ខេត្តមណ្ឌលគិរី ៖ ជាយូរលង់ណាស់មកហើយ ប្រពៃណីចូលព្រៃរុករកអនុផលព្រៃឈើរបស់ជនជាតិដើមភាគតិច ត្រូវបានអនុវត្តបន្តជាច្រើនជំនាន់ រហូតមកដល់បច្ចុប្បន្នដូចជា ដងជ័រទឹកតាមដើមឈើច្បោះ បរបា.ញ់សត្វ បោចវល្លិ បេះបន្លែបង្ការ ផ្លែឈើព្រៃ និងឱសថជាដើម…។
ខេត្តមណ្ឌលគិរី ៖ ជាយូរលង់ណាស់មកហើយ ប្រពៃណីចូលព្រៃរុករកអនុផលព្រៃឈើរបស់ជនជាតិដើមភាគតិច ត្រូវបានអនុវត្តបន្តជាច្រើនជំនាន់ រហូតមកដល់បច្ចុប្បន្នដូចជា ដងជ័រទឹកតាមដើមឈើច្បោះ បរបាញ់សត្វ បោចវល្លិ បេះបន្លែបង្ការ ផ្លែឈើព្រៃ និងឱសថជាដើម…។ ទោះជាយ៉ាងណា នាពេលបច្ចុប្បន្ននេះ ប្រភពធនធានទាំងនោះ កំពុងបាត់បង់ជាបន្តបន្ទាប់ជារៀងរាល់ថ្ងៃក្រោមរូបភាពផ្សេងៗគ្នា ហើយក៏ស្ថិតនៅក្នុងក្តីបារម្ភរបស់បងប្អូនជនជាតិភាគតិច ដែលរស់នៅអាស្រ័យផលពីព្រៃឈើដ៏មានតម្លៃនេះ ។
ជនជាតិដើមភាគតិចរស់នៅភូមិពូគង់ ឃុំស្រែព្រះ ស្រុកកែវសីមា និយាយថា ដើមឈើទុកសម្រាប់ដងជ័រ ឬដើមឈើច្បោះជាច្រើនដើម ត្រូវបានគេកាប់ផ្តួលរំលំយ៉ាងរង្គាលនៅតាមដងព្រៃ ហើយពួកគាត់កំពុងប្រឈមនឹងបញ្ហាមួយចំនួនដូចជា ការបាត់បង់ប្រពៃណីវប្បធម៌ បាត់បង់មុខរបរដែលអាស្រ័យផលពីធនធានធម្មជាតិដូចជា បោចវល្លិ រកជ័រទឹក ជ័រច្បោះ និងជាពិសេសបាត់បង់កម្មសិទ្ធិសមូហភាព ឬដីបញ្ចុះសព ដែលជាដីព្រៃត្រណមអារក្សជាដើម ។ លោក ទ្រឺម ធើម ប្រធានសហគមន៍ដីព្រៃជនជាតិដើមភាគតិចព្នងនៅភូមិពូគង់ រៀបរាប់ថា មានក្រុមហ៊ុនមួយឈ្មោះ ប៊ិនភឿក១ ដែលជាក្រុមហ៊ុនរបស់លោកឧកញ៉ា អុល កំពុងបន្តឈូសឆាយដីព្រៃរបស់ពួកគាត់ និងព្រៃត្រណមអារក្សត្រង់ចំណុចជ្រោះអូរកូនព្រះ ដែលជាកន្លែងជនជាតិដើមភាគតិចគោរពបូជា ។
ពូធើមនិយាយប្រាប់កោះសន្តិភាពទាំងខឹងថា ជាមួយនេះ ថែមទាំងកាប់រំលំដើមឈើដងជ័រអស់ជាច្រើនដើម ធ្វើឱ្យប៉ះពាល់ដល់ជីវភាពរស់នៅប្រចាំថ្ងៃរបស់ពួកគាត់យ៉ាងខ្លាំង ដែលរំពឹងដោយការអាស្រ័យផលពីព្រៃឈើទាំងនេះ ។ គាត់និយាយបន្តថា កន្លងមកពួកគាត់ក៏ធ្លាប់ស្វែងរកសុំការអន្តរាគមន៍ពីអាជ្ញាធរមូលដ្ឋាន និងអង្គការនានា រហូតដល់អាជ្ញាធរខេត្តដែរ ប៉ុន្តែមិនទទួលបានចំណាត់ការណាមួយគួរឱ្យកក់ក្តៅទេ រហូតមកដល់ពេលនេះ ។ គាត់ថា ក្រុមហ៊ុនដែលមានមហិច្ឆតាជាងគេ គឺក្រុមហ៊ុនរបស់ឧកញ៉ា អុល កាប់ផ្តួលអស់ហើយឈើជ័រច្បោះ និងឈូសឆាយអស់ដីបញ្ចុះសពរបស់ជនជាតិភាគតិចព្នង ។ គេតែងសង្កេតឃើញ រាល់ក្រុមហ៊ុនដែលបានទទួលសិទ្ធិពីរាជរដ្ឋាភិបាល ច្រើនមានបញ្ហាកាប់ទន្ទ្រានដីនិងព្រៃឈើ លើសពីកិច្ចសន្យាជាមួយរដ្ឋ ដូចករណីខាងលើនេះស្រាប់ ។ កោះសន្តិភាពពុំអាចសុំការបំភ្លឺពីតំណាងក្រុមហ៊ុនបានទេ ព្រោះតែពុំស្គាល់លេខទូរស័ព្ទ ។ ទោះជាយ៉ាងនេះក្តី ភាពជាក់ស្តែង បានបង្ហាញយ៉ាងច្បាស់ទៅហើយ ដូច្នេះចាំមើល តើអាជ្ញាធរនឹងមានវិធានការបែបណាចំពោះករណីនេះ ? បើនៅតែបណ្តែតបណ្តោយ មិនយូរមិនឆាប់ទេអ្នកដែលរងគ្រោះនោះ គឺប្រជាពលរដ្ឋក្រីក្រ ដែលធ្លាប់ពឹងពាក់អាស្រ័យផលនានា ពីព្រៃព្រឹក្សាឱ្យជួបភាពលំបាកកាន់តែខ្លាំងទ្បើងៗ ។
កោះសន្តិភាព ពុំអាចសុំការបំភ្លឺពីមន្ត្រីអាជ្ញាធរមូលដ្ឋាននិងស្ថាប័ននានា ដែលពាក់ព័ន្ធបានទេនៅថ្ងៃទី៤ មីនា ៕
ចែករំលែកព័តមាននេះ