ខេត្តតាកែវ ៖ បន្ទាប់ពីចេញផ្សាយព័ត៌មានស្តីពីការឆបោករបស់នាយកសាលាអន្តរជាតិអាមេរិកាំងហូមប្រមូលលុយពីសិស្សបង់ថ្លៃសិក្សារត់គេចខ្លួនបាត់នោះ លោកនាយកសាលាឈ្មោះជាវ ប៊ុនថន បានប្រាប់អ្នកយកព័ត៌មានតាមទូរស័ព្ទនៅថ្ងៃទី២៦ មីនានេះថា រូបគេមិនបានឆបោកដូចពាក្យចោទប្រកាន់ទេ ហើយចំពោះការបើកសាលានៅឃុំព្រៃល្វា ស្រុកព្រៃកប្បាសនោះ សិស្សមានតែជាង២០០នាក់ មិនដូចការចេញផ្សាយថា ជាង៣០០នាក់ទេ ហើយមិនគួរណាសិស្ស និងអាណាព្យាបាលសិស្សប្តឹងរូបគេថា ឆបោកដែរ តាមពិតគឺសាលាក្ស័យធន ហើយមិនទាន់បានជូនដំណឹងដល់សិស្ស និងប្រជាពលរដ្ឋ នៅថ្ងៃណាមួយគេនឹងចូលខ្លួនមកដោះស្រាយដល់កន្លែងប៉ូលិសស្រុកព្រៃកប្បាស រួចនាំមេធាវីការពារក្តីមកជាមួយទៀត។
លោកនាយកបានប្រាប់ទៀតថា ចំពោះសាខានៅស្រុកអង្គរបុរីជាក្រុមហ៊ុនតែមួយ នៅពេលក្ស័យធននាយកអត់នៅ គ្រប់អាជ្ញាធរ និងសមត្ថកិច្ចទាំងអស់គ្មានសិទ្ធិទាល់តែសោះក្នុងការបិទសាលារបស់គេ បើហ៊ានបិទ គ្រប់ការខាតបង់ទាំងអស់អាជ្ញាធរជាអ្នកទទួលខុសត្រូវ។
ទាក់ទិនបញ្ហានេះ លោកឃុន បូរ អភិបាលស្រុកអង្គរបុរីបានប្រាប់ថា អាជ្ញាធរអត់បិទសាលាទេ តែក៏មិនអនុញ្ញាតឱ្យសិស្សថ្មីចូលរៀនដែរ គឺឱ្យរៀនតែសិស្សចាស់ៗ និងសូមផ្តាំទៅលោកនាយកសាលាផងថា ការរត់គេចនេះមិនមែនជាដំណោះស្រាយទេ សំខាន់ការនិយាយដោះស្រាយគ្នាចំពោះមុខច្បាប់ទើបហៅថា ជាអ្នកចេះដឹងពីច្បាប់ពិតប្រាកដ។
គួររំលឹកផងដែរថា កាលពីថ្ងៃទី២៤ មីនា ២០១៤ សិស្ស និងអាណាព្យាបាលរស់នៅក្នុងទីប្រជុំជនស្រុកព្រៃកប្បាស បានដាក់ពាក្យបណ្តឹងមកអធិការដ្ឋាននគរបាលស្រុក ដើម្បីឱ្យជួយដោះស្រាយ និងរកយុត្តិធម៌ ក្រោយពីសាលាឯកជនមួយឈ្មោះសាលាភាសាអង់គ្លេស-ខ្មែរអាមេរិកាំងហូម បានឃោសនាដល់កូនចៅប្រជាពលរដ្ឋនៅតាមភូមិឱ្យចូលរៀនដោយបង់លុយ លុះពេលទទួលបានលុយគ្រប់គ្រាន់ហើយ នាយកសាលានេះក៏វេចលុយរាប់ម៉ឺនដុល្លាររត់គេចខ្លួនបាត់ សូម្បីតែថ្លៃជួលផ្ទះ ទឹក ភ្លើង ក៏អត់ទាន់បង់ដែរ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ