រឿងរ៉ាវលោក សម រង្ស៊ី ប្រកាសចូលស្រុកនៅតែក្តៅ …
- បាត់ដំបង
ខេត្តបាត់ដំបង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថា លោក សម…
ខេត្តបាត់ដំបង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថា លោក សម…
ខេត្តបាត់ដំបង ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាក់ថា លោក សម រង្ស៊ី មកកម្ពុជាគ្មានបំណងមករៀបចំគណបក្សឡើងវិញទេ គឺមកដើម្បីដឹកនាំធ្វើបាតុកម្មផ្តួលរំលំរាជរដ្ឋាភិបាលតែប៉ុណ្ណោះ តែកម្ពុជាត្រូវរក្សាសុខសន្តិភាព ស្ថិរភាព ពីនេះទៅដល់ដំណាច់ឆ្នាំ២០១៩ គឺជាវគ្គទី១ ដែលត្រូវរួមគ្នាធ្វើយ៉ាងណាឲ្យបាន ។
សម្តេចក្រឡាហោម បានលើកឡើងក្នុងកិច្ចប្រជុំបូកសរុបលទ្ធផលនៃការចុះធ្វើវេទិកាសាធារណៈរបស់ក្រុមការងារថ្នាក់ជាតិចុះមូលដ្ឋានខេត្តបាត់ដំបងកាលពីថ្ងៃទី៥ ខែកញ្ញាថា៖ «ខ្ញុំតែងនិយាយថា សន្តិភាព ស្ថិរភាព វាមាន ប៉ុន្តែមានអ្នកប៉ុនប៉ងបំផ្លាញសន្តិភាព ស្ថិរភាព ។ អុីចឹងវាខុសគ្នាថា យើងមិនទាន់មានសុខសន្តិភាព ស្ថិរភាព អាហ្នឹងរឿងមួយ ប៉ុន្តែយើងមានហើយតែមានអ្នកគំរាមកំហែងនេះមានរូបភាពខុសគ្នា ។យើងបានដឹងស្រាប់ហើយថា គណបក្សសង្គ្រោះជាតិ ដែលត្រូវបានរំលាយហើយគឺនៅតែចចេស រឹងរូសមិន ព្រមទទួលស្គាល់កំហុសរបស់ខ្លួនដែលឃុបឃិតជាមួយបរទេសដើម្បីធ្វើបដិវត្តន៍ពណ៌ផ្តួលរំលំរាជ រដ្ឋាភិបាលដែលកើតចេញពីការបោះឆ្នោត» ។
សម្តេចក្រឡាហោមបានលើកឡើងថា គេនៅតែបន្តធ្វើសកម្មភាពដូចជា ធ្វើចលនាសង្គ្រោះជាតិដែលមិនបានចុះបញ្ជីនៅក្រសួងមហាផ្ទៃហើយប៉ុនប៉ងដើម្បីដឹកនាំចលនាបដិវត្តន៍ដោយគេប្រកាសថា សម រង្ស៊ី នឹងចូលស្រុកនៅថ្ងៃទី៩ ខែវិច្ឆិកា ឆ្នាំ២០១៩នេះ ។ ចំពោះការប្រកាសវិលចូលស្រុករបស់លោកសម រង្ស៊ី ត្រូវបានសម្តេចក្រឡាហោម ស ខេង គូសបញ្ជាក់ថា ៖ «សម រង្ស៊ី មកលើកនេះមិនមែនដើម្បីរៀបចំគណបក្សតាមគោលការណ៍លទ្ធិប្រជាធិបតេយ្យទេ គឺមកដើម្បីដឹកនាំកម្លាំងធ្វើបាតុកម្មផ្តួលរំលំរាជរដ្ឋាភិបាល តាមរយៈគេ ហៅថាបដិវត្តន៍ពណ៌នោះ» ។
សម្តេចក្រឡាហោមសង្កត់ធ្ងន់ថា «អីុចឹងខ្ញុំសូមបញ្ជាក់ថា នៅក្នុងរដ្ឋធម្មនុញ្ញឆ្នាំ១៩៩៣ ចែងថា ព្រះរាជាណាចក្រកម្ពុជាបានប្រកាន់យករបបប្រជាធិបតេយ្យសេរីពហុបក្ស ហើយចំណុចនេះមិនអាចនរណាកែប្រែបានទេ ។ ការធ្វើបដិវត្តន៍ពណ៌មានន័យថា ការរធ្វើរដ្ឋប្រហារ រដ្ឋធម្មនុញ្ញក៏អាចថាបានដែរ» ។ សម្តេចក្រឡាហោមបានលើកឡើងថា សម រង្ស៊ី តែងតែអួតថា ជាអ្នកប្រជាធិបតេយ្យ តាមពិត គេមកនេះមិនមែនមកដើម្បីរៀបចំគណបក្ស ដើម្បីធ្វើការប្រកួតប្រជែងតាមការបោះឆ្នោតទេ គឺគេមកដើម្បីផ្តួលរំលំរាជរដ្ឋាភិបាលប៉ុណ្ណោះ ។
តើប្រជាធិបតេយ្យនៅត្រង់ណា? តាមទម្រង់បដិវត្តន៍នៅតាមបណ្តាប្រទេសមួយចំនួន យើងមិនអាចទទួលយកបានទេ ។ អាហ្នឹងយើងត្រូវគូសបញ្ជាក់អំពីបញ្ហានេះ ។ សម្តេចក្រឡាហោម ស ខេង បន្ថែមថា តាមស្មារតីរដ្ឋធម្មនុញ្ញចែងថា ប្រជាពលរដ្ឋមានសិទ្ធិធ្វើនយោបាយ មានសិទ្ធិក្នុងការជួបជុំ មានសិទ្ធិក្នុងការនិយាយស្តី បញ្ចេញមតិ និងមានសិទ្ធិគ្រប់បែបយ៉ាងផ្សេងទៀត ស្របតាមច្បាប់ដែលមានធរមាន ។ រដ្ឋធម្មនុញ្ញបានចែងពីសិទ្ធិរួចហើយ អុីចឹងការបង្កើតគណបក្សនយោបាយ ការបង្កើតសមាគមត្រូវមានច្បាប់ អីុចឹងច្បាប់ជាអ្នកកំណត់សិទ្ធិថាស្របឬមិនស្រប ។
សម្តេចក្រឡាហោមបានបន្ថែមថា អង្គការសង្គមស៊ីវិលដែលបង្កើតឡើង ទាល់តែចុះបញ្ជីនៅក្រសួងមហាផ្ទៃទើបអាចធ្វើសកម្មភាពបាន។ គណបក្សដែលរំលាយហើយ មិនមានឈ្មោះ នៅក្រសួងមហាផ្ទៃទេ ។ អង្គ ការក្រៅរដ្ឋាភិបាលឬចលនាជារណសិរ្សមួយដែលមិនបានចុះបញ្ជីនៅក្រសួងមហាផ្ទៃ ដែលហៅចលនាសង្គ្រោះជាតិនោះ ហ្នឹងក៏ខុសច្បាប់ដែរ ។
ដូច្នេះ ការជួបប្រជុំទាំងឡាយណានៅក្រោមស្លាកគណបក្សដែលបានចុះបញ្ជីនៅក្រសួងមហាផ្ទៃ ឬអង្គការមិនមែនរដ្ឋាភិបាលដែលបានចុះបញ្ជីនៅក្រសួងមហាផ្ទៃ គឺស្របច្បាប់យើងលើកទឹកចិត្តតាមគោលការណ៍លទ្ធិប្រជាធិបតេយ្យ ។ ប៉ុន្តែការជួបជុំទាំងឡាយណាក្រោមស្លាកគណបក្សសង្គ្រោះជាតិ ដែលគណបក្សនេះត្រូវបានរំលាយហើយ ការជួបជុំក្រោមរណសិរ្ស ឬអង្គការចាត់តាំងមួយដែលមិនបានចុះបញ្ជីនៅក្រសួងមហាផ្ទៃ ដែលហៅចលនាសង្គ្រោះជាតិនោះគឺខុសច្បាប់ ដើម្បីយើងពន្យល់ប្រជាពលរដ្ឋ ។
សម្តេចក្រឡាហោម បានលើកឡើងទៀតថា កន្លងមកនេះមានកម្មវិធីហូបនំបញ្ចុកជាកម្មវិធីជួបជុំនយោបាយ ។ ប៉ុន្តែការជួបជុំផឹកកាហ្វេតែ ស្រា ក៏អាចជួបជុំធ្វើនយោបាយបានដែរ ត គ្រាន់តែថាតើជួបជុំក្រោមស្លាកអ្វី? បើអ្នកធ្វើនយោបាយ តើក្រោមស្លាកគណបក្ស នយោបាយណា?បើអ្នកធ្វើនយោបាយ ឬធ្វើក្រោមស្លាកគណបក្សដែលបានរំលាយហើយ ឬក្រោមស្លាកគណបក្សដែលចុះបញ្ជីនៅក្រសួងមហាផ្ទៃតាមច្បាប់ ឬក្រោមស្លាកអង្គការសង្គមស៊ីវិលតាមច្បាប់ ឬក្រោមអង្គការណា ឬរណសេរ្សណាមិនស្របច្បាប់ ។
សម្តេច ស ខេង គូសបញ្ជាក់ថា ៖«បើធ្វើក្រោមស្លាកអង្គការចាត់តាំងមួយ ឬអង្គការមិនបានចុះបញ្ជី ឬបានចុះបញ្ជីហើយតែបានលុបចោលដោយសារកំហុសនោះគឺខុសច្បាប់មិនថាជួបជុំហូបនំបញ្ចុក ឬមិននំបញ្ចុកទេ ។ ឥឡូវនេះ មិនសូវមានឮជួបគ្នា វាមិនសំខាន់ទេការជួបជុំគ្នាសំខាន់នោះការជួបជុំក្រោមស្លាកគណបក្សស្របច្បាប់ ឬមិនស្របតែប៉ុណ្ណោះ»។
ជាមួយគ្នានេះ សម្តេចក្រឡាហោមបានអះអាងថា មូលហេតុដែលរំលាយគណបក្សសង្គ្រោះជាតិ ដោយសារមេដឹកនាំគណបក្សនេះឃុបឃិតជាមួយបរទេសដើម្បីធ្វើបដិ វត្តន៍ពណ៌ផ្តួលរំលំរាជរដ្ឋាភិបាលស្រប ច្បាប់ និងបដិសេធលទ្ធផលបោះឆ្នោតឆ្នាំ២០១៣ ព្រមទាំងចឹញ្ចឹមគំនិត ដើម្បីធ្វើបដិវត្តន៍នៅពេលខាង
មុខ ។
សម្តេចក្រឡាហោមថ្លែងថា ៖ «វាមាន៣ចំណុចបើនិយាយឲ្យអស់គឺ ទី១-ឃុបឃិតជាមួយបរទេស
ដើម្បីផ្តួលរំលំរាជរដ្ឋាភិបាលកើតចេញពីការបោះឆ្នោត(អាណត្តិទី៤) ទី២-បដិសេធលទ្ធផលបោះឆ្នោត
ឆ្នាំ២០១៣ និងទី៣-ប៉ុនប៉ងផ្តួលរំលំរាជរដ្ឋាភិបាលឆ្នាំ២០១៨ ។ អុីចឹងមាន៣ករណីដំណាក់កាលផ្សេង ហើយអួតថាអ្នកប្រជាធិបតេយ្យ និងស្នេហាជាតិ» ។
សម្តេចក្រឡាហោម ថ្លែងថា គោលការណ៍របស់យើងគឺរក្សាសន្តិភាព និងប្រឆាំងដាច់ខាតមិនឲ្យពួកនេះ(ពួកប្រឆាំង)ធ្វើសកម្មភាពបានឡើយ ។ ដើម្បីទប់ស្កាត់ យើងរៀបចំកម្លាំងជំនាញ កម្លាំងនគបាលប្រដាប់អាវុធត្រៀមរួចហើយ ប៉ុន្តែអ្វីដែលសំខាន់នោះគឺការពន្យល់ផ្សព្វផ្សាយដល់ប្រជាពលរដ្ឋឲ្យបានយល់ពីបញ្ហានេះ ដើម្បីចៀសវាងគាត់មិនចូលរួម ឬបដិសេធមិនចូលរួមជាមួយសកម្មភាពនេះ ។
លោក សម រង្ស៊ី អតីតប្រធានគណបក្សសង្គ្រោះជាតិ បានបញ្ជាក់ជំហរថានៅតែចូលមកកម្ពុជាវិញដូចការគ្រោងទុក គឺនៅថ្ងៃទី៩ ខែវិច្ឆិកា ខាងមុខនេះ ប៉ុន្តែអ្នកនាំពាក្យគណបក្សប្រជាជនកម្ពុជាបានគូសបញ្ជាក់ថា មកតាមណាក៏ត្រូវវ៉ៃខ្នោះដាក់គុកដែរ ។លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងតាមប្រព័ន្ធតេឡេ ក្រាម នៅថ្ងៃទី៨ ខែកញ្ញាថា ទោះបីទណ្ឌិត សម រង្ស៊ី ឆ្លងចូលតាមច្រកព្រំដែនណាក៏ដោយ ក៏ទណ្ឌិតមេឧទ្ទាមក្រៅច្បាប់នេះនៅតែទទួលស្វាគមន៍ដោយខ្នោះដៃក្រវាត់ទៅក្រោយតាមស្តង់ដារអាមេរិកដដែល ។
លោក សុខ ឥសាន ថ្លែងថា លោក សម រង្ស៊ីបានបង្កើតក្រុមជីហាត ដេីម្បីបង្កេីតបាតុភាពហិង្សាធ្ងន់ធ្ងរនៅថ្ងៃទី៩ ខែវិច្ឆិកា ដែលខ្លួនប្រកាសថាចូលស្រុកនោះ ។ ទណ្ឌិតមេឧទ្ទាមក្រៅច្បាប់ បានបង្កេីតក្រុមជីហាតរបស់ខ្លួននៅតាមបណ្តាខេត្ត ដោយក្នុងមួយខេត្តគេផ្តល់លុយ១០.០០០ដុល្លារ ដែលក្នុងម្នាក់បានទទួលរបប១០០ដុល្លារ ក្នុងការស្លាប់ជំនួសទណ្ឌិតមេឧទ្ទាមក្រៅច្បាប់ ។
ចំណែកលោក សម រង្ស៊ី បានលើកឡើងលើបណ្តាញសង្គមនៅថ្ងៃទី៨ ខែកញ្ញាថា ខ្ញុំបានស្គាល់ការនិរទេសខ្លួនយូរអង្វែងមកហើយ ។ វាជាការឈឺចាប់មួយក្នុងជីវិតរបស់ខ្ញុំ តែវាគ្រាន់បើជាងការត្រូវគេលួចសម្លាប់ ឬការដែលត្រូវគេចាប់ដាក់គុក ដែលជាវាសនាចៀសមិនផុតរបស់មេដឹកនាំគណបក្សប្រឆាំងនៅកម្ពុជាមកដល់ពេលនេះ ។
លោកបញ្ជាក់ថា «ខ្ញុំបានសម្រេចវិលត្រឡប់ទៅប្រទេសកំណើតរបស់ខ្ញុំវិញ ក្នុងឆ្នាំ២០១៩ នេះទោះជាត្រូវប្រឈមនឹងដីកាផ្តន្ទាទោសយ៉ាងទម្ងន់និងដីកាចាប់ខ្លួនជាច្រើនយ៉ាងណាក៏ដោយ ។ ការតស៊ូរបស់ខ្ញុំរយៈពេល២៥ឆ្នាំកន្លងទៅនេះ ដើម្បីទាមទារលទ្ធិប្រជាធិបតេយ្យ ជូនប្រជារាស្ត្រ ។លោក សម រង្សុី គូសបញ្ជាក់ថា ៖ «ខ្ញុំបានយកថ្ងៃ៩ វិច្ឆិកា ខាងមុខនេះ ធ្វើជាថ្ងៃមាតុភូមិនិវត្តន៍របស់ខ្ញុំ ។ ថ្ងៃនោះគឺជាថ្ងៃបុណ្យឯករាជ្យសម្រាប់ប្រទេសកម្ពុជាផង ហើយក៏ជាថ្ងៃរំឭកការដួលរលំនៃជញ្ជាំងទីក្រុងប៊ែរឡាំងផង ដែលជានិមិត្តរូបនៃការទាមទារសេរីភាព ប្រកបដោយជោគជ័យសម្រាប់ពិភពលោកទាំងមូល ៕
ចែករំលែកព័តមាននេះ