រាជធានីភ្នំពេញ ៖ អ្នករស់នៅបឹងកក់ ដែលមានទំនាស់ដីធ្លីដ៏រ៉ាំរ៉ៃ និងអ្នករស់នៅបុរីកីឡា ប្រមាណជា៥០នាក់ បាននាំគ្នាឈរមុខសាលារាជធានីភ្នំពេញ តាមបណ្តោយមហាវិថីព្រះមុនីវង្ស ក្នុងសង្កាត់ស្រះចក ខណ្ឌដូនពេញ កាលពីវេលាម៉ោង៨ព្រឹក ថ្ងៃទី១២ មីនា ដើម្បីសុំឱ្យសាលារាជធានីភ្នំពេញ ពន្លឿនការដោះស្រាយដីធ្លីតំបន់បឹងកក់ និងលំនៅឋានក្នុងសហគមន៍បុរីកីឡា ។
យោងតាមញត្តិរបស់អ្នកសហគមន៍បឹងកក់ ឱ្យដឹងថា សហគមន៍បឹងកក់ សុំឱ្យសាលារាជធានីភ្នំពេញ ដោះស្រាយបញ្ចប់ជម្លោះដីធ្លីដ៏រ៉ាំរ៉ៃនៅតំបន់បឹងកក់ជាបន្ទាន់ បន្ទាប់ពីសាលារាជធានីភ្នំពេញ ផ្តល់ប្លង់កម្មសិទ្ធិនៅថ្ងៃទី៣ មីនា ចំនួន៨គ្រួសារ ក្នុងចំណោម៤៨គ្រួសារ មានដូចជា ៖ ១-សូមឱ្យផ្តល់ប្លង់កម្មសិទ្ធិដល់អ្នកដែលនៅសេសសល់ចំនួន៣៧គ្រួសារ មានភូមិទី២២ ចំនួន៥គ្រួសារ, ភូមិទី២៤ ចំនួន២គ្រួសារ, ភូមិទី៦ ចំនួន១គ្រួសារ និងភូមិទី១ ចំនួន២៩គ្រួសារ។ ២-មាន៣គ្រួសារទៀត ស្ថិតក្នុងភូមិទី៦ ត្រូវផ្តល់ប្លង់កម្មសិទ្ធិឱ្យគ្រប់តាមទំហំដីរបស់ពួកគាត់ដែលកំពុងកាន់កាប់រស់នៅជាក់ស្តែងក្នុងដីទំហំ១២,៤៤ហិកតាស្រាប់ ។ ៣-បោះព្រំប្រទល់ដីទំហំ១២,៤៤ហិកតា តាមអនុក្រឹត្យលេខ១៨៣ អនក្រ.បក ចុះថ្ងៃទី១១ ខែសីហា ឆ្នាំ២០១១ ។
អ្នកមកពីបឹងកក់ ក៏បានចោទប្រកាន់សាលារាជធានីភ្នំពេញថា កន្លងមកបានផ្តល់កម្មសិទ្ធិដីធ្លីដល់អ្នកណាដែលមិនចេញមុខតវ៉ា ហើយការផ្តល់កម្មសិទ្ធិនេះដែរ មិនមែនជាអ្នកដែលរស់នៅក្នុងសហគមន៍ទេ ។ ពួកគាត់បានសុំឱ្យសាលារាជធានីភ្នំពេញបញ្ចប់ទំនាស់ដីធ្លីដ៏រ៉ាំរ៉ៃនៅតំបន់បឹងកក់ ចាប់ពីពេលនេះតទៅ ដើម្បីឱ្យពួកគេមានពេលវេលាសម្រាប់ប្រកបរបរចិញ្ចឹមជីវិត ។ ដោយឡែក អ្នកសហគមន៍បុរីកីឡា ក៏បានដាក់ញត្តិជូនសាលារាជធានីភ្នំពេញដែរ គឺសហគមន៍បុរីកីឡាក្នុងភូមិទី១២ សង្កាត់វាលវង់ ខណ្ឌ៧មករា ស្នើសុំឱ្យសាលារាជធានីភ្នំពេញ ដោះស្រាយលំនៅឋានដល់សហគមន៍បុរីកីឡា ដែលកំពុងរងគ្រោះជាបន្ទាន់ ។
ញត្តិនេះបានលើកឡើងថា កន្លងមកលោកអភិបាលរាជធានីភ្នំពេញ បានសន្យាតាំងពីមុនពេលបោះឆ្នោតថា នឹងដោះស្រាយ ប៉ុន្តែរហូតមកដល់ពេលនេះ គឺគ្មានដំណោះស្រាយសោះ ។ មិនតែប៉ុណ្ណោះ ថែមទាំងយកកម្លាំងសមត្ថកិច្ចមកប្រើអំពើហិង្សា វាយដំ និងរុះរើលំនៅឋានកាលពីថ្ងៃទី៣ ខែមករា ឆ្នាំ២០១២កន្លងទៅ នេះ ។ អស់រយៈពេលជាង២ឆ្នាំកន្លងមកហើយ ដែលអ្នកសហគមន៍បុរីកីឡា រស់នៅដូចសត្វធាតុ ពិបាកជាងស្លាប់ទៅទៀត គឺរស់នៅក្រោមដំបូលតង់ធ្លុះធ្លាយ លើគំនរសំរាម ដ៏ស្អុយរលួយ និងរស់នៅក្រោមកាំជណ្តើរ បាត់បង់មុខរបរ ព្រមទាំងមានសុខភាពមិនសូវល្អទៀតផង ។
ក្នុងញត្តិដាក់ជូនសាលារាជធានីភ្នំពេញដដែលបញ្ជាក់ថា អ្នកសហគមន៍បុរីកីឡា មិនត្រូវការជម្រកបណ្តោះអាសន្ននោះទេ គឺពួកគាត់ត្រូវការអគារទី៩ និងទី១០ តាមកិច្ចសន្យារបស់ក្រុមហ៊ុនផាន អុីម៉ិច ដែលបានព្រមព្រៀងជាមួយពលរដ្ឋតាំងពីឆ្នាំ២០០៤មកម៉្លេះ ឱ្យបានឆាប់រហ័សបំផុត ។ តំណាងសហគមន៍បឹងកក់ និងបុរីកីឡា បាននិយាយថា នៅវេលាម៉ោង៩ និង៣០នាទីព្រឹក ថ្ងៃទី១២ មីនា មន្ត្រីសាលារាជធានីភ្នំពេញ បានចេញមកទទួលយកញត្តិរបស់ពួកគេទាំងពីរសហគមន៍ ហើយសន្យាថា នឹងយកញត្តិនេះដាក់ជូនលោកអភិបាលរាជធានីភ្នំពេញពិនិត្យ និងជួយជំរុញឱ្យមានការដោះស្រាយឱ្យបានឆាប់ផង ដែរ ។ ពួកគេទាំងពីរសហគមន៍ បញ្ជាក់ថា បើមិនមានដំណោះស្រាយឱ្យបានឆាប់រហ័សទេ ពួកគាត់នឹងនាំគ្នាមកតវ៉ាជាថ្មីម្តងទៀត ឬច្រើនជាងនេះ រហូតទាល់តែសម្រេចតាមការស្នើសុំ ។
លោក គឹម វុត្ថា ប្រធានសណ្តាប់ធ្នាប់ខណ្ឌដូនពេញ និយាយថា ក្នុងការប្រមូលផ្តុំរបស់អ្នកមកពីសហគមន៍បឹងកក់ និងបុរីកីឡា នៅមុខសាលារាជធានីភ្នំពេញ មិនមានអំពើហិង្សាណាមួយកើតឡើងទេ គ្រាន់តែសុំឱ្យពួកគេរក្សាសណ្តាប់ធ្នាប់ និងរកកន្លែងប្រមូលផ្តុំ ដើម្បីកុំឱ្យមានការកកស្ទះចរាចរណ៍ និងក្រោមការឃ្លាំមើលរបស់សមត្ថកិច្ច ។ នៅវេលាម៉ោង១០ព្រឹក ក្នុងថ្ងៃដដែល ពួកគេបានរំសាយត្រឡប់ទៅផ្ទះវិញ ៕
ចែករំលែកព័តមាននេះ