ព្រោះមើលឃើញនូវចរិយារបស់ស្ត្រីពួកខ្លះប្រព្រឹត្តមិនល្អ មិនរៀបចំខ្លួនប្រាណឱ្យសមទៅនឹងខ្លួនឯងជាមេផ្ទះ ទើបអ្នកប្រាជ្ញលើកជាទស្សនៈថា ស្ត្រីខ្លះក្នុងលោកនេះពេលដែលប្តីរកទ្រព្យរកលុយបានមក ខ្លួនមិនខំថែរក្សាឲ្យបានគង់វង្សទេ គិតតែពីចាយវាយខ្ជះខ្ជាយឥតដឹងមុខក្រោយ ធ្វើឲ្យទ្រព្យនោះវិនាសអស់រលីង ដល់ពេលមានកិច្ចចាំបាច់រកប្រាក់មួយរៀលគ្មាន វាជាកំហុសធ្ងន់ណាស់ប្រៀបបានទៅនឹងស្រីកញ្ជើធ្លុះ ។…
ព្រោះមើលឃើញនូវចរិយារបស់ស្ត្រីពួកខ្លះប្រព្រឹត្តមិនល្អ មិនរៀបចំខ្លួនប្រាណឱ្យសមទៅនឹងខ្លួនឯងជាមេផ្ទះ ទើបអ្នកប្រាជ្ញលើកជាទស្សនៈថា ស្ត្រីខ្លះក្នុងលោកនេះពេលដែលប្តីរកទ្រព្យរកលុយបានមក ខ្លួនមិនខំថែរក្សាឲ្យបានគង់វង្សទេ គិតតែពីចាយវាយខ្ជះខ្ជាយឥតដឹងមុខក្រោយ ធ្វើឲ្យទ្រព្យនោះវិនាសអស់រលីង ដល់ពេលមានកិច្ចចាំបាច់រកប្រាក់មួយរៀលគ្មាន វាជាកំហុសធ្ងន់ណាស់ប្រៀបបានទៅនឹងស្រីកញ្ជើធ្លុះ ។
លុយកាក់ដែលយើងខំព្យាយាមរកបានមកទាំងយប់ទាំងថ្ងៃនោះ យើងត្រូវដឹងថា វាជាការលំបាកណាស់ទម្រាំបានមក បើយើងធ្វើការរាជការ ឬការងារតាមស្ថាប័ននានាត្រូវប្រឈមនឹងការហត់នឿយខួរក្បាលដោយសារការគិត ការព្យាយាមដើម្បីដោះស្រាយបញ្ហា ។
បើការងាររកស៊ីលក់ដូរវិញក៏លំបាកក្នុងការចំណេញបាន មួយម៉ឺនពីរម៉ឺនរៀល ដូច្នេះយើងមិនគួរចាយវាយតាមចិត្តចង់ ឬចំណាយទៅលើអ្វីដែលមិនមែនជាការចាំបាច់ ឬក៏ចំណាយទៅលើរបស់ឥតប្រយោជន៍មិនដឹងប្រមាណក្នុងការចាយវាយ ឬយកទៅលេងល្បែងភ្នាល់ជាដើមសុទ្ធតែជាហេតុនាំឱ្យវិនាសទ្រព្យ ។
ដូច្នេះទ្រព្យសម្បត្តិលុយកាក់ដែលរកបានមកហើយ ត្រូវសន្សំទុកឲ្យបានល្អ ឱ្យបានគង់វង្ស ត្រូវចេះបែងចែកឲ្យបានសមគួរមានចំណាយលើម្ហូបប្រចាំថ្ងៃ របស់របរសម្រាប់ប្រើប្រាស់ក្នុងផ្ទះ ចិញ្ចឹមឪពុកម្តាយ ចិញ្ចឹមកូន បម្រុងទុកក្នុងពេលចាំបាច់ណាមួយ និងចំណាយធ្វើបុណ្យទានជាដើម ។
កាលបើយើងចេះបែងចែកលុយកាក់ឱ្យបានល្អនោះ ប្រាក់របស់យើងនឹងអាចសល់ខ្លះតម្កល់ទុកសម្រាប់ទ្រទ្រង់គ្រួសារទៅខាងមុខទៀត ។
ហេតុនេះហើយក្នុងនាមយើងជាស្ត្រីអ្នកចាត់ចែងទុកដាក់ទ្រព្យសម្បត្តិដែលប្តីរកបានមកត្រូវចេះសន្សំសំចៃ មិនត្រូវចាយវាយខ្ជះខ្ជាយ កុំឲ្យដូចពាក្យចាស់ពោលថា ស្រីកញ្ជើធ្លុះក្នុងរឿងមាយើង នោះមិនមែនជារឿងល្អឡើយ ។ (ដោយសាន សារិន)
ចែករំលែកព័តមាននេះ