឡុងពេលលោកឈឿន សុផាត រួមជាមួយមន្ត្រីក្នុងអង្គភាពប៉ុន្មាននាក់ទៀត ត្រូវទទួលបទបញ្ជាឲ្យដេកយាមរថយន្តបាកុងចំនួន១០គ្រឿង ដែលរឹបអូសពីបទល្មើសព្រៃឈើ ។ ប៉ុន្តែលោកឈឿន សុផាត បានបដិសេធចំពោះការចោទប្រកាន់នេះ ។ ប្រភពបានឲ្យដឹងទៀតថា លោកមេបញ្ជាការរូបនេះអះអាងថា ខ្លួនមានសាក្សីទៀតផង តែមិនបានបង្ហាញទេ ខណ:លោកមេបញ្ជាការរង(ជនរងគ្រោះ)បានទាមទាឲ្យបង្ហាញ ហើយថែមទាំងបបូលគ្នាស្បថស្បែរទៀតផង។
បើតាមមន្ត្រីក្រោមឱវាទបានបញ្ជាក់ថា ជម្លោះរវាងលោកមេបញ្ជាការ និងលោកមេបញ្ជាការរង ដែលនៅក្នុងអង្គភាពជាមួយគ្នានេះ ហាក់ប្រឈមមុខគ្នាយ៉ាងខ្លាំងផ្អើលពេញអង្គភាព តែបានស្ងប់ស្ងាត់ ក្រោយពីតឹងសរសៃ.កដាក់គ្នាជិតកន្លះម៉ោង ។ ប៉ុន្តែនៅយប់ជ្រៅបន្តិច ខណ:ដែលលោកឈឿន សុផាត កំពុងដេកលក់ ស្រាប់តែលោកជួប ណូ មិនដឹងមកពីណា ហើយទំនងជាស្រវឹងផង ក៏ដើរទៅចាក់ភ្នែកលោកឈឿន សុផាត បង្កឲ្យមានការភ្ញាក់ផ្អើលជាថ្មីពេញអង្គភាពតែម្ដង។
ពាក់ព័ន្ធនឹងអំពើហិង្សាដែលបង្កដោយមេបញ្ជាការចាក់ភ្នែកមេបញ្ជាការរងកងរាជហត្ថស្រុកសំឡូត ស្ទើរខ្វាក់ម្ខាងនេះ កោះសន្តិភាពមិនទាន់អាចសុំការបំភ្លឺពីលោកមាស សុវណ្ណ មេបញ្ជាការកងរាជអាវុធហត្ថខេត្តបានទេ នៅរសៀលថ្ងៃទី១៧ កញ្ញា ខណ:លោកជួប ណូ អះអាងថា កំពុងជាប់រវល់ចែកអំណោយដល់ពលរដ្ឋ ដែលរងគ្រោះទឹកជំនន់នៅស្រុកសំឡូត ។
ដោយឡែក លោកឈឿន សុផាត ដែលរងរបួសភ្នែកឆ្វេងម្ខាង ដោយសារស្នាដៃលោកមេបញ្ជាការរបស់ខ្លួន ក៏មិនអាចសុំការបំភ្លឺបន្ថែមអំពីបញ្ហានេះបានដែរ ។ ប៉ុន្តែលោកមេបញ្ជាការរងរូបនេះ ត្រូវបានមន្ត្រីក្នុងអង្គភាពស្រង់សំដីថា ក្រោយពេលកើតហេតុ លោកបានដាក់ពាក្យបណ្ដឹងទៅការិយាល័យជំនាញ នៅបញ្ជាការខេត្តរួចហើយ តែរហូតដល់ពេលនេះ មិនទាន់ឃើញលោកមេបញ្ជាការខេត្ត កំរើកហៅសួរនាំនៅឡើយទេ ។
ប៉ុន្តែលោកឈឿន សុផាត បាននិយាយប្រាប់មិត្តភក្ដិរួមការងារក្នុងអង្គភាពថា បើរឿងនេះមេ.. មិនអាចដោះស្រាយ ឬរកយុត្តិធម៌ឲ្យខ្លួនទេ ខ្លួននឹងប្ដឹងបន្តទៅមេបញ្ជាការ លើផ្ទៃប្រទេសឲ្យជួយដោះស្រាយហើយ ។ ព្រោះនេះមិនមែនលើកទៅមួយទេ ដែលលោកជួប ណូ ធ្វើនូវទង្វើមិនគប្បីមកលើខ្លួន។ (សម្រួលដោយ៖ ស្រីណា)
ចែករំលែកព័តមាននេះ