ខេត្តកំពង់ឆ្នាំង ៖ ស្ថិតក្នុងខ្ទមប្រក់ស័ង្កសីគ្មានជញ្ជាំងដែលគ្រូខ្មែរធ្វើសម្រាប់អ្នកជំងឺស្នាក់នៅ ក្រុមគ្រួសារនាងក្រមុំរងគ្រោះបានលើកដៃសំពះសុំក្តីមេត្តាពីសប្បុរសជនគ្រប់មជ្ឈដ្ឋានទីជិតឆ្ងាយ សូមជួយដល់ពួកគាត់ផង ខណៈពួកគាត់ជាឪពុក ម្តាយលក់គោ ក្របី និងស្រូវអស់ពីខ្លួនដើម្បីយកប្រាក់បង់ថ្លៃព្យាបាលជំងឺកូនស្រីក្រមុំរបស់គាត់ដែលរងគ្រោះដោយសារបាក់ផ្ទះសង្កត់ពីលើបាក់ឆ្អឹងខ្នងសម្រាកព្យាបាលនៅមន្ទីរពេទ្យក្រុងភ្នំពេញជាង១ខែអស់ប្រាក់ជាង៣ពាន់ដុល្លារហើយមិនជា ពេលនេះដោយសារតែអស់ទ្រព្យពីខ្លួន និងទាល់តម្រិះទើបងាកមកឱ្យគ្រូខ្មែរព្យាបាលវិញ ។
បុរសជាឪពុកនារីរងគ្រោះបានឱ្យដឹងថា កូនស្រីរបស់គាត់ឈ្មោះភី សុជីន អាយុ២១ឆ្នាំ ជាកូនទី៥ក្នុងចំណោមកូន៧នាក់ ពួកគាត់មានទីលំនៅភូមិត្រពាំងម្លូ ឃុំក្រាំងស្គា ស្រុកទឹកផុស។
បុរសរូបនោះបានរំឭកឱ្យដឹងថា កាលពីថ្ងៃទី១០ កុម្ភៈ ២០១៤ កូនស្រីរបស់គាត់បានទៅជួយវេចនំក្នុងពិធីមង្គលការគេក្នុងភូមិជាមួយគ្នា។ ពេលនោះកូនស្រីគាត់អង្គុយវេចនំនៅក្រោមផ្ទះថ្មីដែលគេតពីផ្ទះចាស់ធ្វើបណ្តោះអាសន្នសម្រាប់ដាក់សម្ភារមង្គលការមានទឹកក្រូច ស្រាបៀរ អង្គរ និងសម្ភារជាច្រើនទៀត។ ស្រាប់តែនៅម៉ោងប្រហែលជាង៣រសៀលមានមនុស្សច្រើននាក់បានឡើងលើផ្ទះនោះធ្វើឱ្យទ្រទម្ងន់លែងបានក៏បាក់សង្កត់មកលើកូនស្រីរបស់គាត់ និងមនុស្សមួយចំនួនទៀតបណ្តាលឱ្យបាក់គ្រែរបួសមនុស្សដែលអង្គុយលើគ្រែនោះគ្រប់គ្នា ចំណែកកូនស្រីគាត់ត្រូវរនូតផ្ទះបាក់ចំឆ្អឹងខ្នងបាក់ជា២កំណាត់។
ក្រោយកើតហេតុគាត់បានដឹកកូនស្រីមកសង្គ្រោះនៅមន្ទីរពេទ្យខេត្ត ហើយបានបន្តដល់មន្ទីរពេទ្យរាជធានីភ្នំពេញ ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ