ខេត្តកំពង់ឆ្នាំង ៖ ភ្លើងឆេះព្រៃចំនួន២កន្លែងផ្សេងគ្នា និងរំលងគ្នាតែ១ថ្ងៃប៉ុណ្ណោះ បង្កើតនូវមហន្តរាយដ៏ធ្ងន់ធ្ងរ កើតមានឡើងនៅស្រុកទឹកផុស បណ្តាលឱ្យកុមារីអាយុ៤ឆ្នាំម្នាក់ស្លាប់ក្នុងអណ្តាតភ្លើង និងខូចខាតដំណាំរួមទាំងផ្ទះវីឡាមួយខ្នង ដែលតាមការប៉ាន់ប្រមាណរបស់មន្ត្រីនគរបាលមានការខូចខាតគិតជាប្រាក់ជាង៦០ម៉ឺនដុល្លារ កាលពីថ្ងៃទី៨ និង១០ មីនា នៅភូមិវាលស្បូវ ឃុំតាំងក្រសាំង និងភូមិភ្នំតាអុស ឃុំគ្រាំងស្គា ស្រុកទឹកផុស ។
លោកខែម វិបុល អធិការនគរបាលស្រុកទឹកផុសបានឱ្យដឹងថា ភ្លើងឆេះព្រៃនេះករណីទី១បានកើតឡើងនៅវេលាម៉ោង៣និង៣០នាទីរសៀលថ្ងៃទី៨ មីនា នៅក្នុងភូមិវាលស្បូវ ឃុំតាំងក្រសាំង ស្រុកទឹកផុស បណ្តាលឱ្យឆេះចម្ការនិងវីឡាដ៏ធំមួយពេលដែលម្ចាស់ចម្ការនិងកម្មករមិននៅ ធ្វើឱ្យខូចខាតអស់ប្រាក់រាប់ម៉ឺនដុល្លារ ។ នេះបើយោងតាមរបាយការណ៍លេខ១៧៧ របក ចុះថ្ងៃទី៩ មីនា របស់ស្នងការដ្ឋាននគរបាលខេត្ត ។ ក្នុងរបាយការណ៍ដដែលបញ្ជាក់ថា ម្ចាស់កសិដ្ឋានខាងលើនេះ ឈ្មោះច័ន្ទ ឆៃយ៉ា ភេទប្រុស ។ ចំពោះការខូចខាតមានវីឡា១ខ្នង កម្ពស់២ជាន់ មានទំហំ១៣,៥០ម៉ែត្រ គុណនឹង២៥ម៉ែត្រ ឆេះអស់គ្រឿងឈើមានទ្វារបង្អួចនិងរោងដោលជាដើម ។ ក្រៅពីនោះឆេះខ្ទេចរោងបណ្តុះផ្សិត និងធ្វើមេផ្សិត១ខ្នងទំហំ៩ម៉ែត្រ គុណ២០ម៉ែត្រ មាស៊ីនបូមទឹក៣គ្រឿង ម៉ាស៊ីនភ្លើង១គ្រឿង ឈើ៤,៥០ម៉ែត្រគូប បង្គោលក្រាក់២០០ដើម ដើមស្វាយ១.២០០ដើម ដើមដូង៤.៥០០ដើម និងសម្ភារប្រើប្រាស់ជាច្រើនទៀត ។
ជាមួយនេះ ក៏មានព័ត៌មានថាមានងាប់ឆ្កែ២ក្បាលទៀត ព្រោះម្ចាស់ផ្ទះបានចិញ្ចឹមឆ្កែជាច្រើនក្បាលទុកចាំចម្ការនិងផ្ទះ ។ នៅក្នុងករណីនេះ លោកស្នងការនគរបាលខេត្តបានអន្តរាគមន៍ប្រើប្រាស់រថយន្តពន្លត់អគ្គិភ័យចំនួន៣គ្រឿងទៅជួបបាញ់ទឹកពន្លត់ភ្លើងឆេះព្រៃ វីឡា និងចម្ការទើបគ្រប់គ្រងសភាពការណ៍ខាងលើនេះបាន ឡើងវិញ ។ ប៉ុន្តែទោះបីជាយ៉ាងណាក៏ដោយ មកដល់ល្ងាចថ្ងៃទី១១ មីនា នៅមានភ្លើងឆេះគំនរអង្កាមហុយៗនៅឡើយ ។ ដោយឡែក ករណីភ្លើងឆេះព្រៃទី២ បានកើតឡើងនៅវេលាម៉ោង១និង១៥នាទីរសៀលថ្ងៃទី១០ មីនា ក្នុងភូមិភ្នំតាអុស ឃុំគ្រាំងស្គា បណ្តាលឱ្យកុមារីម្នាក់ឈ្មោះលឿង ស្រីល័ក្ខណ៍អាយុ៤ឆ្នាំ រស់នៅក្នុងភូមិ-ឃុំខាងលើស្លាប់យ៉ាងអាណោចអាធ័មដោយសារភ្លើងឆេះព្រៃ ដែលបានឆេះរាលដាលនៅក្នុងចម្ការ ។ ឪពុកកុមារីរងគ្រោះ ឈ្មោះឡុន លឿង អាយុ៣៥ឆ្នាំ ម្តាយឈ្មោះព្រឿង សំណាង អាយុ៣៤ឆ្នាំ ។ គ្រួសារនេះមានកូន៣នាក់ និងមានមុខរបរធ្វើស្រែចម្ការ ។
សមត្ថកិច្ចមូលដ្ឋានបានឱ្យដឹងថា មុនដំបូងភ្លើងព្រៃបានឆេះក្នុងចម្ការក្បែរខ្ទមរបស់គ្រួសារនេះរស់នៅ ពេលនោះបុរសជាប្តីនិងប្រពន្ធបាននាំគ្នាកាច់មែកឈើយកទៅវាយពន្លត់ភ្លើងព្រៃនោះ តែពន្លត់មិនឈ្នះក៏រាលដាលឆេះដល់ពំនូក ចំបើុង ។ ក្នុងពេលខំពន្លត់ភ្លើងព្រៃទាំង២នាក់ប្តីប្រពន្ធនេះ ពួកគាត់មិនដឹងថា កូនស្រីរត់មកតាមពីក្រោយនោះទេ ។ លុះពេលភ្លើងព្រៃស្ងប់បន្តិចគាត់បានមកខ្ទមវិញ តែរកកូនស្រីមិនឃើញក៏នាំប្រពន្ធដើររក ហើយបានរកឃើញសព កូនស្រីក្នុងគំនរផេះចំបើុង ឆេះរោលខ្លោចរួញក្រញង់ទៅហើយ ។ សពកុមារីរងគ្រោះ ត្រូវបានក្រុមគ្រួសារយកធ្វើបុណ្យតាមប្រពៃណីនៅឯលំនៅឋានដោយក្តីអាលោះអាល័យនិងយ៉ាងសោកសង្រេង បំផុត ៕
ចែករំលែកព័តមាននេះ