លោកអេដឌី ហឺន អ្នករៀបចំការប្រកួតបានឱ្យដឹងថា ជំនួបលើកទី២រវាងកីឡាករប្រដាល់អង់គ្លេសខាល ហ្វ្រច់ និងចច ហ្គ្រូវ ត្រូវបានកំណត់ធ្វើនៅថ្ងៃទី៣១ខែឧសភាខាងមុខដោយទីកន្លែងគឺនៅពហុកីឡដ្ឋានជាតិអង់គ្លេស Wembly Stadium ។ វាជាលើកទី១ហើយដែលព្រឹត្តិការណ៍ប្រកួតកីឡាប្រដាល់ត្រូវបានរៀបចំធ្វើនៅពហុកីឡដ្ឋានជាតិរបស់អង់គ្លេសគិតចាប់តាំងពីឆ្នាំ២០០៧មក ។ អ្នករៀបចំសង្ឃឹមថា ការប្រកួតលើកនេះនឹងទាក់ទាញអ្នកទស្សនាបានច្រើនខណៈពហុកីឡដ្ឋានអាចផ្ទុកមនុស្សបាន៩ម៉ឺន នាក់ ។
ថ្លែងប្រាប់ BBC លោកហឺន បានបញ្ជាក់ថា ៖«ខ្ញុំគិតថា ពួកយើងមានផលិតផលដែលត្រូវបំពេញពហុកីឡដ្ឋានធំបែបនេះ ។ នៅពេលដែលយើងទទួលបានឱកាសបែបនេះ យើងត្រូវទទួលយកដោយដៃទាំងពីរ ។ តាមយោបល់ខ្ញុំ ការប្រកួតនៅទីនេះគឺពិតជាអស្ចារ្យខ្លាំងណាស់ ហើយវាក៏ជាលើកទី១ផងដែរ »។
ការជួបគ្នារវាងពួកគេលើកទី១កាលពីថ្ងៃទី២៣ខែវិច្ឆិកា ឆ្នាំកន្លងទៅនៅសង្វៀន Phones4u Arenaក្រុងមែនឆេសស្ទ័រ ចក្រភពអង់គ្លេស ហ្វ្រច់ត្រូវបានប្រគល់ឱ្យនូវជ័យជម្នះលើចច ហ្រ្គូវ ដោយបច្ចេកទេសក្នុងទឹកទី៩ការពារបានខ្សែក្រវាត់ស្ថាប័ន IBF/WBA ក្នុងប្រភេទទម្ងន់ super-middleweight ។ យ៉ាងណាក៏ដោយ ជ័យជម្នះរបស់ហ្វ្រច់នាពេលនោះបាននាំឱ្យមានការតវ៉ាជាហូរហែ ។ ដូច្នេះ ជំនួបលើកទី២នេះ គេសង្ឃឹមថានឹងអាចលុបបំបាត់ការតវ៉ារបស់អ្នកគាំទ្រកីឡាករចច ហ្គ្រូវបាន ។
ហ្វ្រច់វ័យ៣៦ឆ្នាំ មានឯតទគ្គកម្មប្រកួតឈ្នះ៣២ ចាញ់២ មិនដែលស្មើ ផ្តួលដៃគូឱ្យសន្លប់២៣លើកបានបញ្ជាក់ថា នៅក្នុងជំនួបលើកទី២នេះ រូបគេចាំបាច់ធ្វើឱ្យបានល្អជាងលើកទី១ ។ គេនិយាយថា ៖«កាលពីលើកទី១ ខ្ញុំវ៉ៃអន់ខ្លាំងណាស់ ។ ខ្ញុំមិនបានគោរពចច ហ្រ្គូវក្នុងនាមជាកីឡាករម្នាក់ហើយដែលបញ្ហានេះបានធ្វើឱ្យខ្ញុំបាត់បង់ចំណុចខ្លាំងដែលខ្ញុំធ្លាប់ប្រើយកឈ្នះកីឡាករលូស៊ាន ប៊ូត និងមីកគែល កេស្ល័រ ។ ពេលនេះ ខ្ញុំពិតជាអន្ទះសារចង់ជួបចច ហ្គ្រូវឱ្យបានឆាប់ »។ គេបានបន្ថែមថា ៖«ខ្ញុំពិតជារំភើបខ្លាំងណាស់ ហើយខ្ញុំនឹងឱ្យចច ហ្គ្រូវនូវការប្រកួតដ៏ជូរចត់មួយនៅចំពោះមុខអ្នកទស្សនាដ៏ច្រើន »។
ចំណែកចច ហ្គ្រូវដែលបច្ចុប្បន្នមានវ័យទើប២៥ឆ្នាំ បានសម្តែងនូវក្តីរីករាយជាខ្លាំងនិងថា វាជាពិតជាស័ក្តិសមដែលខ្លួនត្រូវទទួលបានឱកាសឡើងប្រកួតសងសឹក ។ គេបានថ្លែងថា ៖«ខ្ញុំមានអារម្មណ៍ធូរស្រាលនៅពេលទទួលបានឱកាសដ៏អស្ចារ្យនេះ ។ ខ្ញុំពិតជារន្ធត់ខ្លាំងណាស់ដែលខាល ហ្វ្រច់ព្រមទទួលយកការប្រកួតម្តងទៀត ។
ខ្ញុំសូមគោរពនូវភាពក្លាហានរបស់គេ ។ ឥឡូវនេះ ខ្ញុំកំពុងតែត្រៀមខ្លួនធ្វើយ៉ាងណាផ្តួលគេឱ្យខាងតែបាន »។ សូមបញ្ជាក់ថា នៅក្នុងការប្រកួត ២០លើក ហ្គ្រូវយកឈ្នះបាន១៩លើក ចាញ់១ មិនដែលស្មើ និងធ្លាប់ផ្តួលដៃគូឱ្យសន្លប់១៥លើក ៕
ចែករំលែកព័តមាននេះ