រាជធានីភ្នំពេញ ៖ លោក អ្នកនាងប្រាកដ ជាធ្លាប់ទស្សនាកម្មវិធី«ស៊ីធីអិនប៉ុស្តិ៍លេខ២១»របស់ស្ថានីយទូរទស្សន៍ស៊ីធីអិន ដែលមានអ្នកនាងយុគ ចិន្តា ជាអ្នកគ្រប់គ្រង និងជាពិធីការិនី។ កម្មវិធីនេះមានប្រជាប្រិយភាពគួរសមជាយូរមកហើយ ។ កោះសន្តិភាពសូមបង្ហាញជូនអ្នកនាងឃុល ទិត្យចិន្តា ជាជំនួយការកម្មវិធីស៊ីធីអិនប៉ុស្តិ៍លេខ២១ ដែលជាផ្នែកមួយជួយឱ្យកម្មវិធីនេះមានប្រជាប្រិយភាព។
អ្នកនាងឃុល ទិត្យចិន្តា ហៅមុំ ចូលរៀននៅសាកលវិទ្យាល័យភូមិន្ទវិចិត្រសិល្បៈនាឆ្នាំ១៩៩៩ ផ្នែកល្ខោននិយាយ ។ បន្ទាប់ពីចប់ថ្នាក់វិទ្យាល័យនាងចូលរៀនបន្តផ្នែកនិពន្ធ និងដឹកនាំរឿងល្ខោនសម្តែងនៅលើឆាកទៀត ។ អ្នកនាងឃុល ទិត្យចិន្តា បានសិក្សាផ្នែកនេះ ៤ឆ្នាំចាប់តាំងពីឆ្នាំ២០០១ដល់ឆ្នាំ២០០៥ ។
ជិតដល់ថ្ងៃបញ្ចប់ការសិក្សា ស្រាប់តែអ្នកនាងឃុល ទិត្យចិន្តា មានឱកាសជាប់ជម្រើសទៅអាមេរិកធ្វើជាជំនួយការអ្នកដឹកនាំរឿង ល្ខោន ។ ការជ្រើសរើសនោះ អ្នកគ្រូឱ្យសិស្សទាំងអស់និពន្ធសាច់រឿងរយៈពេល៥នាទីស្មើ៥ទំព័រ ។ នាងបានសរសេរជាសាច់រឿងមួយមានឈ្មោះថា «ឥទ្ធិពលនៃសុបិន» និយាយពីគ្រួសារមួយដែលប្តីគិតតែពីផឹកស្រា ប្រើអំពើហិង្សាលើភរិយាគ្មានស្វាង និងមិនជួយធ្វើការផ្ទះ។ លុះថ្ងៃមួយបុរសប្រមឹកសុបិនឃើញថា ព្រះសង្ឃមកទូន្មានខ្លួនថា អ្នកឯងមិនត្រូវវាយធ្វើបាបប្រពន្ធកូនទេ ព្រោះធ្វើបែបនេះគ្មានសេចក្តីសុខ ។ ជាប្តី ជាឪពុកគេត្រូវតែផ្តល់សេចក្តីសុខដល់គ្រួសារ ។ ដោយសារតែឥទ្ធិពលដំបូន្មាននោះ ធ្វើឱ្យបុរសជាប្តីភ្ញាក់ខ្លួនកែប្រែខ្លួនវិញ ។
នៅអាមេរិកអ្នកនាងចិន្តា បានរៀនពីការដំទ្បើងល្ខោន ដែលត្រូវមានតាំងពីអ្នកនិពន្ធ តាំងពីអ្នកដឹកនាំ តាំងពីអ្នករៀបចំឆាក និង
ភ្លើង ។ នាងបានមើលពីការអភិវឌ្ឍសិល្បៈស្រុកគេតាំងពីសាច់រឿងតូចដល់ធំ ដោយគេចំណាយលុយសម្រាប់ឱ្យនាងទៅទស្សនាល្ខោន ។ គេឱ្យនាងមើលដើម្បីមានគំនិតថ្មីមកប្រាប់កូនសិស្សក្នុងស្រុកខ្មែរ ឬមានគំនិតក្នុងការដំទ្បើងសាច់រឿងនៅស្រុកខ្មែរឱ្យបានជោគជ័យ ។ នៅទីបំផុតនាងបានទទួលគំនិត ថ្មីៗពីល្ខោននិយាយលើឆាក ។
ក្នុងនាមជាកូនស្រីម្នាក់ក្នុងត្រកូលមធ្យម អ្នកនាងឃុល ទិត្យចិន្តា គិតថានឹងចាប់យកជំនាញអ្វីមួយច្បាស់លាស់ ដើម្បីអនាគតខ្លួនឯង ។ នាងតាំងចិត្តថា ជាកូនស្រីមិនត្រូវពឹងកម្លាំងប្តីទេ ត្រូវតែមានជំនាញ ឬវិជ្ជាជីវៈអ្វីមួយច្បាស់លាស់ខ្លួនឯង ។ អ្វីដែលនាងស្រទ្បាញ់ត្រូវចាប់យកឱ្យបាន ។ ឆ្លៀតពេលសិក្សានៅសាលាវិចិត្រសិល្បៈ អ្នកនាងចិន្តា ដើរសុំគេនៅតាមទូរទស្សន៍នានា មានអប្សរា និងទូរទស្សន៍ជាតិ ដោយប្រាប់ថានាងជាសិស្សសាលាវិចិត្រសិល្បៈ បើមានអ្វីជួយនាងអាចជួយបាន ។ ពេលនោះគេជួយឱ្យនាងបានរាំកំដរឆាក និងថតខារ៉ាអូខេ។ នាងសប្បាយចិត្តទោះជាបានប្រាក់តិចតួចក្តី ។ គោលដៅនាងមិនត្រឹមតែរាំទេ គឺទៅមើលពីគេរៀបចំថត គេរៀបចំឆាក ចាប់ប្លង់ រៀនសង្កេតទាំងអស់ ព្រោះមានឆន្ទៈមួយចង់ចេះជំនាញនោះ ។ ម៉្យាងទៀតដ្បិតតែនាងទៅអាមេរិកតែបទពិសោធន៍ខាងទូរទស្សន៍ និងចាប់ប្លង់សម្តែងតាមទីតាំងខាងក្រៅ គឺមិនទាន់ចេះទេ ។
ក្រោយមកអ្នកនាងឃុល ទិត្យចិន្តា បានទៅសិក្សានៅអាមេរិកម្តងទៀត ផ្នែកខាង«អ្នកនិពន្ធវ័យក្មេង»និងដើមឆ្នាំ២០០៥ បានទៅសិក្សាវគ្គ ខ្លីៗនៅអូស្ត្រាលី និងប្រទេសកូរ៉េខាងត្បូង ។ ដោយសារតែមានគោលដៅចង់ក្លាយជាអ្នកធ្វើការនៅទូរទស្សន៍ខាងផលិតកម្មវិធី ព្រោះមានបទពិសោធន៍ច្រើនដែរនោះ អ្នកនាងឃុល ទិត្យចិន្តាទាក់ទងរៀមច្បងមួយចំនួន ។ ពេលបានជួបលោកម៉ម រស្មី ត្រូវលោកប្រាប់ថា អ្នកនាងយុគ ចិន្តា ជិតបង្កើតកម្មវិធីថ្មីមួយ និងឱ្យយកប្រវត្តិការងារដាក់ក្រែងគេចាប់អារម្មណ៍ ។ ពេលនោះអ្នកនាងយុគ ចិន្តា ឱ្យនាងសរសេរអត្ថបទឱ្យមើល និងឱ្យនាងសាកល្បងសមត្ថភាព៣ខែ ។ ការសាកល្បងនោះ នាងត្រូវសរសេរអត្ថបទឱ្យអ្នកនាងយុគ ចិន្តា និយាយពីគោលគំនិតកម្មវិធីតាមវគ្គ នីមួយៗទាក់ទងនឹងជីវប្រវត្តិ ។ ដោយយល់ថា នាងអាចប្រើការបានក៏ជាប់ការងារជាមួយអ្នកនាងយុគ ចិន្តា រហូតមក ។
ក្នុងជំនួបជាមួយកោះសន្តិភាព កាលពីពេលថ្មីៗនេះ អ្នកនាងឃុល ទិត្យចិន្តា និយាយថា ដោយសារតែភាពម៉ត់ចត់នឹងការងារ នាងតែងតែបែងចែកច្បាស់លាស់ណាស់ពេលលេងសើច គឺលេងសើច ពេលការងារគឺការងារ ។ ពីដំបូងអ្នកចូលរួមសម្ភាសន៍ ដឹងថា អ្នកនាងចិន្តា ជាជំនួយការកម្មវិធីមិនសូវចាប់អារម្មណ៍ទេ តែពេលឃើញនាងច្បាស់លាស់ ក្លាហានជាមួយភារកិច្ចក៏ចាប់ផ្តើមមានការចាប់អារម្មណ៍ ។ តាំងពីអ្នកនាងឃុល ទិត្យចិន្តា ចូលបម្រើការងារជាមួយអ្នកនាងយុគ ចិន្តាមក អ្នកទាំងពីរតែងតែផ្តល់គំនិតឱ្យគ្នាទៅវិញទៅមក ធ្វើយ៉ាងណាឱ្យកម្មវិធីស៊ីធីអិនប៉ុស្តិ៍លេខ២១ មានប្រជាប្រិយភាព ។ នៅពេលខាងមុខអ្នកនាងឃុល ទិត្យចិន្តា និងអ្នកនាងយុគ ចិន្តា នឹងរិះរកចំណុច ប្លែកៗទាក់ទងនឹងកម្មវិធីសម្រាប់បម្រើអារម្មណ៍ទស្សនិកជន ដោយសន្យាថាមិនឱ្យមានភាព ដដែលៗទេ៕
ចែករំលែកព័តមាននេះ