ខេត្តបាត់ដំបង ៖ ប្រភពព័ត៌មានដែលគួរឱ្យទុកចិត្តមួយបានឱ្យដឹងថា រថយន្តម៉ាកកាមរីឆ្លាមពណ៌សមួយគ្រឿងដែលដឹកឈើគ្រញូង ត្រូវជនប្រដាប់អាវុធមួយក្រុមស្ទាក់ប្លន់កាលពីវេលាម៉ោងជាង២រំលងអធ្រាត្រឈានចូលថ្ងៃទី២៤ មីនា តាមបណ្តោយផ្លូវជាតិលេខ៥ ចន្លោះផ្លូវចូលទួលម្កាក់ និងអូរស្តាស់ ស្ថិតក្នុងភូមិស្រះកែវ ឃុំកំពង់ព្រះ ស្រុកសង្កែ ដែលគេសង្ស័យថា ជាករណីពាលស៊ីពាល បុ៉ន្តែសមត្ថកិច្ចគ្រប់ស្ថាប័នមិនបានដឹងអំពីករណីនេះឡើយ ។
ប្រភពដដែលប្រាប់ថា រថយន្តដែលត្រូវក្រុមប្រដាប់អាវុធស្ទាក់ប្លន់នោះម៉ាកកាមរីឆ្លាមពណ៌ស តែគ្មានស្លាកលេខទេ ដែលបើកបរដោយបុរសម្នាក់ឈ្មោះស៊្រាង អាយុជាង២០ឆ្នាំ និងម្ចាស់រថយន្តនេះឈ្មោះ ហេង មករា ភេទប្រុស អាយុជាង២០ឆ្នាំដែរ រស់នៅរាជធានីភ្នំពេញ ។ ប្រភពខាងលើនេះបញ្ជាក់ថា រថយន្តនេះដឹកឈើគ្រញូង ហើយក្រោយពីប្លន់បាន ក្រុមប្រដាប់អាវុធនោះបានបើករថយន្តនេះឆ្ពោះទៅទិសខាងកើត ខណៈអ្នកបើកបរឈ្មោះស៊្រាង បានរត់រួចខ្លួនចោលរថយន្ត ។
តាមរយៈប្រភពដែលសុំមិនបញ្ចេញឈ្មោះបានស្រង់សម្តីអ្នកបើកបររថយន្តឈ្មោះស៊្រាង ថា ខ្លួនបានបើករថយន្តចេញពីខេត្តបាត់ដំបងឆ្ពោះទៅរាជធានីភ្នំពេញតែម្នាក់ឯង បុ៉ន្តែពេលចេញដំណើរដល់ចំណុចខាងលើ ស្រាប់តែមានរថយន្តកាមរីបាឡែន២គ្រឿងបើកស្ទាក់រថយន្តរបស់ខ្លួនមុខ-ក្រោយ ។ ឈ្មោះស៊្រាង ត្រូវបានស្រង់សម្តីទៀតថា គ្រានោះរថយន្តពណ៌ទឹកប្រាក់ដេញពីក្រោយ រីឯរថយន្តពណ៌សបើកស្ទាក់រថយន្តខ្លួនពីមុខកាក់ឱ្យឈប់ ។ ពេលរថយន្តឈប់ខ្លួនបានឃើញមនុស្សប្រហែលពី៥ទៅ៦នាក់ដើរចុះពីរថយន្តទាំង២គ្រឿងក្នុងឯកសណ្ឋានជាកម្លាំងប្រដាប់អាវុធមកភ្ជង់ខ្លួនតែម្តង ឃើញដូច្នេះ ខ្លួនក៏បើកទ្វារចុះរត់តែម្តង សូម្បីទូរស័ព្ទ និងស្បែកជើងក៏ពាក់មិនទាន់ផង ។
ជាមួយនឹងការស្ទាក់ប្លន់រថយន្តខាងលើនេះ ម្ចាស់រថយន្តឈ្មោះ ហេង មករា បានបញ្ជាក់ប្រាប់កោះសន្តិភាពតាមទូរស័ព្ទនៅព្រឹកថ្ងៃទី២៤ មីនាថា រថយន្តខ្លួនពិតជាត្រូវក្រុមប្រដាប់អាវុធស្ទាក់ប្លន់នៅក្នុងស្រុកសង្កែមែន ។ បុ៉ន្តែម្ចាស់រថយន្តនេះនិយាយហាក់គ្មានការលាក់លៀមព័ត៌មានដ៏រសើបមួយនេះឡើយ ដោយសារតែរថយន្តខ្លួនមានដឹកបទល្មើសព្រៃឈើ ។ ឈ្មោះមករា បានបញ្ជាក់ចុងក្រោយថា អ្នកបើកបរជាប្អូនប្រុសរបស់ខ្លួន ហើយក្រុមដែលប្លន់រថយន្តនេះមានគ្នាច្រើន និងជិះរថយន្តកាមរីបាឡែន២គ្រឿង ។ ក្រោយមក បុរសនេះបានបិទទូរស័ព្ទមិនបានរៀបរាប់លម្អិតពីរឿងរ៉ាវនេះទៀតទេ ។
ករណីប្លន់រថយន្តដឹកឈើគ្រញូងយ៉ាងស្ងាត់ស្ងៀមកណ្តាលអធ្រាត្រខាងលើនេះមិនរំខានដល់សមត្ថកិច្ចទេ ហើយបើគិតត្រឹមម៉ោង១០ព្រឹកថ្ងៃទី២៤ មីនា សមត្ថកិច្ចគ្រប់ស្ថាប័ន រាប់ទាំងសមត្ថកិច្ចមូលដ្ឋានផង នៅតែមិនទាន់ដឹងនៅឡើយ ។ លោកជេត វណ្ណនី ស្នងការរងខេត្តបញ្ជាក់តាមទូរស័ព្ទថា លោកមិនបានទទួលនូវព័ត៌មានពីកម្លាំងមូលដ្ឋានទេ បុ៉ន្តែលោកកំពុងសួរនាំ និងបញ្ជាឱ្យកម្លាំងជំនាញស្រុកសង្កែចុះស្រាវជ្រាវលើករណីនេះហើយ បុ៉ន្តែបានស្នើឱ្យជនរងគ្រោះបង្ហាញការពិត ។
គេនៅមិនទាន់ដឹងថា តើជនប្រដាប់អាវុធដែលជិះរថយន្ត២គ្រឿងតាមស្ទាក់ប្លន់រថយន្តកាមរីដឹកឈើគ្រញូងខាងលើនេះមានសមាសភាពចេញពីប្រភពណានោះទេ ហើយក៏មិនដឹងថា ពួកគេជាក្រុមចោរប្លន់ពិតប្រាកដ ឬក៏ជាកម្លាំងសមត្ថកិច្ចបង្ក្រាបបទល្មើសនោះដែរ ព្រោះបច្ចុប្បន្នគេសង្កេតឃើញមានកម្លាំងគ្រប់ប្រភេទចេញស្ទាក់បទល្មើសព្រៃឈើជំរិតទារលុយនៅលើផ្លូវជាតិលេខ៥៧ (អតីតផ្លូវលេខ១០) និងផ្លូវជាតិលេខ៥ ។ បើពិតជាមានករណីប្លន់រថយន្តដឹកឈើគ្រញូងដូចការអះអាងពីម្ចាស់រថយន្តនេះមែន គេសង្ស័យថា អាចជាករណីពាលស៊ីពាល តែក៏មិនអាចស្មានត្រូវដែរ ព្រោះបច្ចុប្បន្នអ្នកបង្ក្រាបបទល្មើសមានសមាសភាពច្រើនស្ថាប័នណាស់ ដែលពិបាកក្នុងការសន្និដ្ឋាន ៕
ចែករំលែកព័តមាននេះ