ខេត្តបន្ទាយមានជ័យ ៖ រថយន្តស៊េរីទំនើបមួយគ្រឿងមានតម្លៃ៣លាន៥សែន៩ម៉ឺនបាត ស្មើនឹងជាង១៣ម៉ឺនដុល្លារ ដែលមានម្ចាស់ជាជនជាតិថៃបានតាមរកពីប្រទេសថៃ ទីបំផុតត្រូវកម្លាំងអាវុធហត្ថកម្ពុជាចាប់បានលើដងផ្លូវជាតិលេខ៥៨ ស្ថិតក្នុងភូមិក្តិបថ្ម ឃុំគោករមៀត ស្រុកថ្មពួក កាលពីយប់ថ្ងៃទី៨ កញ្ញា ឆ្នាំ២០១៩ ហើយបានធ្វើពិធីប្រគល់-ទទួលជូនម្ចាស់វិញ និងមានការថ្លែងអំណរគុណដល់មន្ត្រី និងសមត្ថកិច្ចកម្ពុជាផងដែរលើស្ពានព្រំដែនអន្តរជាតិប៉ោយប៉ែត-ខ្លងលឹក។ ទោះបីជាយ៉ាងណា ជនសង្ស័យមិនអាចលួចបើករថយន្តខាងលើបន្តដំណើរទៅមុខទៀតបាន ដោយសារត្រូវម្ចាស់ផ្តាច់ប្រព័ន្ធGPS ។
បុរសជាម្ចាស់រថយន្តស៊េរីទំនើបមួយគ្រឿងខាងលើ មិនត្រូវបានស្គាល់អត្តសញ្ញាណនោះទេ គ្រាន់តែដឹងថាជាជនជាតិថៃ ។
តាមប្រភពព័ត៌មានបានឱ្យដឹងថា នៅព្រឹកថ្ងៃទី១១ កញ្ញានេះ ម្ចាស់រថយន្តស៊េរីទំនើបមួយគ្រឿងខាងលើបានចូលមកកម្ពុជាតាមរយៈមន្ត្រីការិយាល័យទំនាក់ទំនងព្រំដែនកម្ពុជាថៃ-ថៃកម្ពុជា ភ្ជាប់មកជាមួយឯកសារពាក់ព័ន្ធរថយន្តបានមកជួបជាមួយកម្លាំងអាវុធហត្ថនៅទីបញ្ជាការដ្ឋានអាវុធហត្ថខេត្តបន្ទាយមានជ័យ ដើម្បីទទួលយករថយន្តខាងលើត្រឡប់ទៅប្រទេសខ្លួនវិញ។
តាមប្រភពព័ត៌មានបានឱ្យដឹងថា រថយន្តស៊េរីទំនើបមួយគ្រឿងខាងលើនេះចេញពីប្រទេសថៃ បើតាមព័ត៌មានថាតាមច្រករបៀង ប៉ុន្តែមិនដឹងច្រកមួយណាឲ្យពិតប្រាកដឡើយ ហើយបានមកដល់កម្ពុជាតាំងពីថ្ងៃទី៧ កញ្ញា លុះកំពុងបើកលើដងផ្លូវជាតិលេខ៥ ដល់ចំណុចភ្លើងស្តុបមួយកន្លែង ក្នុងក្រុងសិរីសោភ័ណ (ស្តុបទឹកថ្លា) ក៏ខូចមិនអាចដំណើរការបាន ។ បន្ទាប់មកគេក៏ជួលរថយន្តស្ទូចដឹកចូលទៅកន្លែងជាងជួសជុលមួយកន្លែងនៅចំណុចភូមិស្រម៉ោចអស់រយៈពេលមួយយប់ លុះព្រឹកឡើងក៏ជួលរថយន្តដដែលដឹកបន្តបំរុងយកឆ្លងព្រំដែនចូលទៅប្រទេសថៃវិញតាមច្រករបៀងដដែល តែមិនទាន់ដល់គោលដៅផង ក៏ត្រូវកងរាជអាវុធហត្ថស្ទាក់ចាប់បានតែម្តង។
លោកវរសេនីយ៍ទោ ប៊ុនណាំ អ៊ាង មេបញ្ជាការរងអាវុធហត្ថខេត្ត ប្រាប់តាមទូរស័ព្ទថា មុននឹងឈានទៅស្ទាក់ចាប់បានរថយន្តស៊េរីទំនើបមួយគ្រឿងខាងលើនេះ គឺខាងភាគីថៃបានទំនាក់ទំនងមកខាងលោកឲ្យជួយស្រាវជ្រាវរក ។ លោកបន្តថា ក្រោយទទួលបានព័ត៌មានដែលខាងមន្ត្រីនិងសមត្ថកិច្ចថៃផ្តល់ឲ្យ លោកឧត្តមសេនីយ៍ត្រីបោន ប៊ិន មេបញ្ជាការកងរាជអាវុធហត្ថខេត្ត ក៏បានបញ្ជាដល់កងកម្លាំងក្រោមឱវាទចុះស្រាវជ្រាវ ក៏ប្រទះឃើញរថយន្តនិងជនសង្ស័យក៏ឃាត់យកមកធ្វើសាកសួរតែម្តង។
មេបញ្ជាការរងអាវុធហត្ថខេត្តបានបន្តថា ជនជាតិថៃម្នាក់ដែលជាប់ចោទថាជាអ្នកយករថយន្តគេនោះ មិនស្គាល់អត្តសញ្ញាណឡើយ ហើយត្រូវបានឃាត់ខ្លួន ពេលនេះត្រូវបានបញ្ជូនទៅសាលាដំបូងខេត្តដើម្បីបន្តនីតិវិធីហើយ។
ពេលសាកសួររកគោលដៅលួចរថយន្តឆ្លងដែនពីប្រទេសថៃ ជនសង្ស័យជាជនជាតិថៃដែលត្រូវឃាត់ខ្លួនបានប្រាប់ថា អ្នកដែលទៅទទួលបើករថយន្តឆ្លងដែនគឺជាជនជាតិខ្មែរបានរត់គេចខ្លួនបាត់អស់ហើយ ។ ជនសង្ស័យជាជនជាតិថៃបានអះអាងថា ខ្លួនមិនដែលមកព្រំដែនទេ ទើបមិនស្គាល់ឈ្មោះច្រករបៀងនោះ ប៉ុន្តែគេប្រាប់ថា រថយន្តខាងលើជួលគេដឹកប្រុងទៅច្រករបៀងដែលខ្លួនឆ្លងកាត់ តែមិនទាន់ទៅដល់គោលដៅផង ក៏ត្រូវសមត្ថកិច្ចចាប់តែម្តង។
បើទោះជាប្រភពនានាសង្ស័យថា រថយន្តខាងលើអាចលួចឆ្លងដែនតាមច្រករបៀង ក្នុងខេត្តបន្ទាយមានជ័យ ពិសេសក្នុងស្រុកថ្មពួក តែត្រូវសមត្ថកិច្ចយោធា និងនគរបាលការពារព្រំដែនបដិសេធ ។
តាមប្រភពព័ត៌មានបានបន្តថា រថយន្តខាងលើមិនអាចដំណើរការបាន ដោយសារត្រូវម្ចាស់ផ្តាច់ប្រព័ន្ធGPS កុំអីរថយន្តខាងលើទៅដល់គោលដៅយ៉ាងរលូនបាត់ទៅហើយ។
ម្ចាស់រថយន្តក៏ដូចជាមន្ត្រីនិងសមត្ថកិច្ចថៃបានថ្លែងអំណរគុណដល់មន្ត្រីនិងសមត្ថកិច្ចកម្ពុជាដែលបានជួយទប់ស្កាត់និងស្រាវជ្រាវរកឃើញរថយន្តនេះវិញ។
ពាក់ព័ន្ធនឹងករណីខាងលើនេះ គិតមកត្រឹមវេលាម៉ោង៤និង១នាទីថ្ងៃទី១១ កញ្ញា នេះ ក៏មានការឃាត់ខ្លួនមនុស្សចំនួន៤នាក់ផងដែរ ប៉ុន្តែនៅពេលធ្វើការសាកសួរ គឺកងរាជអាវុធហត្ថអះអាងថា មនុស្សចំនួន៣នាក់គឺជាកម្មករស៊ីឈ្នួលដឹកទេ ដោយសាររកឃើញថា អ្នកទាំង៣មិនមានពាក់ព័ន្ធក៏ដោះលែងឱ្យត្រឡប់ទៅវិញ ដោយឡែកឃាត់ខ្លួនតែជនជាតិថៃម្នាក់ដែលជាប់ពាក់ព័ន្ធលួចយករថយន្តគេតែប៉ុណ្ណោះ ហើយកំពុងបន្តនីតិវិធីនៅតុលាការខេត្ត ៕ (កែសម្រួលដោយ ៖ ធីតា)
ចែករំលែកព័តមាននេះ