រាជធានីភ្នំពេញ ៖ ដើម្បីឲ្យអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) ឱ្យកាន់តែល្អប្រសើរជាងមុន និងធានាសម្រេចឲ្យបានកំណើនធនធានមនុស្សក្នុងវិស័យនេះទាំងបរិមាណ និងគុណភាពក្រសួងការងារបណ្តុះបណ្តាលវិជ្ជាជីវៈនឹងរៀបចំបង្កើតឱ្យមានផែនការមេ (Master Plan)…
រាជធានីភ្នំពេញ ៖ ដើម្បីឲ្យអប់រំបណ្ដុះបណ្ដាលបច្ចេកទេស និងវិជ្ជាជីវៈ (TVET) ឱ្យកាន់តែល្អប្រសើរជាងមុន និងធានាសម្រេចឲ្យបានកំណើនធនធានមនុស្សក្នុងវិស័យនេះទាំងបរិមាណ និងគុណភាពក្រសួងការងារបណ្តុះបណ្តាលវិជ្ជាជីវៈនឹងរៀបចំបង្កើតឱ្យមានផែនការមេ (Master Plan) សម្រាប់រៀបចំគ្រឹះស្ថាននៅចុងឆ្នាំនេះ ។ នេះបើលោករដ្ឋមន្ត្រីក្រសួងការងារ។
ក្នុងពិធីសំណេះសំណាលជាមួយមន្ត្រីរាជការក្រោមឱវាទក្រសួងការងារ និងបណ្ដុះបណ្ដាលវិជ្ជាជីវៈនាថ្ងៃទី២៨ ខែសីហានេះ លោក អ៊ិត សំហេង រដ្ឋមន្ត្រីបានលើកឡើងពីសុខដុមនីយកម្ម ក្នុងវិស័យកាត់ដេរ ដែលរាជរដ្ឋាភិបាលបាន និងកំពុងអនុវត្តបញ្ជៀសបាននូវបញ្ហាបាតុភាពនានា ហើយផលិតភាពការងារក៏នៅតែបន្តព្រមទាំងកំពុងជំរុញឱ្យមានការបង្កើនផលិតភាពបន្ថែមទៀតផងដែរ ។
ចំណែកប្រាក់ឈ្នួលអប្បរមាសម្រាប់កម្មករនិយោជិតក៏ត្រូវបានដំឡើងជារៀងរាល់ឆ្នាំតួយ៉ាងនៅឆ្នាំ២០១៩នេះប្រាក់ឈ្នួលអប្បរមារបស់កម្មករបានឡើងដល់១៨២ដុល្លារ ហើយសម្រាប់ឆ្នាំ២០២០ ក្រុមប្រឹក្សាជាតិប្រាក់ឈ្នួលអប្បបរមានឹងចាប់ផ្តើមបើកកិច្ចពិភាក្សាគ្នាស្ដីពីការកំណត់ប្រាកឈ្នួលអប្បបរមាផ្នែកវាយនភណ្ឌ កាត់ដេរ និងផលិតស្បែកជើង នៅថ្ងៃស្អែកនេះ ។ នាឱកាសនោះដែរលោករដ្ឋមន្ត្រីបានបង្ហាញការព្រួយបារម្ភពីបញ្ហាកង្វះធនធានមនុស្សក្នុងវិស័យ TVET ដែលកំពុងមានការខ្វះខាតក្នុងទីផ្សារការងារបច្ចុប្បន្ន ។ តែទោះជាយ៉ាងណា រាជរដ្ឋាភិបាលកម្ពុជាក៏ដូចជា ក្រសួងការងារ និងបណ្ដុះបណ្ដាលវិជ្ជាជីវៈកំពុងជំរុញការដោះស្រាយបញ្ហានេះយ៉ាងសកម្មនៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈទូទាំងប្រទេស ហើយឯកឧត្តមបណ្ឌិតរដ្ឋមន្ត្រីក៏បាន និងកំពុងចុះជាប់នៅតាមគ្រឹះស្ថានទាំងនោះផងដែរ ។
ត្រង់បញ្ហានេះ លោកបានបញ្ជាក់ថា«នៅចុងឆ្នាំ២០១៩នេះ ក្រសួងការងារនឹងបង្កើតឱ្យបានផែនការមេ (Master Plan) រៀបចំហេដ្ឋារចនាសម្ព័ន្ធក្នុងគ្រឹះស្ថាន TVET ទាំងអស់នៅទូទាំងប្រទេស ដោយគិតគូរទៅលើអគារសិក្សារោងជាងគ្រូបណ្ដុះបណ្ដាលការបង្រៀនពីបច្ចេកវិទ្យាថ្មីៗសម្រាប់បណ្ដុះបណ្ដាលសិក្ខាកាមសំដៅធ្វើយ៉ាងណា ដើម្បីសម្រេចបានធនធានមនុស្សក្នុងវិស័យនេះទាំងបរិមាណ និងគុណភាព» ។ លោកបានបន្តទៀថា ក្រសួងការងារ និងបណ្ដុះបណ្ដាលវិជ្ជាជីវៈនឹងបង្កើតឱ្យមានគណៈកម្មការស្ថិតិការងារមួយដែលមានលោកផ្ទាល់ជាប្រធាន ក្នុងនោះនឹងរៀបចំឱ្យមានកិច្ចប្រជុំទៀងទាត់បង្កើតឱ្យមានជនបង្គោលស្ថិតិការងារនៅតាមមូលដ្ឋានការងារនីមួយៗព្រោះកន្លងមកការងារបូកសរុប ស្ថិតិការងារនៅផ្នែកមួយចំនួន ហាក់នៅមានភាពយឺតយ៉ាវនៅឡើយ ។ លោករដ្ឋមន្ត្រីបានណែនាំដល់មន្ត្រីរាជការក្រោមឱវាទត្រូវអនុវត្តការងារតាមផ្នែកតាមវិស័យរៀងៗខ្លួនប្រកបដោយក្រមសីលធម៌ជាមន្ត្រីជៀសវាងការប្រព្រឹត្តបទល្មើសនានាដែលនាំទៅដល់ការទទួលទោសទណ្ឌ និងអាប់ឱនកិត្តិយស កេរ្តិ៍ឈ្មោះស្ថាប័ន ។ ជាមួយគ្នានោះដែរលោក អ៊ិត សំហេង បានណែនាំបន្ថែមដល់មន្ត្រីគ្រប់ជាន់ថ្នាក់ត្រូវធ្វើយ៉ាងណាបម្រើសេវាសាធារណៈជូនប្រជាពលរដ្ឋប្រកបដោយប្រសិទ្ធភាព និងការទទួលខុសត្រូវខ្ពស់ ។
ទន្ទឹមនឹងចំណុចវិជ្ជមានក៏នៅមានចំណុចអវិជ្ជមាន និងបញ្ហាប្រឈមមួយចំនួនដែលត្រូវទាមទារឱ្យមន្ត្រីពាក់ព័ន្ធចូលរួមដោះស្រាយរួមគ្នាផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ