រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋស្ត្រីបានស្នើឲ្យធនាគារពិភពលោក ពិនិត្យមើលលទ្ធភាពចូលរួមនៅក្នុងដាក់កម្មវិធីកសាងផ្លូវ កែប្រែផ្លូវជនបទពីដីក្រហមទៅជាផ្លូវកៅស៊ូពីរជាន់វិញដោយសារមូលហេតុថា ធនាគារពិភពលោកកំពុងតែចូលរួមយ៉ាងសកម្មក្នុងការជំរុញការអភិវឌ្ឍតំបន់ជនបទនោះស្រាប់ ។
ការស្នើរបស់ប្រមុខរាជរដ្ឋាភិបាលនេះ ខណៈដែលអនុញ្ញាតឲ្យលោកស្រី វិចតូរៀ ខ្វាខ្វា (Victoria Kwakwa) អនុប្រធានធនគារពិភពលោក (World Bank) ទទួលបន្ទុកតំបន់អាស៊ីខាងកើត និងប៉ាស៊ីហ្វិកជួបពិភាក្សាការងារនាព្រឹក ថ្ងៃទី១៦ ខែកញ្ញានៅវិមានសន្តិភាព ។ ក្នុងជំនួបលោកស្រី Victoria Kwakwa បានលើកឡើងថា លោកស្រីធ្លាប់បានមកកម្ពុជា កាលពី៣ឆ្នាំមុន ហើយពេលនេះបានឃើញកម្ពុជាកំពុងរីកចម្រើនយ៉ាងខ្លាំង ដែលគួរអោយកោតសរសើរខ្លាំងបំផុតជាមួយកំណើនសេដ្ឋកិច្ចជាមធ្យមពី០%ទៅ៨% ហើយអត្រាកាត់បន្ថយភាពក្រីក្រ និងអត្រាស្លាប់របស់ទារកនៅពេលកើតក៏បានថយចុះ ។ នេះជាជោគជ័យបញ្ជាក់ថា កម្ពុជាកំពុងតែបោះជំហានលើផ្លូវមួយត្រឹមត្រូវ ។
ក្នុងនាមធនាគារពិភពលោក លោកជំទាវបានសម្តែងនូវការអបអរសាទរចំពោះជោគជ័យដែលកម្ពុជាទទួលបាន ។ លោកស្រីបានបន្តថា កន្លងមកនេះធនាគារពិភពលោកបានធ្វើការយ៉ាងច្រើនជាមួយនឹងសហគមន៍ផ្សេងៗដែលសហគមន៍ទាំងនោះប្រជាពលរដ្ឋដែលទទួលបានដីសម្បទានសង្គមកិច្ចពីរាជរដ្ឋាភិបាលហើយ គឺបានទទួលនៅធ្វើការដាំដុះបានលទ្ធផលជាទីគាប់ចិត្តជាទីមោទនៈ ។
ក្នុងន័យនេះលោកស្រីចង់បញ្ជាក់ថា ដីសង្គមកិច្ចដែលរដ្ឋាភិបាលបានចែកជូនប្រជាពលរដ្ឋធ្វើការដាំដុះដំណាំកសិកម្មដែលបានជួយលើកស្ទួយជីវភាពរស់នៅរបស់ប្រជាពលរដ្ឋកាន់តែប្រសើរឡើងដែលកូនចៅពួកគេទទួលបាននូវការអប់រំ និងសេវាសុខភាពប្រកបដោយគុណភាពផងដែរ ។ លោកស្រី Victoria Kwakwa បាលលើកទឹកចិត្តដល់រាជរដ្ឋាភិបាល និងបានវាយតម្លៃខ្ពស់ ចំពោះកិច្ចខិតខំប្រឹងប្រែងរបស់សម្តេចប្រមុខដឹកនាំ ។ ទន្ទឹមនឹងនេះ លោកស្រីក៏បានលើកឡើងពីកិច្ចសហប្រតិបត្តិការរវាងធនាគារពិភពលោក និងរដ្ឋបាលរបស់រាជរដ្ឋាភិបាលកម្ពុជាក្នុងនោះ គឺការចូលរួមរបស់ធនាគារពិភពលោកនៅក្នុងវិស័យអភិវឌ្ឍធនធានមនុស្សក៏ដូចជា ក្នុងវិស័យកសិកម្មផងដែរ ដើម្បីជួយជំរុញការបង្កើនទិន្នផល និងការនាំចេញរបស់កសិផលកម្ពុជា ។ ជាពិសេសលោកស្រី Victoria Kwakwa បានមានប្រសាសន៍ថា បន្ទាប់ពីការវិលត្រឡប់របស់ធនាគារពិភពលោកមកកម្ពុជាពេលនេះបង្ហាញជាដៃគូដ៏ល្អប្រកបដោយជំនឿជឿជាក់ និងគ្នាទៅវិញទៅមក ដើម្បីរួមចំណែកជំរុញការអភិវឌ្ឍន៍ប្រទេសជាតិអោយកាន់តែរីកចម្រើនខ្លាំងឡើង ។
សម្ដេចតេជោ ហ៊ុន សែន នាយករដ្ឋមន្ត្រី បានថ្លែងអំណរគុណដល់លោកស្រី Victoria Kwakwa ដែលគាំទ្រ និងមានជំនឿក្នុងការចាប់ដៃគូជាមួយកម្ពុជាជំរុញការកសាងប្រទេសជាតិឲ្យរីកចម្រើនទៅមុខ ។ សម្តេចតេជោបន្តថា នៅកម្ពុជាការផ្តល់ដីសម្បទានសង្គមកិច្ច គឺជានយោបាយអាទិភាពរបស់រាជរដ្ឋាភិបាល ។ រយៈពេល៧ឆ្នាំហើយដែលរាជរដ្ឋាភិបាលមិនឲ្យដីសម្បទានសេដ្ឋកិច្ចទៅក្រុមហ៊ុនឯកជនទៀតទេ ហើយក៏បានកាត់យកមកវិញនូវដីសម្បទានសេដ្ឋកិច្ចណាដែលក្រុមហ៊ុនមិនអនុវត្តតាមគោលការណ៍ ឬក៏មិនគោរពតាមច្បាប់របស់រាជរដ្ឋាភិបាល ។ ដីសម្បាទានសេដ្ឋកិច្ចមួយចំនួនក៏បានបែងចែកផ្តល់ជូនទៅដល់ប្រជាពលរដ្ឋដែលគ្មានដីប្រើប្រាស់ សម្រាប់បង្កបង្កើនផល ដើម្បីពលរដ្ឋមានជីវភាពរស់នៅកាន់តែល្អប្រសើរ ។
ទន្ទឹមនឹងនេះសម្ដេចតេជោនាយករដ្ឋមន្ត្រីក៏បានបញ្ជាក់ផងដែរថា ដីសម្បទានសង្គមកិច្ចត្រូវការតភ្ជាប់ជាមួយនឹងវិស័យកសិកម្ម ។ ក្នុងន័យនេះសម្តេចតេជោក៏បានលើកទឹកចិត្ត និងជំរុញឲ្យធនាគារពិភពលោកចូលរួមយ៉ាងសកម្មថែមទៀតជាមួយនឹងប្រជាពលរដ្ឋកម្ពុជាដែលទទួលបានដីសង្គមកិច្ចពីរាជរដ្ឋាភិបាល ដើម្បីជួយឲ្យពួកគាត់ទទួលបាននៅការដាំដុះនឹងទទួលផលបានល្អ ដើម្បីលើកស្ទួយជីវភាពគ្រួសារអោយបានល្អប្រសើរ ។ ការចូលរួមរបស់ធនាគារពិភពលោកនឹងជួយដល់ការកើនឡើងនៃគម្របព្រៃឈើឡើងវិញនៅកម្ពុជា ។
នៅក្នុងឱកាសនោះដែរ សម្ដេចតេ ជោក៏បានលើកឡើងអំពីតម្រូវការធនធានមនុស្សនៅក្នុងប្រទេស ។ សម្តេចតេជោបានស្នើសុំធនាគារពិភពលោកពិនិត្យបន្តសហការជួយដល់កម្ពុជាលើធនធានការអភិវឌ្ឍធនធានមនុស្ស ។ នៅក្នុងកិច្ចពិភាក្សានោះសម្ដេចតេជោក៏បានលើកឡើងផងដែរ អំពីសារៈសំខាន់នៃហេដ្ឋារចនាសម្ព័ន្ធទាំងនៅក្នុងទីក្រុង និងតាមជនបទ ។ កន្លងមកហេដ្ឋារចនាសម្ព័ន្ធនៅទីជនបទ គឺបានកំពុងតែអភិវឌ្ឍ ប៉ុន្តែត្រូវការធនធានច្រើន សម្រាប់អភិវឌ្ឍន៍ហេដ្ឋារចនាសម្ព័ន្ធនេះ ។
ក្នុងន័យនេះសម្តេចតេជោបានលើកឡើងថា កន្លងមកធនាគារអភិវឌ្ឍន៍អាស៊ី និងកូរ៉េបានដើររួមគ្នាដែលកសាងផ្លូវពីផ្លូវដីក្រហមទៅកាន់ផ្លូវកៅស៊ូពីរជាន់ (DBST) ហើយឥឡូវនេះ គឺមានគុណភាពល្អសម្រាប់តំបន់ដាច់ស្រយាលតំបន់ជនបទ ។ មុននឹងបញ្ជប់ការពិភាក្សា លោកស្រី Victoria Kwakwa បានសន្យានឹងពង្រឹងកិច្ចសហការជាមួយសម្តេចតេជោ ហ៊ុន សែន នាយករដ្ឋមន្ត្រីក្នុងនាមជាដៃគូដែលជួយគ្នា និងស្តាប់យោបលគ្នាទៅវិញទៅមក ដើម្បីជំរុញការអភិវឌ្ឍន៍កម្ពុជាឲ្យក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ខាងមុខ ៕ កែសម្រួលដោយ ៖សុឃាក់
ចែករំលែកព័តមាននេះ