ខេត្តកំពង់ធំ ៖ ល្បែងបញ្ជល់មាន់ និងអាប៉ោងយ៉ាងដុះស្លែកំពុងប្រព្រឹត្តទៅដោយរលូននៅលើទឹកដីនៃស្រុកបារាយណ៍ គឺមានរាប់ឆ្នាំមកហើយ ដោយសារតែសមត្ថកិច្ច និងអាជ្ញាធរមួយចំនួនបានបើកភ្លើងខៀវ ទើបដំណើរការបានល្អឥតខ្ចោះមកទល់បច្ចុប្បន្ន ។ មេអាប៉ោង និងជាម្ចាស់សង្វៀនបញ្ជល់មាន់ដ៏ល្បីរន្ទឺនៅស្រុកបារាយណ៍ ហើយត្រូវបានអ្នកស្រុកស្គាល់ស្ទើរគ្រប់គ្នាឈ្មោះ ជ័យ ផល្លា ភេទប្រុស អាយុ៤៥ឆ្នាំ មានទីលំនៅភូមិនាងល្អ ឃុំទ្រៀល ស្រុកបារាយណ៍ ។
កន្លងមកនគរបាល កងរាជអាវុធហត្ថធ្លាប់ចុះបង្ក្រាប ព្រមទាំងធ្វើកិច្ចសន្យាជាច្រើនលើកច្រើនសាមកហើយដែរ បុ៉ន្តែនៅតែមិនឈប់ ។ លុះដល់យូរៗទៅ ក៏បានស្គាល់ចិត្តថ្លើមគ្នាជាមួយសមត្ថកិច្ច និងអាជ្ញាធរភូមិ ឃុំ ស្រុក រហូតដល់ពោះវៀនបត់ជន្ទៀស ខ្លះយល់ព្រមទទួលសំណែនពីបនល្បែងខាងលើ ទើបអាចប្រព្រឹត្តទៅបានយ៉ាងរលូន ។ កាលពីឆ្នាំ២០១៣ លោកសឿន មុនីរ័ត្ន ព្រះរាជអាជ្ញារងអមសាលាដំបូងខេត្តកំពង់ធំ បានដឹកនាំកម្លាំងចុះទៅបង្ក្រាបម្តងដែរ តែលោកជ័យ ផល្លា នៅតែមិនរាងចាលដដែល នៅតែលួចប្រព្រឹត្តដដែល ធ្វើឱ្យមានផលប៉ះពាល់ និងជះឥទ្ធិពលអាក្រក់យ៉ាងខ្លាំងដល់គោលនយោបាយភូមិ-ឃុំមានសុវត្ថិភាពទាំង៩ចំណុច ។
លោកឧត្តមសេនីយ៍ត្រី ផាន់ សុផេង ស្នងការប៉ូលិសខេត្ត តែងតែមានប្រសាសន៍ផ្តាំផ្ញើ និងសំណូមពរយ៉ាងទទូចម្តងហើយម្តងទៀតដល់មន្ត្រីនគរបាលទាំងអស់គ្រប់ក្រុង-ស្រុកទូទាំងខេត្ត ត្រូវនាំគ្នាអនុវត្តឱ្យបាននូវគោលនយោបាយភូមិ-ឃុំមានសុវត្ថិភាពរបស់ក្រសួងមហាផ្ទៃ ជាពិសេសគឺល្បែងស៊ីសងគ្រប់ប្រភេទរួមមាន បញ្ជល់មាន់ បៀ អាប៉ោងជាដើម ។ល។ បុ៉ន្តែធម៌ដែលលោកស្នងការសូត្រនោះ ដូចឱ្យពរជ័យទៅមេល្បែង ជ័យ ផល្លា ឱ្យទទួលបានជោគជ័យគ្រប់គ្រាដូច្នោះដែរ ។ គួររំលឹកផងដែរថា កន្លងមកនៅក្នុងទឹកដីខេត្តកំពង់ធំ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ធ្លាប់បានអញ្ជើញមក និងមានប្រសាសន៍ថា ទឹកដីស្រុកបារាយណ៍នេះល្បីថា សម្បូរទៅដោយសង្វៀនបញ្ជល់មាន់ជាប់លេខទូទាំងប្រទេស ។ល។
ក៏បុ៉ន្តែមន្ត្រីពាក់ព័ន្ធនៅតែមុខក្រាស់ មិនចេះឈឺក្បាលហាលថ្ងៃទៅនឹងអនុសាសន៍នោះឡើយ ធ្វើឱ្យសង្វៀនបញ្ជល់មាន់ និងល្បែងអាប៉ោងជាច្រើនកន្លែងកើតមាននៅស្រុកបារាយណ៍ ប្រៀបដូចជាទុនទុកសម្រាប់ផ្ទះបាយដូច្នោះដែរ ។ ជាក់ស្តែង កាលពីរសៀលថ្ងៃទី១០ មីនា សកម្មភាពបញ្ជល់មាន់ និងលេងអាប៉ោង ស្ថិតនៅក្នុងភូមិទួលពភ្លារ ឃុំស្រឡៅ ស្រុកបារាយណ៍ មានបើកលេងគគ្រឹកគគ្រេង និងត្រូវម្ចាស់សង្វៀនឈ្មោះ ជ័យ ផល្លា បានជេរប្រមាថ និងចាប់យកកាមេរ៉ាអ្នកកាសែតមួយក្រុមដែលទៅថត ក្នុងបំណងកម្ទេចចោលទៀតផង តែរឿងរ៉ាវនេះត្រូវបានលោកអភិបាលស្រុក និងលោកអធិការប៉ូលិសចាត់ឱ្យលោកអធិការរងម្នាក់ដឹកនាំកម្លាំងចុះទៅកន្លែងកើតហេតុ ធ្វើឱ្យអ្នកលេងរាប់សិបនាក់ដាក់មេប្រូចហុយដីសំពោងទាំងថ្ងៃ និងបានត្រឹមតែដេញឱ្យរុះរើ និងដុតកម្ទេចចោលសង្វៀនបុ៉ណ្ណោះ ។
ចំណែកកំពូលមេល្បែង មេសង្វៀន មិនត្រូវបានធ្វើការចោទប្រកាន់អ្វីតាមផ្លូវច្បាប់ទេ ដែលសង្ស័យគឺសុទ្ធតែម៉ូយ ឬគ្នាឯង ធ្លាប់ស៊ីចុកបុកទំពារជាមួយគ្នា ឬពេលរកបានចែកគ្នារស់ ។ តាមប្រភពព័ត៌មានសង្វៀនបញ្ជល់មាន់ដែលមាននៅក្នុងទឹកដីស្រុកបារាយណ៍នេះ តែងតែផ្លាស់ប្តូរកន្លែងជានិច្ច បើចង់ទៅពិនិត្យឱ្យជាក់នឹងភ្នែក ទាល់តែទៅដោយស្ងាត់ៗ និងលាក់ការណ៍បំផុត កុំឱ្យសមត្ថកិច្ច និងអាជ្ញាធរដឹង ។ ប្រសិនបើទៅបង្ក្រាបដោយប្រកូកប្រកាស ច្បាស់ជាបែកការណ៍ដូចបែកពាងប្រហុក និងទៅចាប់ខ្យល់មិនខាន ៕
ចែករំលែកព័តមាននេះ