(រាជធានីភ្នំពេញ)៖ ក្នុងន័យជួយសម្រួលដល់ភ្ញៀវទេសចរអន្តរជាតិក៏ដូចជាអ្នកវិនិយោគិនបរទេសក្នុងការធ្វើដំណើរមកទស្សនានិងវិនិយោគនៅកម្ពុជានោះ ក្រសួងទេសចរណ៍បានចេញសេចក្តីជូនដំណឹងថ្មីមួយនៅថ្ងៃទី០១ ខែកញ្ញា ឆ្នាំ២០១៩នេះ ស្តីអំពី «ការសម្រួលការធ្វើដំណើររបស់ភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេស» ក្នុងន័យលុបចោលនូវរបាំង ឬការងារមិនចាំបាច់មួយចំនួនដែលបានបង្ករការរំខាន ឬបង្កើតនូវភាពយឺតយ៉ាវក្នុងការបំពេញឯកសាររបស់អ្នកដំណើរនិងភ្ញៀវទេសចរអន្តរជាតិមកកាន់កម្ពុជា ។
ក្នុងន័យនេះ ក្រសួងទេសចរណ៍ បានបញ្ជាក់ថាការនូវចេញសេចក្តីជាថ្មីម្តងទៀតនេះគឺធ្វើឡើង «ក្នុងគោលបំណងដើម្បីសម្រួលការធ្វើដំណើរ និងកាត់បន្ថយរបាំងមិនចាំបាច់ ជូនភ្ញៀវទេសចរអន្តរជាតិដែលចូលមកទស្សនាកម្ពុជា» នោះក្រសួងទេសចរណ៍បានសហការជាមួយក្រសួងមហាផ្ទៃ (អគ្គនាយកដ្ឋានអន្តោប្រវេសន៍) ក្រសួងសេដ្ឋកិច្ច និងហិរញ្ញវត្ថុ (អគ្គនាយកដ្ឋានគយ និងរដ្ឋាករកម្ពុជា) ក្នុងការសម្រួលបែបបទនៃការធ្វើដំណើរមួយចំនួន ដូចជា៖ ១៖ អំពីសាលាកបត្រចូល ចេញប្រទេស និងបែបបទស្នើសុំទិដ្ឋាការ៖ *)- បែបបទនៃការបំពេញសាលាកបត្រចូល ចេញ និងស្នើសុំទិដ្ឋាការពេលមកដល់ ត្រូវបានបញ្ចូលគ្នាតែមួយសន្លឹក ដោយមានជាភាសាខ្មែរ ចិន និងអង់គ្លេស។ *)- ភ្ញៀវទេសចរបំពេញបែបបទចូលតែម្តងគត់ ហើយពេលត្រឡប់ចេញទៅវិញ មិនតម្រូវឲ្យបំពេញបែបបទទៀតទេ និងមិនត្រូវការរូបថតឡើយ។ *) ចំពោះពលរដ្ឋខ្មែរដែលធ្វើដំណើរចេញ និងចូលប្រទេសដែលកាន់លិខិតឆ្លងដែនអេឡិចត្រូនិចខ្មែរ (E-Passport) មិនតម្រូវឲ្យបំពេញបែបបទទេ។
សេចក្តីសម្រេចដដែលបានបញ្ជាក់ថា ចំនុចទី២ដែលត្រូវសម្រួលដែរនោះ គឺ ២៖ អំពីបែបបទចូល ចេញតាមច្រកទ្វារព្រំដែនអន្តរជាតិ ៖ *) ភ្ញៀវទេសចរដែលបើកបរដោយខ្លួនឯង (Self Driving Tours) មានបំណងចូលមកទស្សនាក្នុងប្រទេសកម្ពុជា ដោយប្រើប្រាស់មធ្យោបាយធ្វើដំណើរផ្ទាល់ខ្លួន នាំចូលបណ្តោះអាសន្ន និងចេញទៅវិញតាមច្រកទ្វារព្រំដែនអន្តរជាតិនានាទូទាំងប្រទេស អាចបំពេញប្រតិវេទន៍គយសង្ខេប សម្រាប់មធ្យោបាយធ្វើដំណើរចូល-ចេញបណ្តោះអាសន្នរបស់ភ្ញៀវទេសចរ (Summary declaration form for temporary entry-exit of conveyance of tourists) ជាមួយមន្ត្រីគយច្រកទ្វារតែម្តង។ និង *) ភ្ញៀវទេសចរមិនចាំបាច់បង់ប្រាក់និមុត្តិធានា (Deposit) និងថ្លៃធានារ៉ាប់រងឡើយ។
សូមរម្លឹកថាកម្ពុជាកំពុងខិតខំប្រឹងប្រែងក្នុងការទាក់ទាញភ្ញៀវទេសចរបរទេសមកទស្សនាកម្ពុជាឲ្យបានច្រើនជាលំដាប់ ជាពិសេសគឺការផ្តោតការទាក់ទាញទេសចរចិនតែម្តង ជាក់ស្តែងចំនួនជនជាតិចិនមកទស្សនា និងវិនិយោគនៅក្នុងប្រទេសកម្ពុជាក្នុងឆ្នាំ ២០១៨ កន្លងមក បានចំនួនប្រមាណជាង ២លាននាក់ កើនឡើង៦៧ ភាគរយ បើធៀបនឹងឆ្នាំ ២០១៧។ ដែលក្នុងនោះនាឆ្នាំ ២០១៨ កន្លងមកទេសចរជនជាតិចិន បានមកម្ពុជាមានរហូតជាង ២លាននាក់ តាមពីក្រោយដោយទេសចរវៀតណាមមាន ៨០ម៉ឺននាក់ ឡាវជាង ៤២ ម៉ឺននាក់ ថៃជាង ៣៨ម៉ឺន នាក់ កូរ៉េ ៣០ម៉ឺននាក់ សហរដ្ឋអាមេរិក ២៥ម៉ឺននាក់ ជប៉ុន២១ ម៉ឺននាក់ ម៉ាឡេស៊ី ២០ម៉ឺននាក់ បារាំង ១៧ម៉ឺននាក់ និងអង់គ្លេស១៦ម៉ឺននាក់។ ក្នុងនោះដែរ ពួកគេបានធ្វើដំណើរតាមផ្លូវអាកាស សរុបជាង ៤លាននាក់ ខណៈផ្លូវគោក និងផ្លូវទឹកមានចំនួនសរុបជាង ២លាននាក់។
ជាងនេះទៅទៀតពាក់ព័ន្ធឹនឹងការពង្រឹងវិស័យទេសចរណ៍ ដែលជាឧស្សាហកម្មគ្មានផ្សែងរបស់កម្ពុជានោះ គឺកម្ពុជាបានកំណត់គោលដៅទាក់ទាញទេសចរបរទេសនៅឆ្នាំ២០២០ខាងមុខដោយកម្ពុជារំពឹងថា នឹងទទួលបានភ្ញៀវទេសចរចិនប្រមាណ ៣ លាននាក់ ហើយនឹងកើនឡើងដល់ ៥ លាននាក់នៅ ឆ្នាំ ២០២៥ និង ៨ លាននាក់នៅឆ្នាំ ២០៣០។
ហេតុដូច្នេះហើយទើបក្រសួងពាក់ព័ន្ធខិតខំលុបបំបាត់នូវរបាំងមួយចំនួនដែលនាំឲ្យប៉ះពាល់ដល់ភ្ញៀវទេសចរបរទេស ក៏ដូចជាការបង្កើតនូវផលិតផលទេសចរណ៍ថ្មីៗបន្ថែមទៀត ក្រៅពីតំបន់អង្គរ ខេត្តសៀមរាបនោះ ៕ កែសម្រួលដោយ ៖ សុឃាក់
ចែករំលែកព័តមាននេះ