ក្រុមអ្នកស្រាវជ្រាវអាមេរិកបានអះអាងថា ស្ត្រីដែលក្នុងឆាកជីវិតរបស់ខ្លួនធ្លាប់ជក់បារីអស់១០០ដើម ប្រឈមនឹងកើតជំងឺមហារីកដោះដល់៣០ភាគរយ ។ ក្រុមអ្នកស្រាវជ្រាវបានបន្ថែមទៀតថា ប្រសិនជាស្ត្រីស្ថិតក្នុងវ័យចន្លោះពី២០ឆ្នាំទៅ៤៤ឆ្នាំ ធ្លាប់ជក់បារីអស់១កញ្ចប់ក្នុងមួយថ្ងៃរយៈពេលចាប់ពី១០ឆ្នាំឡើងទៅគឺប្រឈមនឹងកើតជំងឺមហារីកដោះដល់ទៅ៦០ភាគរយ ។
ការពិសោធរយៈពេល៦ឆ្នាំទៅលើស្ត្រីវ័យក្មេងរស់នៅតំបន់ Greater Seattle ក្រុងវ៉ាស៊ីនតោន សហរដ្ឋអាមេរិកបានបង្ហាញថា ក្រុមដែលធ្លាប់ជក់បារីពីអតីតកាល ប្រហែលជា៣០ភាគរយប្រឈមនឹងការកើតមានមហារីកដោះ ធៀបទៅនឹងស្ត្រីវ័យក្មេងដូចគ្នាដែលមិនធ្លាប់ជក់ ។ ប៉ុន្តែ ក្រុមស្ត្រីដែលមិនទាន់បោះបង់ការជក់ ហើយមកទល់នឹងការសិក្សាធ្លាប់ជក់អស់ជាង១០ឆ្នាំហើយនោះ គឺប្រឈមនឹងកើតមហារីកដោះ៥០ភាគរយធៀបទៅនឹងអ្នកដែលជក់តិចឆ្នាំជាង ។ អ្នកដឹកនាំការសិក្សាវេជ្ជបណ្ឌិតChristopher Li មកពីមជ្ឈមណ្ឌលស្រាវជ្រាវជំងឺមហារីកFred Hutchinson មានប្រសាសន៍ថា ៖«ខ្ញុំគិតថា មានភស្តុតាងបញ្ជាក់ច្បាស់ថា ជំងឺមហារីកដោះដែលបង្កឡើងដោយការជក់បារីគឺជាភាពអន្តរាយចំពោះសុខភាពមួយផ្សេងទៀត ។ មានសារធាតុគីមីផ្សេងៗគ្នាជាច្រើនប្រភេទនៅក្នុងផ្សែងបារី ហើយដែលសារធាតុទាំងនោះផ្តល់ផលប៉ះពាល់ដល់សុខភាពផ្សេងៗពីគ្នា »។
ដោយឡែក វេជ្ជបណ្ឌិត Geoffrey Kabatអ្នកឯកទេសផ្នែកជំងឺរាតត្បាតមកពីសាកលវិទ្យាល័យ Yeshiva University សហរដ្ឋអាមេរិកបញ្ចេញទស្សនថា ផលប៉ះពាល់មួយចំនួនដែល បង្ហាញនៅក្នុងការសិក្សាថ្មីនេះគឺតូចតាចនិងមិនទាន់ច្បាស់លាស់នៅឡើយទេ ។ លោកបានបន្តថា ៖«យើងបានដឹងថា ការជក់បារីផ្តល់ផលអាក្រក់ចំពោះសុខភាព ហើយគេកាន់តែឆាប់ជក់និងជក់ជាញឹកញាប់ គេកាន់តែប្រឈមនឹងបញ្ហាសុខភាពច្រើនយ៉ាង ។ ប៉ុន្តែ ទោះជាយ៉ាងនេះក្តី តួនាទីដែលថាបារីបង្កឱ្យកើតមហារីកដោះគឺនៅពុំទាន់ច្បាស់លាស់នៅឡើយទេ » ៕
ចែករំលែកព័តមាននេះ