រាជធានីភ្នំពេញ ៖ នាយករដ្ឋមន្ត្រីកម្ពុជា – ឡាវបានឯកភាពគ្នាក្នុងការរៀបចំឲ្យមានសន្ធិសញ្ញាព្រំដែនដូចជា ការដូរបង្គោលបោះបង្គោលព្រំដែន ។ ថ្លែងក្នុងសន្និសីទសារព័ត៌មាន នាព្រឹកថ្ងៃទី១២ កញ្ញា នៅវិមានសន្តិភាពសម្តេចតេជោ ហ៊ុន សែន នាយករដ្ឋមន្ត្រីបានលើកឡើងថា ភាគីកម្ពុជា-ឡាវបានចុះហត្ថលេខាលើសេចក្តីថ្លែងការណ៍ រួមដែលក្នុងនោះមានការចែងអំពីលើកកម្ពស់ការភាពជាដៃគូរយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ដែលចាត់ទុកថា ជាសមិទ្ធិផលនៃប្រទេសទាំងពីរ ។
សម្តេចបញ្ជាក់ថា ៖«យើងបានខិតខំធ្វើការច្រើនណាស់មកហើយ ដើម្បីទទួលមរតប្រវត្តិ សាស្ត្រដែលដូនតាយើងនៃប្រទេសភូមិផងរបងជាមួយ និងប្រកបដោយមិត្តភាព ។ ការលើក កម្ពស់ភាពជាដៃគូរយុទ្ធសាស្ត្រគ្រប់ជ្រុងជ្រោយអនុញ្ញាតឲ្យយើងជំរុញនូវទំនាក់ទំនងដែល មានស្រាប់ ហើយកាន់តែជំរុញនូវជំនឿទុកចិត្តគ្នានៃប្រទេសទាំងពីរ» ។ សម្តេចក៏បានឲ្យដឹងថាក្នុងជំនួបភាគីក៏បានជជែកគ្នានូវចំនួនមួយដូចជា ទាក់ទង និងបញ្ហាព្រំដែន ។
នាយករដ្ឋមន្ត្រីទាំងពីរបានឯកភាពគ្នាដើម្បីធ្វើការរៀបចំឲ្យសន្ធិសញ្ញាព្រំដែនកម្ពុជា-ឡាវពាក់ព័ន្ធទៅនឹងសមិទ្ធិផលដែលសម្រេចបាន៨៦ភាពរយមកហើយ ។ សម្តេចបញ្ជាក់ថា ៖«នេះជាកិច្ចការសំខាន់ណាស់ដែលកាលពីមុននេះព្រំដែននៃប្រទេសទាំងពីរពុំមានភាពច្បាស់លាស់នោះទេ ។ តែដោយសារយើងបានធ្វើការច្រើនមកហើយ យើងព្រមព្រៀងគ្នាឲ្យគណៈកម្មការព្រំដែននៃប្រទេសទាំងពីរព្រៀងនូវកិច្ចព្រមព្រៀងនូវសន្ធិសញ្ញា ដើម្បីទទួលយកនូវលទ្ធផល៨៦ភាគរយ ។ យើងក៏បានព្រមព្រៀងគ្នាផងដែរ អំពីការដូរបង្គោលព្រំដែនដែលបង្គោលព្រំដែនបច្ចុប្បន្ននៅតូចណាស់ ហាក់ដូចជា ព្រំដីរវាងប្រជាជន និងប្រជាជន ដែលមិនសាកសមនិងបង្គោលព្រំសីមាព្រំដែនរដ្ឋនោះទេ» ។
សម្តេចតេជោបានលើកឡើងទៀតថា នាយករដ្ឋមន្ត្រីនៃប្រទេសទាំងពីរបានប្រគល់ភារកិច្ចឲ្យគណៈកម្មការព្រំដែននៃប្រទេសទាំងពីរ ដើម្បីធ្វើការគូសជាប្លង់ ដើម្បីឆ្លងនាយករដ្ឋមន្ត្រី ប្រទេសទាំងពីរ ហើយក៏បានព្រមព្រៀងគ្នា ដើម្បីចែកនូវការចំណាយពាក់កណ្តាលម្នាក់នូវការ ផលិតបង្គោល ដើម្បីជំនួសឲ្យបង្គោលចាស់ដែលបានបោះ ។ ក្រៅពីនោះដោយសារតែបង្គោលព្រំដែនមានចំនួនតិចភាគីទាំងពីរក៏បានព្រមព្រៀងគ្នាសិក្សា ដើម្បីបោះបង្គោលបន្ថែមទៀត ។ ព្រោះកន្លងមកព្រំដែនរាប់រយគីឡូម៉ែត្របោះបានត្រឹមតែ២២១បង្គោលប៉ុណ្ណោះ ដូច្នេះត្រូវបោះ បន្ថែមតែបង្គោលនោះត្រូវស្របនឹងបង្គោលដែលមានស្រាប់ ។
ដូច្នេះត្រូវមានការឆ្លងកាត់ថ្នាក់ដឹកនាំនៃប្រទេសទាំងពីរ ។ សម្តេចក៏បានលើកឡើងថា សម្រាប់ការសេសសល់នៃការបង្គោលព្រំដែនចំនួន ១៤% រកទៀត នាយករដ្ឋមន្ត្រីទាំងពីរបានព្រមព្រៀងគ្នាប្រគល់ភារកិច្ចឲ្យក្រសួងការបរទេសក៏ដូចជា ស្ថាប័នពាក់ព័ន្ធធ្វើការជាមួយគ្នាបន្តការដោះស្រាយ ។ សម្តេចតេជោថា ៖«បញ្ហានេះយើងមានសុទិដ្ឋិនិយមថា នឹងដោះស្រាយនៅពេលណាមួយដ៏សមស្របក្នុងស្មារតីមិត្តភាព និងសហប្រតិបត្តិការអ្នកជិតខាងល្អ ។ ថ្ងៃនេះយើងក៏បានចុះហត្ថលេខាលើកិច្ចព្រមព្រៀងមួយចំនួនដែលក្នុងនោះកម្ពុជាក៏បានក្លាយទៅជាទីផ្សាយអគ្គិសនីរបស់ឡាវ ហើយឡាវក៏ក្លាយជាទីកន្លែងផ្គត់ផ្គង់ឲ្យកម្ពុជា ដែលបំពេញឲ្យគ្នា ទៅវិញទៅមក » ។
សម្តេចតេជោបន្តថា យោងទៅលើអ្វីដែលបានចុះហត្ថលេខានៅថ្ងៃនេះ និងការចុះហត្ថលេខាដែលមានពីមុន និងកំពុងផ្គត់ផ្គងប្រភពអគ្គិសនីដែលកម្ពុជាទទួលពីឡាវមានរហូត៣១០០មេហ្កាវ៉ាត់ដែលជាទំហំធំ បើព្រៀបធៀបកម្ពុជាមានពេលមុនទីក្រុងភ្នំពេញប្រើប្រាស់ថាមពលមិនបានដល់៤០មេហ្គាវ៉ាត់ទេ ។ ក៏ប៉ុន្តែឥឡូវនេះ កម្ពុជាឈានដល់ទិញអគ្គិសនីពីឡាវរហូតដល់៣១០០មេហ្គាវ៉ាត់ ដែលឡាវបានចាត់ទុកថា ជាប្រភេទទំនិញមួយដែលនាំចូលមកកាន់កម្ពុជា ដែលធ្វើឲ្យទំហំពាណិជ្ជកម្មរវាងប្រទេសទាំងពីរកើនឡើងកាន់តែឆាប់រហ័ស ។
សម្តេចក៏បានលើកឡើងថា ក្នុងជំនួបក៏បានពិភាក្សាលើបញ្ហាមួយចំនួនទៀតដូចជា បញ្ហាទេសចរណ៍ ការហោះហើរ ត្រង់របស់ក្រុមហ៊ុនកម្ពុជាអ៊ែរ និងក្រុមហ៊ុនឡាវផងដែរ ។ ចំណែកលោក ថងលូន ស៊ីស៊ូលីត (Thongloun Sisoulith)នាយករដ្ឋមន្ត្រីនៃសាធារណរដ្ឋប្រជាធិបតេយ្យប្រជាមានិតឡាវបានលើកឡើងថា ការអញ្ជើញមកទស្សនកិច្ចនៅកម្ពុជា គឺជាការចាត់ទុកថា ជានិមិត្តរូបល្អដោយភាគីទាំងពីរបានឯកភាពគ្នានូវការងារជាច្រើន និងជាយុទ្ធសាស្ត្រនៃទំនាក់ទំនងល្អ និងកិច្ចសហប្រតិបត្តិការរវាងគ្នានឹងគ្នាឲ្យបានល្អបន្ថែមទៀត ។ លោករយៈអ្នកបកប្រែលោកនាយករដ្ឋមន្ត្រីឡាវបានបញ្ជាក់ថា ៖«ខ្ញុំឯកភាពចំពោះការលើកឡើងរបស់សម្តេចតេជោ ហ៊ុន សែន ក្នុងការពិភាក្សាគ្នាដោះស្រាយពីបញ្ហាព្រំដែនឲ្យចេញផ្លែផ្កាចេញជាជំហានទៅមុខសំខាន់បំផុតភាគីទាំងពីឯកភាពគ្នាចំនួន៨៦ភាគរយ យើងបានកំណត់ជាមួយគ្នា។
យើងនឹងធ្វើឲ្យមានបង្គោលណាដែលមិនទាន់មានបោះយើងក៏បានឲ្យមានការគូសជាប្លង់ ហើយបោះបង្គោលឲ្យធំជាងមុន និងស្អាតជាងមុន» ។ លោកគូសបញ្ជាក់ថា ៖«ខ្ញុំស្នើឲ្យភាគីកម្ពុជាជាអ្នកគូសប្លង់ ដើម្បីនាយករដ្ឋមន្ត្រីឲ្យនាយករដ្ឋមន្ត្រីទាំងពីរទទួលយកបានពិនិត្យ ហើយចំណាយយើងឯកភាពចេញពាក់កណ្តាលម្នាក់ ។ នេះជាការសម្រេចដ៏សំខាន់ពីព្រោះយើងបានធ្វើការជាច្រើនឆ្នាំមកហើយ ចំពោះបង្ហាញព្រំដែនបានរហូតដល់៨៦ភាគរយ» ៕ កែសម្រួលដោយ ៖ សុឃាក់
ចែករំលែកព័តមាននេះ