ការបង្កើតទំនាក់ទំនងរវាងមនុស្ស និងមនុស្ស គឺជាកត្តាសំខាន់មួយដែលជួយដល់លោក Randy Garn ដែលជាវិនិយោគិន និងសហគ្រិនមួយរូបក្នុងការកសាងអាជីវកម្មផ្ទាល់ខ្លួនរបស់លោក ។ តែការបង្កើតទំនាក់ទំនងមិនមែនជារឿងងាយធ្វើដូចនិយាយទេ ជាពិសេសសម្រាប់មនុស្សដែលមិនពូកែនិយាយស្តី ។ យ៉ាងណាក្តីលោក Garn បានចែករំលែកយុទ្ធសាស្ត្រដែលលោកយកមកអនុវត្តដោយជោគជ័យដូចខាងក្រោមនេះ ៖
១. បង្កើតទម្លាប់បង្កើតទំនាក់ទំនង
ក្រុមមនុស្សដែលអ្នកស្គាល់មិនអាចរីកធំឡើងទេ ប្រសិនបើអ្នកមិនផ្តោតស្មារតីលើវាជាប្រចាំ ។ លោក Garn បានផ្តល់យោបល់ថា អ្នកគួរតែបង្កើតបញ្ជីឈ្មោះមនុស្សដែលអ្នកចង់រក្សាទំនាក់ទំនងជាមួយ រួចប្រើប្រាស់ពេលវេលាអ្នកឲ្យបានល្អ ។ ព្រោះពេលវេលាអ្នកមានកម្រិត អ្នកត្រូវតែបង្កើតឱកាសដែលមានន័យ ដើម្បីបង្កើតទំនាក់ទំនងជាមួយមនុស្សដែលសំខាន់ៗ ។
២. ទំនាក់ទំនងត្រូវបានកសាងលើការយល់ដឹង
ទំនាក់ទំនងជាច្រើនបានបរាជ័យព្រោះភាគីទាំងពីរមិនអាចស្គាល់ចិត្តគ្នាបានជ្រៅជ្រេះ ។ នៅពីក្រោយទំនាក់ទំនងដែលរឹងមាំ គឺទស្សនៈផ្ទាល់ខ្លួន ។ ទាំងនេះ គឺជាគុណសម្បត្តិដែលទាក់ទាញបុគ្គលម្នាក់ៗ ។ ទស្សនៈទាំងនេះ គឺជាអ្វីដែលជំរុញមនុស្សឲ្យធ្វើអ្វីដែលពួកគេធ្វើ បង្កើតភាពជោគជ័យរបស់ពួកគេ និងជាមូលហេតុដែលពួកគេនៅលើបញ្ជីឈ្មោះរបស់អ្នក ។ដោយហេតុដូចនេះអ្នកគួរតែស្រាវជ្រាវ និងចំណាយពេល ដើម្បីសិក្សាពីទស្សនៈរបស់បុគ្គលម្នាក់ៗដែលអ្នកមានទំនាក់ទំនងជាមួយ ។
៣. បង្កើតអនុស្សាវរីយ៍ដែលមានន័យ
ពេលខ្លះទំនាក់ទំនងអាចដើរទៅមុខបានលឿននៅពេលដែលភាគីទាំងពីរចែករំលែកអនុស្សាវរីយ៍ដែលពួកគេមិនអាចបំភ្លេចបាន ។ ប្រាកដណាស់ កត្តានេះប្រហែលជាតម្រូវឲ្យអ្នកចំណាយថវិកា និងពេលវេលាច្រើន ប៉ុន្តែប្រសិនបើអ្នកពិតជាខ្វល់ខ្វាយនឹងទំនាក់ទំនងនោះ អ្នកគួរតែពិចារណាលើជម្រើសនេះ ។
៤. កុំនិយាយពីអ្នកដទៃនៅពីក្រោយខ្នង
លោក Garn បានប្រាប់មកថា វាជាកត្តាសំខាន់ជាងគេដែលអ្នកត្រូវតែជៀសវាងពេលដែលចង់បង្កើតទំនាក់ទំនងជាមួយអ្នកដទៃ ។ ការនិយាយពីអ្នកដទៃនៅពីក្រោយខ្នងភាគច្រើនកើតមានឡើងពេលដែលអ្នកមិនមានរឿងអ្វីនិយាយជាមួយនឹងភាគីម្ខាងទៀត ។ ប៉ុន្តែការធ្វើដូច្នេះប៉ះពាល់ដល់ជំនឿចិត្តលឿនជាងអ្វីទាំងអស់ និងប៉ះពាល់ដល់សមត្ថភាពរបស់អ្នកក្នុងការបង្កើតទំនាក់ទំនងដែលមានន័យផងដែរ ។ ប្រសិនបើអ្នកមិនមានអ្វីនិយាយទេ អ្នកអាចសរសើរដោយស្មោះត្រង់ជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ