រាជធានីភ្នំពេញ ៖ កិត្តិយស និងភាពសប្បាយរីករាយកើតឡើងសម្រាប់ក្រុមសិល្បៈយីកេខេត្តតាកែវ នៅពេលឈ្មោះក្រុមនេះត្រូវបានប្រកាសឱ្យឡើងទទួលយកពានជ័យលាភីចំណាត់ថ្នាក់លេខ១ ក្នុងមហោស្រពប្រឡងសិល្បៈបុរាណថ្នាក់ជាតិ ។ ការប្រកាសជ័យលាភីនេះក្នុងទិវាវប្បធម៌ជាតិ៣ មីនា ឆ្នាំ២០១៤ នៅសាលសន្និសីទចតុម្មុខ រាជធានីភ្នំពេញ ក្រោមអធិបតីភាពប្រមុខរដ្ឋាភិបាល ។
ភាពលេចធ្លោជាងគេរបស់ក្រុមសិល្បៈយីកេប្រជាប្រិយខេត្តតាកែវនេះ គឺការសម្តែងតាមទម្រង់ដើមយីកេដំកង់ (អង្គុយជុំគ្នាជារង្វង់) ក្បួនខ្នាតត្រឹមត្រូវ និងទេពកោសល្យល្អរបស់សិល្បករ-សិល្បការិនី ។
លោកជំទាវនង ច័ន្ទថន ទីប្រឹក្សាអមក្រសួងវប្បធម៌ និងវិចិត្រសិល្បៈ និងជាគណៈកម្មការវិនិច្ឆ័យការប្រឡងសិល្បៈបុរាណ បានថ្លែងកាលពីថ្ងៃទី៤ មីនា ឆ្នាំ២០១៤ ថា «ជាការកត់សម្គាល់ទម្រង់យីកេរបស់អ្នកតាកែវយកមកសម្តែងនេះ ជាទម្រង់ដើមបំផុតរបស់លោកតាឃីបានរៀបចំ ហើយបន្សល់ទុកដល់កូនចៅជំនាន់ក្រោយដែលរក្សាបានទម្រង់នេះ ។ នេះជាទម្រង់យីកេដំកង់ ហើយអ្នកសម្តែងទាំងអស់គឺអង្គុយជុំវិញគ្នានៅលើឆាក ។ ការសម្តែងរបស់គេឃើញថា មានប្រមាណជា៥០%ទៅ៦០% នៃទម្រង់ដើម ទោះជាមានការអភិវឌ្ឍមែន តែមិនប្រាសចាកពីទម្រង់ដើមទេ ។ គេយករឿង «សុវណ្ណសាម» មកសម្តែង ជារឿងរបស់ព្រះ គឺសម្តែងល្អ ហើយការរៀបចំត្រូវទម្រង់ដើម ខុសប្លែកតែយើងមានឆាកជាភ្លើងអគ្គិសនី មានសម្លៀកបំពាក់ មានលាបមុខម្សៅទំនើបមែន តែខ្លឹមសារគ្មានកែទេ។ ដូចនេះគណៈកម្មការមើលឃើញថា រឿងរបស់គាត់មានលក្ខណៈលេចធ្លោជាងគេ ។
ជាការកត់សម្គាល់អ្នកមកប្រឡង នីមួយៗរបស់ខេត្ត នីមួយៗគឺមានចំណុចខ្វះខាតខ្លះ ព្រោះនោះជាសិល្បៈមហាជន ។ បើអ្នកមានប្រាក់ខែរដ្ឋ នោះជាអ្នកអាជីព តែអ្នកមហាជននិស្ស័យប៉ុនណាគឺហាត់ប៉ុណ្ណឹង គឺធ្វើតាមការយល់ដឹង ។ យើងបានផ្តាំដល់បណ្តាក្រុមដែលកែលម្អរួចហើយថា អ្នកឯងខ្វះអ្វីត្រូវចេះពង្រីកសមត្ថភាពខ្លួនឯង បើរាំត្រូវឱ្យពូកែរាំ ការដំឡើងល្ខោនក្តីក៏ត្រូវពឹងលើសមត្ថភាពស្រាវជ្រាវជាមុនសិន ពិសេសប្រវត្តិរឿងឱ្យពិតសិន មានទីតាំងមែនអត់នៅកន្លែងណា នេះហើយគេហៅថាការស្រាវជ្រាវ» ។ លោកប្រាក់ ប៊ន ប្រធានមន្ទីរវប្បធម៌ និងវិចិត្រសិល្បៈខេត្តតាកែវ ថ្លែងទាំងមានមោទនភាពចំពោះក្រុមយីកេខេត្តតាកែវថា «យើងទាំងអស់គ្នានៅតែរក្សាបានរូបភាពជ័យលាភីល្អជារៀងរាល់ឆ្នាំ ។ នេះដោយសារតែសិល្បករដែលយើងបណ្តុះបណ្តាលគាត់ទទួលបានផែនការហាត់រៀនជាប្រចាំ មិនធ្វេសប្រហែសឡើយ ។ យើងបានដាក់ផែនការឱ្យអ្នកសិល្បៈអាជីពទៅជួយបង្រៀនសិល្បៈមហាជន រើសពេលវេលាបង្ហាត់គ្នា យកចិត្តទុកដាក់ជាមួយគ្នា ឱ្យពួកគាត់សម្តែងបានល្អ ។
រឿងមួយទៀតយើងបានព្យាយាមរើសយកខ្លឹមសារ ព្រោះសំខាន់ណាស់ដោយសារតែកាលណាយើងចូលរួមកម្មវិធី នីមួយៗត្រូវមើលទៅលើបញ្ហាខ្លឹមសារជាសំខាន់ ។ គណៈមេប្រយោគយើងត្រូវដឹងថា ពួកគាត់ត្រូវការអ្វីជាចាំបាច់នៅពេលដែលគាត់ដាក់ផែនការឱ្យប្រឡង ។ ដូច្នេះហើយទើបឱ្យតែបានទទួលព័ត៌មានហើយ យើងតែងតែប្រមូលគ្នាគិតពីខ្លឹមសារ ហើយបានចាត់ចែងជាលក្ខណៈសម្តែង ទោះជារឿងនោះជារឿងថ្មី សំខាន់ពឹងលើខ្លឹមសារជាគោល ។ យើងបានយករឿងបុរាណមួយមកដាក់ប្រឡង ហើយក្នុងរឿងនោះយើងបានព្យាយាមរកទម្រង់យីកេបុរាណ តែមិនមែនជាបុរាណធម្មតាទេ ជាទម្រង់យីកេដំកង់ ។ យីកេប្រភេទនេះ មានតាំងពីយូរលង់មកហើយ តែគេមិនសូវសម្តែងទេ ទើបយើងជ្រើសរើសយកយីកេដំកង់នេះមកសម្តែង ។ យើងបានបង្ហាញជូនពីក្បាច់ដើម្បីបង្ហាញជូនពីរបៀបយីកេដំកង់ និងយើងបង្ហាញថា យីកេដំកង់មានរាំបិទ ព្រោះក្បាច់រាំរក្សាទុកតាំងពីយូររបស់ខេត្តតាកែវទាំងមូល ។ ខ្ញុំបានចងក្រងក្បាច់យីកេនេះដើម្បីរក្សាទុកជូនកូនខ្មែរទាំងអស់បានស្គាល់ ហើយប្រមាណជា២ ឬ៣ឆ្នាំទៀត ខ្ញុំនឹងសម្រេចឱ្យចប់ ដើម្បីឱ្យកូនខ្មែរស្គាល់ ព្រោះខ្លាចយីកេយើងបាត់បង់ ។ អ្នកខេត្តតាកែវ បានបង្ហាញពីខ្លឹមរបស់យីកេពិតប្រាកដ ជាបាតរបស់យីកេ ជាក្បាច់ដើមរបស់យីកេ ពីរបៀបសម្តែងបុរាណ ។
សម្រាប់ឱកាសទិវាវប្បធម៌ជាតិ អ្នកបានទស្សនាយីកេខេត្តតាកែវរឿង «សុវណ្ណសាម» គឺយើងសម្តែងបានតែ២០នាទីប៉ុណ្ណោះ តែឃើញថា អ្នកទស្សនាដក់អារម្មណ៍យីកេរបស់យើងគឺគាត់ហូរទឹកភ្នែកតាមសាច់រឿងទសជាតក របស់ព្រះពុទ្ធសាសនា ។ ចំពោះតួអង្គយើងបានជ្រើសរើសយ៉ាងចម្រាញ់បំផុត ជាក់ស្តែងតួអង្គសុវណ្ណសាម យើងបានសម្លឹងមើលរយៈពេល៣ឆ្នាំមកហើយ ដោយបានបង្ហាត់បង្រៀនតួអង្គនេះយ៉ាងយកចិត្តទុកដាក់បំផុត ព្រមទាំងជួយបង្ហាត់ដល់ផ្ទះទៀតផង ព្រោះគាត់មាននិស្ស័យជាមួយសិល្បៈ មិនត្រឹមតែច្រៀងទេ សូម្បីតែការនិយាយស្តីក៏ពីរោះគួរឱ្យចង់ស្តាប់សមជាអ្នកយីកេ» ។ ចំណែកលោកអោក សាវង្ស ជាតួអង្គយីកេក្នុងរឿង «សុវណ្ណសាម» និងជាអតីតជ័យលាភីចំណាត់ថ្នាក់លេខ២ ផ្នែកចម្រៀងយីកេ ក្នុងកម្មវិធីប្រឡងចម្រៀងមរតកវប្បធម៌ខ្មែរ របស់ស្ថានីយទូរទស្សន៍បាយ័ន នាពេលកន្លងមក បានថ្លែងថា លោកចេះតែច្រៀងទេ ព្រោះចូលចិត្តច្រៀង មិនពូកែសម្តែងទេ ។ ដូច្នេះហើយគ្រាន់តែលោកគ្រូហៅឱ្យទៅសម្តែងរឿងសុវណ្ណសាម សម្រាប់ប្រឡង គឺភ័យបុកពោះ ។ លោកចូលរួមសម្តែងប្រឡងនេះហាត់បានតែបួនដប់ថ្ងៃប៉ុណ្ណោះ ។ លោកមានចរិតខ្មាសអៀនណាស់ ពិសេសរឿងស្នេហាលើឆាកអូនបង គឺទៅមិនរួច ហើយកាន់តែភ័យនោះគឺជាការធ្វើទឹកមុខ គឺមិនពូកែទេ ។ ទោះជាយ៉ាងណាក្តី លោកប្រធានមន្ទីរវប្បធម៌ និងវិចិត្រសិល្បៈខេត្តតាកែវ ប្រាក់ ប៊ន ខំជួយបង្ហាត់ ទើបរូបលោកទទួលបានផ្លែផ្កាល្អបែបនេះ ។
លោកអោក សាវង្ស សប្បាយចិត្តណាស់ដែលក្រុមសិល្បៈយីកេខេត្តតាកែវរបស់លោកទទួលបានចំណាត់ថ្នាក់លេខ១ ក្នុងមហោស្រពថ្នាក់ជាតិ ។ ចំពោះលោក ទិត្យ សាវ៉ន ជាតួត្លុកនាយខ្ចៅ ដែលសម្តែងក្នុងយីកេ រឿងសុវណ្ណសាម ដែរនោះ មានប្រសាសន៍ថា ដ្បិតតែលោកបានប្រឡូកការសម្តែងបែបបុរាណយូរមកហើយមែន តែសម្រាប់ការប្រឡងយកស្នាដៃ លោកខិតខំព្យាយាមសម្តែងធ្វើយ៉ាងណាឱ្យសមជាតួត្លុក ព្រោះនេះជាការសហការគ្នា គ្មានតួណាតម្កើងខ្លួនជាតួអង្គឯក តួរងទេ ព្រោះជ័យលាភីបានមកគឺបានទាំងអស់គ្នា កើតពីការសាមគ្គីគ្នា ។ ដូចនេះ លោកសប្បាយចិត្តណាស់នៅពេលសិល្បៈយីកេខេត្តតាកែវ នៅតែទទួលបានជោគជ័យ មានការគាំទ្រ និងនៅតែទាក់ទាញប្រជាប្រិយភាព ។ នាយខ្ចៅសន្យាថា នឹងខិតខំបង្ហាត់បង្រៀន ក្មេងៗរលកក្រោយឱ្យមានទេពកោសល្យខ្ពស់ និងកាន់តែសម្បូរបន្ថែមទៀត សម្រាប់ក្រុមយីកេខេត្តតាកែវ ៕
ចែករំលែកព័តមាននេះ