រាជធានីភ្នំពេញ ៖ ការប្រកួតប្រដាល់កាលពីថ្ងៃសុក្រ និងថ្ងៃសៅរ៍ ទី៧ និងទី៨ មីនា ម្សិលម៉្ងៃមួយ និងម្សិលម៉្ងៃ បានបង្ហាញយ៉ាងច្បាស់ថា កីឡាករម៉ន លីហួរ មកពីក្លិបព្រែកឯងកីឡា បានក្លាយជាអ្នកបំបាក់គូសងសឹក និងកីឡាកររ៉ាក់ វិឆ័យ មកពីក្លិបកងពលតូចលេខ៧០ បានក្លាយជាអ្នកសន្លប់ក្រោមដៃរបស់គូភាគីដែលត្រូវការសងសឹក ។ លទ្ធផលបញ្ច្រាសទិសរបស់ពួកគេបានធ្វើឱ្
រាជធានីភ្នំពេញ ៖ ការប្រកួតប្រដាល់កាលពីថ្ងៃសុក្រ និងថ្ងៃសៅរ៍ ទី៧ និងទី៨ មីនា ម្សិលម៉្ងៃមួយ និងម្សិលម៉្ងៃ បានបង្ហាញយ៉ាងច្បាស់ថា កីឡាករម៉ន លីហួរ មកពីក្លិបព្រែកឯងកីឡា បានក្លាយជាអ្នកបំបាក់គូសងសឹក និងកីឡាកររ៉ាក់ វិឆ័យ មកពីក្លិបកងពលតូចលេខ៧០ បានក្លាយជាអ្នកសន្លប់ក្រោមដៃរបស់គូភាគីដែលត្រូវការសងសឹក ។ លទ្ធផលបញ្ច្រាសទិសរបស់ពួកគេបានធ្វើឱ្យមានការចាប់អារម្មណ៍យ៉ាងខ្លាំង ខណៈដែលលទ្ធផលនោះគឺត្រូវនឹងការព្យាករណ៍ទាំងស្រុងរបស់អ្នកទស្សនាតាំងពីមុនពួកគេទាំងពីរឡើងប្រកួត ។
កាលពីថ្ងៃសុក្រ នៅសង្វៀនបាយ័នស្ទឹងមានជ័យ កីឡាករម៉ន លីហួរ បានបំបាក់ដៃគូរបស់ខ្លួនជាលើកទី២ បើទោះជាកីឡាករអាន សុផល មកពីក្លិបមិត្តប៉ូលិស បានប្រកាសយ៉ាងដាច់ណាត់ថា នឹងសងសឹកឱ្យខាងតែបាន ។ ចាប់តាំងពីទឹកទី១ រហូតដល់ដឹងថាចាញ់ឈ្នះ ពួកគេទាំងពីរបានបង្ហាញសន្ទុះប្រឹងប្រែងវាយគ្នាទៅវិញទៅមកមិនចុះញ៉មឡើយ បើទោះជា ម៉ន លីហួរ ត្រូវគេមើលឃើញមានសន្ទុះល្អជាងក្នុងការប្រកួតទាំងមូល ។ ទាំងដៃទាំងជើង និងកម្រិតប្រកួតកីឡាករម៉ន លីហួរ បង្គោលខៀវបានទទួលការអបអរយ៉ាងខ្លាំងដោយសារតែគេវាយបានល្អ ដែលអាចនិយាយបានថា រស់រវើកជាងកាលគេប៉ះជាមួយ អាន សុផល ក្នុងជំនួបលើកទី១ ទៅទៀត ។ អាន សុផល ដ្បិតថា បានប្រឹងប្រែងស្ទុះជាងលើកមុន ប៉ុន្តែអាចបណ្តាលមកពី ម៉ន លីហួរ ប្រឹងជាងលើកមុនដែរ ទើបនៅតែចាញ់ប្រៀប ។ ម៉ន លីហួរ ដែលសំអាងថា មានសន្ទុះវាយចេញរហ័សជាង និងមានកម្លាំងពេញជាងបានវាយបំបុកកីឡាករបង្គោលក្រហម អាន សុផល តែម្តងនៅទឹកទី៤ ទើបធ្វើឱ្យកីឡាករដែលមកពីក្លិបមិត្តប៉ូលិសរូបនេះដួលអុកគូទ ហើយក្រោកលែងរួច ដែលឈានទៅដល់ការកំណត់ចាញ់ឈ្នះតែម្តង ។ ជ័យជម្នះផ្តួល អាន សុផល ឱ្យសន្លប់ក្នុងទឹកទី៤ បានក្លាយជាសំឡេងអបអរភាគច្រើន ខណៈដែលក្នុងការប្រកួតនោះ គឺមានអ្នកលម្អៀងចង់ឃើញ ម៉ន លីហួរ ឈ្នះលើបង្គោលក្រហមច្រើនជាង ។ នៅលើសង្វៀននោះដែរ កីឡាករធន សារិកា មកពីក្លិបមជ្ឈមណ្ឌលខេមរភូមិន្ទ វាយឈ្នះកីឡាករចាន់ វ៉ាន់ធឿន មកពីក្លិបនិរោធមានជ័យដោយពិន្ទុ ។ កីឡាករឯម ចាន់យ៉ា មកពីក្លិបឫទ្ធិពោធិសែនជ័យ វាយឈ្នះកីឡាករថៃ ស័ក្តសារ៉ាក់ មកពីក្លិបទីបញ្ជាការកងទ័ពជើងទឹកដោយពិន្ទុ ។ កីឡាករហេង វ៉ាន់ឌី មកពីក្លិបបាត់ដំបងពាយ័ព្យ ផ្តួលកីឡាករសេង ហៀង មកពីក្លិបយុវជនកម្ពុជាមានជ័យឱ្យសន្លប់ក្នុងទឹកទី២ និងកីឡាករឯម ខ្លឹមខ្មៅ មកពីក្លិបឫទ្ធិពោធិសែនជ័យ ផ្តួលកីឡាករផង់ សុភាព មកពីក្លិបតាឡីដំរីមានឫទ្ធិ ឱ្យសន្លប់ក្នុងទឹកទី១ ដូចការគ្រោងទុក។
នៅលើរេញទូរទស្សន៍បាយ័នស្ទឹងមានជ័យដូចគ្នា តែនៅល្ងាចថ្ងៃសៅរ៍ម្សិលម៉្ងៃវិញ កីឡាកររ៉ាក់ វិឆ័យ បានទទួលកណ្តាប់ដៃយ៉ាងដំណំរបស់កីឡាករឯម វិចិត្រ មកពីក្លិបឫទ្ធិពោធិសែន ហើយបានសន្លប់ភ្លាមៗតែម្តងនៅក្នុងទឹកទី៣ ក្នុងជំនួបដែលពួកគេឡើងសងសឹកគ្នា ។ កាលពួកគេប៉ះគ្នាលើកទី១ រ៉ាក់ វិឆ័យ ក៏ប៊ិះនឹងសន្លប់បែបនេះដែរ ប៉ុន្តែដោយសារគេមានឱកាសប្រើល្បិចស៊ីឡាក ទើបត្រូវក្រុមគណៈកម្មការសម្រេចឱ្យឈ្នះវិញ ដោយសំអាងថា កីឡាករឯម វិចិត្រ ថែមខុសលក្ខន្តិកៈនៅពេលគេដួល ។ សភាពធ្វើកលជាសន្លប់នាពេលនោះ ដ្បិតថា អាចប្លន់យកជ័យជម្នះបានមែន ប៉ុន្តែធ្វើឱ្យ រ៉ាក់ វិឆ័យ ទទួលរងការរិះគន់យ៉ាងខ្លាំង ដោយម្នាក់ៗសម្តែងមតិយ៉ាងផុសផុលគួរឱ្យចង់សើចថា ២ទឹកដំបូង ឯម វិចិត្រ ខំវាយចង់ស្លាប់ និងទ្រមខ្លួនស្ទើររកដង្ហើមដកមិនដល់គ្នា មិនសន្លប់ បែរជាមកសន្លប់ព្រោះតែត្រូវមួយដៃថែមនោះទៅវិញ ។
ងាកមកកាន់ការប្រកួតក្នុងជំនួបទី២ ឬជំនួបសងសឹកកាលពីថ្ងៃសៅរ៍ ទី៨ មីនា រវាងគូនេះវិញ កីឡាករបង្គោលក្រហម ឯម វិចិត្រ ដែលកាលពីលើកមុនត្រូវគេកាត់ក្តីឱ្យចាញ់ បានបង្ហាញអារម្មណ៍ពុះកញ្ជ្រោលយ៉ាងខ្លាំងក្នុងការវាយសម្រុកទៅលើកីឡាកររ៉ាក់ វិឆ័យ ដើម្បីលាងជម្រះមុខមាត់ ។ បង្គោលក្រហម ឯម វិចិត្រ ហាក់មិនបានបន្ធូរដៃទាល់តែសោះ ដោយសូម្បីតែប្រើពេលស្ទាបស្ទង់សមត្ថភាពដើម្បីចំណាយពេលចោល ក៏មិនធ្វើនោះដែរ ។ អ្វីដែលគេចាប់អារម្មណ៍ គឺឱ្យតែឃើញ រ៉ាក់ វិឆ័យ ទន់ជំហរបម្រុងដួល ឯម វិចិត្រ ដកដៃ និងជើងឈប់វាយភ្លាមដើម្បីការពារកុំឱ្យភ្លាត់ថែមក្នុងពេល រ៉ាក់ វិឆ័យ ដួល នាំទៅដល់រឿងដៃគូស៊ីឡាកយកឈ្នះម្តងទៀត ។ ពេញរយៈពេល៣ទឹក គេមិនឃើញកីឡាករបង្គោលខៀវ ទប់ជាប់នូវកណ្តាប់ដៃរបស់ ឯម វិចិត្រ នោះឡើយ ខណៈដែលការវាយលុករបស់គេផ្ទាល់ ក៏មិនមានសំណាងធ្វើឱ្យកីឡាករឯម វិចិត្រ ព្រឺខ្នងទាល់តែសោះ ។ តាំងពីទឹកទី១ រហូតដល់ទឹកទី៣ បើទោះជាបង្គោលខៀវ រ៉ាក់ វិឆ័យ ប្រឹងប្រែងបញ្ចេញជំហររឹងមាំ ក៏ឱកាសចាញ់ប្រៀបនៅតែមានកម្រិតកាន់តែខ្ពស់ ។ កំហឹងទាមទារសងសឹកបានរុញឱ្យ ឯម វិចិត្រ បង្គោលក្រហមបញ្ចេញកម្លាំងដៃ និងស្នៀតល្អព្រមគ្នាធ្វើឱ្យ រ៉ាក់ វិឆ័យ សន្លប់ក្នុងទឹកទី៣ ដោយក្រៅពីបាត់ឱកាសប្រកួតបន្ត គឺអស់ទាំងឱកាសស៊ីឡាក ដូចដែលគេធ្លាប់ធ្វើ ។ យ៉ាងណាក៏ដោយ កីឡាកររ៉ាក់ វិឆ័យ ក៏បានសម្រុកទៅលើកីឡាករឯម វិចិត្រ ធ្វើឱ្យគេផ្ងារជើងបានខ្លះៗដែរ បើទោះជាអ្វីដែលគេសម្រេចបានហាក់នៅមានកម្រិត និងមិនអាចប្រដូចផ្លែផ្ការបស់ ឯម វិចិត្រ បាននោះក៏ដោយ ។
នៅលើរេញទូរទស្សន៍បាយ័ននាថ្ងៃសៅរ៍នោះដែរ ការប្រកួតជម្រុះក្នុងជុំទី៣ ឆ្ពោះទៅកាន់ការដណ្តើមពានរង្វាន់ BTV ទម្ងន់៥១គីឡូក្រាមរបស់កីឡាករ៤រូប គឺបានរកឃើញអ្នកត្រៀមហាលអាវ និងអ្នកឈ្នះស្វ័យប្រវត្តិ ដើម្បីមានមុខទៅកាន់វគ្គប្រកួតដណ្តើមខ្សែក្រវាត់ BTV នៅវគ្គបញ្ចប់នោះផងដែរ ។ កីឡាករចៅ រស់ មកពីក្លិបចាក់អង្រែមានជ័យ ចាញ់កីឡាករអ៊ុន រតនា មកពីក្លិបតាឡីដំរីមានឫទ្ធិ ដោយពិន្ទុ និងកីឡាកររិទ្ធ កៅ មកពីក្លិបមជ្ឈមណ្ឌលកីឡាខ.ភ.ម ចាញ់ពិន្ទុកីឡាករជួប ជាង មកពីក្លិបនិរោធមានជ័យ ។ លទ្ធផលជុំនេះបង្ហាញថា កីឡាករអ៊ុន រតនា ប្រកួត៣ជុំ ទទួលបាន៥ពិន្ទុ (ឈ្នះ១ ចាញ់២) កីឡាករចៅ រស់ ប្រកួត៣ជុំដូចគ្នា ទទួលបាន៥ពិន្ទុ (ឈ្នះ១ ចាញ់២) កីឡាកររិទ្ធ កៅ ប្រកួតបាន៣ជុំ ទទួលបាន៥ពិន្ទុដូចគ្នា (ឈ្នះ១ ចាញ់២) និងកីឡាករជួប ជាង ដែលប្រកួតបាន៣ជុំនោះដែរ តែទទួលបាន៩ពិន្ទុ ដោយឈ្នះទាំង៣ប្រកួតក្នុងជុំជម្រុះ ។ ក្នុងចំណោមអ្នកមាន៥ពិន្ទុក្នុងដៃ នឹងមានម្នាក់មានឱកាសឡើងទៅកាន់ជុំផ្តាច់ព្រ័ត្រ បើបានឈ្នះមួយជុំចុងក្រោយ ខណៈដែលអ្នកមាន៩ពិន្ទុបានក្លាយជាអ្នកឡើងដណ្តើមខ្សែក្រវាត់ដោយស្វ័យប្រវត្តិ ៕
ចែករំលែកព័តមាននេះ