រាជធានីភ្នំពេញ ៖ សំណើសុំធ្វើបាតុកម្មរបស់ប្រធានវិទ្យុសំបុកឃ្មុំសំឡេងប្រជាពលរដ្ឋមិនត្រូវបានសាលារាជធានីភ្នំពេញ អនុញ្ញាតឱ្យធ្វើបាតុកម្មនៅទីលានប្រធានធិបតេយ្យនិងដង្ហែក្បួនទៅកាន់ក្រសួងព័ត៌មានទេនៅថ្ងៃទី៣១ មីនា ខាងមុខដោយសំអាងថា រង់ចាំពេលវេលាសមស្របណាមួយសិន ។
រាជធានីភ្នំពេញ ៖ សំណើសុំធ្វើបាតុកម្មរបស់ប្រធានវិទ្យុសំបុកឃ្មុំសំឡេងប្រជាពលរដ្ឋមិនត្រូវបានសាលារាជធានីភ្នំពេញ អនុញ្ញាតឱ្យធ្វើបាតុកម្មនៅទីលានប្រធានធិបតេយ្យនិងដង្ហែក្បួនទៅកាន់ក្រសួងព័ត៌មានទេនៅថ្ងៃទី៣១ មីនា ខាងមុខដោយសំអាងថា រង់ចាំពេលវេលាសមស្របណាមួយសិន ។
បន្ទាប់ពីជួបប្រជុំជាមួយអាជ្ញាធររាជធានីភ្នំពេញនៅព្រឹកថ្ងៃទី២៤ មីនា នារសៀលថ្ងៃដដែលនោះ លោក ម៉ម សូណង់ដូ ប្រធានវិទ្យុសំបុកឃ្មុំសំឡេងប្រជាពលរដ្ឋ បានធ្វើសន្និសីទសារព័ត៌មានមួយបញ្ជាក់ថា លោកមិនដឹកនាំធ្វើបាតុកម្ម និងដង្ហែក្បួននោះទេ ប៉ុន្តែលោកនឹងចូលរួមជាមួយប្រជាពលរដ្ឋដែលទាមទារចង់ឱ្យមានកម្លាំងផ្សាយនៅតាមបណ្ដាខេត្ត និងហ្វ្រេកង់បង្កើតទូរទស្សន៍ ដើម្បីឱ្យស្របតាមលទ្ធិប្រជាធិតេយ្យនៅកម្ពុជា ។ លោក ម៉ម សូណង់ដូ បញ្ជាក់ថា ចំពោះការទាមទារហ្វ្រេកង់វិទ្យុ និងបង្កើតទូរទស្សន៍នោះមិនទាក់ទងនឹងរឿងនយោបាយនោះទេ គឺយើងមានសិទ្ធិបញ្ចេញមតិ ។ ទាក់ទិននឹងការស្នើសុំបង្កើតហ្វ្រេកង់វិទ្យុនោះ លោក ម៉ម សូណង់ដូ និយាយថា ខ្ញុំបានស្នើសុំចាប់តាំងពីឆ្នាំ២០០៥មកម្លេ៉ះ ប៉ុន្តែមិនត្រូវបានលោករដ្ឋមន្ត្រីក្រសួងព័ត៌មានផ្ដល់ជូនទេ ដោយលោកឆ្លើយថា គ្មានច្បាប់សោតទស្សន៍ ។
ប៉ុន្តែចាប់តាំងពីឆ្នាំ២០១០ មកក្រសួងព័ត៌មានបានផ្ដល់អាជ្ញាប័ណ្ណនិងហ្វ្រេកង់វិទ្យុទៅឱ្យវិទ្យុផ្សេងៗ និងទូរទស្សន៍មួយចំនួនផងដែរ ។ ក្នុងនាមលោកជាប្រជាពលរដ្ឋខ្មែរ និងជាប្រធានវិទ្យុសំបុកឃ្មុំដែលស្នើសុំ ចុះហេតុអ្វីបានជាក្រសួងព័ត៌មានមិនផ្តល់ឱ្យ នេះជាបញ្ហាដែលគ្មានភាពយុត្តិធម៌ សម្រាប់វិទ្យុសំបុកឃ្មុំនោះទេ ។ លោក ម៉ម សូណង់ដូ បញ្ជាក់ថា ចាប់ពីពេលស្នើសុំ រហូតមកដល់ពេលនេះ គឺអស់រយៈពេល៩ឆ្នាំហើយ នៅតែក្រសួងព័ត៌មានមិនអនុញ្ញាតទៀត។ អ្វីដែលគាត់មិនអនុញ្ញាតនេះ គាត់ចង់តែឈ្នះ និងគិតថា ការទាមទារជារឿងនយោបាយ គឺមិនត្រឹមត្រូវ ។ យោងតាមកំណត់ហេតុនៃកិច្ចប្រជុំពិភាក្សាស្តីពីសំណើសុំធ្វើបាតុកម្មរបស់ប្រធានវិទ្យុសំបុកឃ្មុំសំឡេងប្រជាពលរដ្ឋ ដែលចុះហត្ថលេខាដោយលោក ម៉ម សូណង់ដូ និងលោក ឃួង ស្រេង អភិបាលរងរាជធានីភ្នំពេញ នោះ លោក ម៉ម សូណង់ដូ នៅតែទទូចទាមទារសេរីភាពក្នុងការបញ្ចេញមតិ ក្នុងការស្នើដំឡើងកម្លាំងផ្សាយនៅតាមបណ្តាខេត្ត និងសុំហ្វ្រេកង់បង្កើតទូរទស្សន៍ ដើម្បីឱ្យស្របតាមលទ្ធិប្រជាធិបតេយ្យ ព្រោះថាកន្លងមកវិទ្យុសំបុកឃ្មុំ ធ្លាប់សុំទៅក្រសួងព័ត៌មានកាលពីឆ្នាំ២០០៥ ប៉ុន្តែក្រសួងពុំបានឆ្លើយតបឡើយ ។
លុះដល់ឆ្នាំ២០១៤ ច្បាប់សោតទស្សន៍ក៏នៅតែពុំទាន់បានរៀបចំ ហើយក្រសួងព័ត៌មានបានចេញអាជ្ញាប័ណ្ណ និងដំឡើងកម្លាំងការផ្សាយ និងហ្វ្រេកង់ទូរទស្សន៍ទៅក្រុមហ៊ុនផ្សេងទៀតជាច្រើន ។ លោក ឃុត សំខាន់ ប្រធានមន្ទីរព័ត៌មានរាជធានីភ្នំពេញ បានស្នើសុំឱ្យលោក ម៉ម សូណង់ដូ អត់ធ្មត់រង់ចាំមួយរយៈពេលសិន ព្រោះថានាពេលបច្ចុប្បន្នហ្វ្រេកង់របស់ក្រសួងព័ត៌មានមានភាពចង្អៀត អាចឆ្លងគ្នាទៅវិញទៅមក បណ្តាលឱ្យមានបញ្ហាបច្ចេកទេស ។ លោកកើត ឆែ នាយករដ្ឋបាលសាលារាជធានីភ្នំពេញ បានលើកឡើងថា តាមការបញ្ជាក់ពីប្រធានមន្ទីរព័ត៌មានរាជធានីភ្នំពេញ វាពិតជាមានភាពចង្អៀតមែន និងមានការស្នើសុំជាច្រើនទៀតក្នុងការបង្កើតវិទ្យុ និងទូរទស្សន៍ ។ ដូច្នេះស្នើលោកប្រធានវិទ្យុសំបុកឃ្មុំអត់ធ្មត់ រង់ចាំរហូតដល់មានហ្វ្រេកង់ទំនេរ ហើយប្រសិនបើការស្នើសុំពុំទាន់បានការអនុញ្ញាតទេ អ្នកស្នើសុំនាំគ្នាធ្វើបាតុកម្មទាមទារបញ្ហានេះបណ្តាលឱ្យមានជាទម្លាប់អាក្រក់នៅពេលដែលស្នើសុំអ្វីមួយពុំបាននាំគ្នាធ្វើបាតុកម្ម ។ ម្យ៉ាងទៀត ទីលានប្រជាធិបតេយ្យកំពុងតែស្ថិតក្រោមការស្រាវជ្រាវរបស់អាជ្ញាធរមានសមត្ថកិច្ច ចំពោះព្រឹត្តិការណ៍កន្លងមក ។
លោកឃួង ស្រេង អភិបាលរងរាជធានីភ្នំពេញ មានប្រសាសន៍ថា ដោយសារបញ្ហាសន្តិសុខ សុវត្ថិភាព និងសណ្តាប់ធ្នាប់សាធារណៈក្នុងរាជធានីភ្នំពេញ នៅមិនទាន់ត្រឡប់មករកភាពប្រក្រតីនៅឡើយ ហើយម្យ៉ាងទៀតទីលានប្រជាធិបតេយ្យកំពុងស្ថិតនៅក្រោមការស្រាវជ្រាវរបស់អាជ្ញាធរមានសមត្ថកិច្ច ។ កំណត់ហេតុក្នុងអង្គប្រជុំបានឱ្យដឹងទៀតថាចំពោះសំណើសុំជួបជុំធ្វើបាតុកម្មនៅទីលានប្រជាធិបតេយ្យ និងដង្ហែក្បួនទៅក្រសួងព័ត៌មាននោះ សាលារាជធានីភ្នំពេញមិនអនុញ្ញាតទេ ដោយសារបញ្ហាសន្តិសុខ និងសណ្តាប់ធ្នាប់សាធារណៈមិនទាន់ប្រក្រតីឡើងវិញនៅឡើយ ។ ក្នុងករណីដែលម្ចាស់សំណើនៅតែបន្តជួបជុំ និងដង្ហែក្បួន ម្ចាស់សំណើត្រូវតែទទួលខុសត្រូវទាំងស្រុងចំពោះហេតុការណ៍ដែលកើតឡើង ហើយអាជ្ញាធរមានសមត្ថកិច្ចនឹងចាត់វិធានការតាមផ្លូវច្បាប់ ។
លោកម៉ម សូណង់ដូ បានបញ្ជាក់ជំហរក្នុងសន្និសីទសារព័ត៌មាននៅស្នាក់ការវិទ្យុសំបុកឃ្មុំថា លោកមិនដឹកនាំធ្វើបាតុកម្មទាមទារទេ បុ៉ន្តែនឹងចូលរួមធ្វើជាមួយប្រជាពលរដ្ឋដែលចង់បានប្រព័ន្ធផ្សព្វផ្សាយព័ត៌មានឯករាជ្យមួយនៅក្នុងប្រទេសកម្ពុជា ។ ដូច្នេះខ្ញុំជាអ្នកគោរពច្បាប់ ប្រសិនបើគេមិនអនុញ្ញាតឱ្យធ្វើនោះ ខ្ញុំមិនធ្វើទេ ហើយខ្ញុំក៏មិនទទួលខុសត្រូវចំពោះបញ្ហាដែលកើតមានទេ ។ វាជារឿងទទួលខុសត្រូវចំពោះរាជរដ្ឋាភិបាលជាមួយប្រជាពលរដ្ឋ ៕
ចែករំលែកព័តមាននេះ