រាជធានីភ្នំពេញ ៖ បន្ទាប់ពីមានឱកាសឈរជើងនៅក្នុងផលិតកម្មហង្សមាសរួចមក តារាចម្រៀងលោកនៅ ស៊ីនឿន បានសម្រេចក្តីសម្រៃរបស់ខ្លួនបន្ថែមទៀត ដោយក្លាយជាថៅកែហាងកាត់ដេរសម្លៀកបំពាក់ ។ តារាចម្រៀងរូបនេះបានបើកសម្ពោធហាងរបស់ខ្លួនស្ថិតនៅផ្ទះលេខ70BE0 ផ្លូវលេខ១៤៣ ខាងក្រោយអតីតរោងភាពយន្តគិរីរម្យ នៃរាជធានីភ្នំពេញ កាលពីថ្ងៃទី៧ មីនា ឆ្នាំ២០១៤
រាជធានីភ្នំពេញ ៖ បន្ទាប់ពីមានឱកាសឈរជើងនៅក្នុងផលិតកម្មហង្សមាសរួចមក តារាចម្រៀងលោកនៅ ស៊ីនឿន បានសម្រេចក្តីសម្រៃរបស់ខ្លួនបន្ថែមទៀត ដោយក្លាយជាថៅកែហាងកាត់ដេរសម្លៀកបំពាក់ ។ តារាចម្រៀងរូបនេះបានបើកសម្ពោធហាងរបស់ខ្លួនស្ថិតនៅផ្ទះលេខ70BE0 ផ្លូវលេខ១៤៣ ខាងក្រោយអតីតរោងភាពយន្តគិរីរម្យ នៃរាជធានីភ្នំពេញ កាលពីថ្ងៃទី៧ មីនា ឆ្នាំ២០១៤ ដោយមានការចូលរួមពីអ្នកសិល្បៈ និងតារាចម្រៀងរួមទ្រនំមួយចំនួនផង ។
លោកនៅ ស៊ីនឿន អះអាងប្រាប់កោះសន្តិភាពថា សម្រាប់មុខរបរមួយនេះចាត់ទុកថា ជាក្តីស្រមៃរបស់លោកដែលបានគិតអស់ពេលជាច្រើនឆ្នាំមកហើយ ដើម្បីឈានទៅកាន់មុខរបរផ្សេងមួយទៀតក្រៅពីអាជីពសិល្បៈ ។ ហាងកាត់ដេរសម្លៀកបំពាក់នេះ ផ្តើមចេញជារូបរាងឡើងក្រោយពេលមិត្តភក្តិរបស់លោកដែលមានជំនាញកាត់ដេរ ហើយមានបំណងបើកមុខរបរនេះផង ។ ទោះជាយ៉ាងណាក្តី លោកនៅមិនទាន់អាចសន្មតបាននៅឡើយទេថា ហាងមួយនេះប្រើដើមទុនអស់ប៉ុន្មាន ប៉ុន្តែបើគិតក្នុងជំហានដំបូង គឺប្រហែលជាង២ម៉ឺនដុល្លារ ។ ដើមទុននេះមិនមែនតែរូបលោកម្នាក់ទេ ពោលគឺជាការចូលហ៊ុនគ្នាជាមួយមិត្តភក្តិរបស់លោកដែលមានជំនាញកាត់ដេរ ។ ទុនដែលលោកយកមកបើកហាងមួយនេះ គឺជាការសន្សំមកជាច្រើនឆ្នាំនៅក្នុងអាជីពជាតារាចម្រៀង ។
លោកនៅ សុីនឿន រំពឹងទុកថា ហាងកាត់ដេរសម្លៀកបំពាក់របស់លោក នឹងទទួលការគាំទ្រច្រើនពីអតិថិជន ដោយសារតែហាងនេះមានជាងកាត់ដេរមានជំនាញច្បាស់លាស់ បូករួមទាំងតម្លៃសមរម្យអាចទទួលយកបាន និងរហ័សទាន់ចិត្ត ។ ជាជំហានដំបូងហាងរបស់លោកផ្តោតសំខាន់តែទៅលើសម្លៀកបំពាក់ផ្នែកបុរសប៉ុណ្ណោះ ។
ដោយឡែក ពាក់ព័ន្ធនឹងអាជីពសិល្បៈវិញ លោកនៅ ស៊ីនឿន ឱ្យដឹងថា បច្ចុប្បន្នការងារសិល្បៈរបស់លោកមមាញឹកខ្លាំងគួរសម ជាពិសេសគឺការផ្តល់ឱកាសពីផលិតកម្មហង្សមាសក្នុងការចេញច្រៀងតាមបណ្តាខេត្ត ផ្សេងៗ ។ ទន្ទឹមគ្នានោះបទចម្រៀង ថ្មីៗបែបយុវវ័យរបស់លោកក្នុងផលិតកម្មហង្សមាស គ្រោងនឹងចេញជាបន្តបន្ទាប់ ជាពិសេសបទចម្រៀងជាវីស៊ីឌី តពីបទ «សន្យាមុនគេង» ដែលលោកសម្តែងជាមួយកញ្ញាឱក សុគន្ធកញ្ញា ៕
ចែករំលែកព័តមាននេះ