រាជធានីភ្នំពេញ ៖ ជាតួលេខមួយថ្មីទៀតហើយ សម្រាប់ការចរចាប្រាក់ឈ្នួលអប្បរមាកម្មករនិយោជកសម្លៀកបំពាក់ និងស្បែកជើងឆ្នាំ២០២០ ដោយភាគីសហជីពបានទំលាក់តួលេខាចំនួន១៩៧ដុល្លារ បន្ទាប់ពីដាក់ចំនួន១៩៩ដុល្លារ តែភាគីចរចាជាមួយភាគីនិយោជកដោយភាគីនិយោជកតំឡើងតួលេខ១៨៤.៥ដុល្លារ ។
យោងតាមសេចក្តីប្រកាសព័ត៌មានរបស់ក្រសួងការងារ និងបណ្តុះបណ្តាលវិជ្ជាជីវៈចេញផ្សាយ កាលពីថ្ងៃទី១២ កញ្ញាកន្លងមក បានឲ្យដឹងថា លទ្ធផលនៃកិច្ចប្រជុំក្រុមប្រឹក្សាជាតិប្រាក់ឈ្នួលអប្បបរមាលើកទី៤ ក្រសួងការងារ និងបណ្តុះបណ្តាលវិជ្ជាជីវៈ ដើម្បីចរចាកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ២០២០ ក្រោយពីភាគីកម្មករនិយោជិត និងភាគីនិយោជកបានប្រជុំពិភាក្សាផ្ទៃក្នុងរបស់ខ្លួនចំនួន៣ដងមកហើយ ។
ប្រភពបានបន្តថា ភាគីនីមួយៗបានបន្តប្រជុំពិភាក្សាយ៉ាងផុសផុល និងបានបង្ហាញនូវគោលជំហររបស់ខ្លួនជូនអង្គប្រជុំដោយភាគីកម្មករនិយោជិតបានបន្ថយពីតួលេខ១៩៩ដុល្លារអាមេរិក មកត្រឹម១៩៧ដុល្លារអាមេរិក និងភាគីនិយោជកបានដំឡើងពីតួលេខ១៨៤ដុល្លារអាមេរិកទៅ ១៨៤,៥ដុល្លារអាមេរិក ជាតួលេខប្រាក់ឈ្នួលអប្បបរមា ផ្នែកវាយនភណ្ឌកាត់ដេរ និងផលិតស្បែកជើងសម្រាប់ឆ្នាំ២០២០ ។ ភាគីនីមួយៗបានឯកភាពបន្តប្រជុំពិភាក្សានៅរសៀលថ្ងៃទី១៨ ខែកញ្ញានេះ វេលាម៉ោង៣រសៀល ។
សូមជម្រាបថា ការចរចាប្រាក់ឈ្នួលកម្មករសម្រាប់ឆ្នាំ២០១៩នេះ ភាគីរដ្ឋាភិបាល គឺជាអ្នកសម្របសម្រួលដោយបានយករបាយការណ៍ផ្សេងៗមកបង្ហាញដល់ភាគីនិយោជក និងភាគី សហជីព ក្នុងការវិភាគលើរបាយការណ៍ ។
គួរឮកថាក្រសួងការងារបានកំណត់ប្រាក់ឈ្នួលឲ្យកម្មករសម្រាប់ឆ្នាំ២០១៩ គឺ១៧៧ដុល្លារ ហើយ សម្តេចតេជោ ហ៊ុន សែន យកថវិកាជាតិបន្ថែមទៀត៥ដុល្លារទៀត ។ ដូច្នេះប្រាក់ឈ្នួល កម្មករសម្រាប់ឆ្នាំ២០១៩ គឺ១៨២ដុល្លារ និងត្រូវបើកជា២ដងក្នុងមួយខែ ។ ប្រាក់ឈ្នួលអប្បបរមា ក្នុងឆ្នាំ២០១៨នេះ គឺ១៧០ដុល្លារក្នុងមួយខែ ៕ កែសម្រួលដោយ ៖ សុឃាក់
ចែករំលែកព័តមាននេះ