រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា រឿងរ៉ាវស្ត្រីម៉ាស្សាដៃងាយ ឱ្យតែភ្ញៀវប្រហែស គឺច្បាស់ហើយបាត់អស់លុយ ហើយជារឿងដដែលៗ កើតញយដងមកហើយ ខណៈឃាត់ខ្លួនបានរួចសម្របសម្រួលឲ្យទៅវិញ បែរជាបន្តលួចលុយភ្ញៀវទៀត ។
សេចក្តីរាយការណ៍បន្តថា ដូចជាករណីនេះ គឺនៅម៉ោង៩និង៤៥នាទីយប់ ថ្ងៃទី០៧ ខែកញ្ញា ឆ្នាំ២០១៩ នេះផងដែរ ខណៈនគរបាលប៉ុស្តិ៍កាកាប១ ខណ្ឌពោធិ៍សែនជ័យ បានហៅនាំស្ត្រី២នាក់ដែលប្រកបរបរម៉ាស្សានៅតាមផ្លូវ២០០៤ ភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ មកសាកសួរ ក្រោយពីមានបណ្តឹងចោទប្រកាន់ពីបុរសម្នាក់ដែលចូលម៉ាស្សា ហើយត្រូវនាងៗខាងលើ បានប្រើល្បិចបន្លំលួចលុយពិតអស់៤០០ដុល្លារ រួចប្តូរដាក់ឲ្យវិញនូវលុយដុល្លារសែនខ្មោចចំនួន៤សន្លឹកផងដែរ ។
សេចក្តីរាយការណ៍បន្តថា ពាក់ព័ន្ធករណីខាងលើនេះ ទាំងបុរសជាជនរងគ្រោះ និងនារីម៉ាស្សាទាំង២នាក់នេះ ដែលត្រូវជាជនជាប់ចោទនេះ គឺមិនត្រូវបានឱ្យស្គាល់អត្តសញ្ញាណនោះទេ ។
តាមសម្តីបុរសរងគ្រោះបានឲ្យដឹងថា កាលពីរសៀលថ្ងៃទី០៧ ខែកញ្ញានេះ គាត់មិនស្រួលខ្លួនក៏បានទៅឲ្យស្ត្រីម៉ាស្សាខាងលើកោសជប់ឲ្យ ឆ្លៀតឱកាសល្អត្រូវនាងៗលួចលុយអស់៤០០ដុល្លារដោយមិនបានចាប់អារម្មណ៍នោះទេ លុះរហូតដល់ម៉ោង៦ល្ងាចថ្ងៃដដែល គាត់ទៅរកទិញឥវ៉ាន់ ទើបដឹងថា បាត់លុយពិតអស់៤០០ដុល្លារ តែឃើញលុយសែនខ្មោច៤សន្លឹកទៅវិញ ឃើញដូច្នេះគឺមានតែរត់ទៅប្តឹងប៉ូលិស ហើយនៅម៉ោងខាងលើនោះផងដែរ សមត្ថកិច្ចក៏ចុះទៅហៅនាំស្ត្រីម៉ាស្សា២នាក់ទៅសាកសួរនៅប៉ុស្តិ៍កាកាប១តែម្តង ។ (កែសម្រួលដោយ ៖ បុប្ផា)
ចែករំលែកព័តមាននេះ