រាជធានីភ្នំពេញ៖ សេវាដឹកជញ្ជូនសាធារណៈតាមរថយន្តក្រុងដែលសាលារាជធានីភ្នំពេញសហការជាមួយទីភ្នាក់ងារសហប្រតិបត្តិការអន្តរជាតិរបស់ប្រទេសជប៉ុន ( JICA) បានបើកដំណើរការសាកល្បងរយៈពេល១ខែ កាលពីថ្ងៃទី០៤ កុម្ភៈ ២០១៤ នៅលើមហាវិថីព្រះមុនីវង្សចាប់ពីរង្វង់មូលស្តាតចាស់ដល់ផ្សារច្បារអំពៅនោះ នឹងបិទបញ្ចប់នៅថ្ងៃទី០៥ មីនាស្អែកនេះ ។ ប៉ុន្តែបើតាមអ្នកនំាពាក្យសាលារាជធានីភ្នំពេញ លោក ឡង ឌីម៉ង់ បានឲ្យដឹងថា សាលារាជធានីភ្នំពេញសហការជាមួយក្រុមហ៊ុនដឹកជញ្ជូន នឹងបន្តដំណើរការសាកល្បង១ខែទៀត ។
ថ្លែងបា្រប់ក្រុមអ្នករាយការណ៏ព័ត៌មាននៅសាលារាជធានិភ្នំពេញ នាព្រឹកថ្ងៃទី០៤ មីនា ២០១៤ លោក ឡង ឌីម៉ង់ បានឲ្យដឹងទៀតថា ការសាកល្បងរយៈពេល១ខែទៀតនេះ សាលារាជធានីភ្នំពេញ មិនគិតពីការខាតចំណេញនោះទេ ធ្វើយ៉ាងណាបំផុសនិងចលនាប្រជាពលរដ្ឋឲ្យងាកមកធ្វើដំណើរតាមរថយន្តក្រុង ដើម្បីកាត់បន្ថយការកកស្ទះចរាចរណ៏ ជាពិសេសគ្រោះថ្នាក់ចរាចរណ៏នោះថែមទៀត ។ អ្នកនំាពាក្យសាលារាជធានិភ្នំពេញរូបនេះ ក៏បានបញ្ជាក់ឲ្យដឹងទៀតថា នៅក្នុងពេលឆាប់ៗនេះ សាលារាជធានីភ្នំពេញ នឹងបើកដំណើរការរថយន្តក្រុងបន្ថែមទៀតនៅលើមហាវិថីកម្ពុជាក្រោម និង មហាវិថី ម៉ៅ សេទុង ។
លោក ឡង ឌីម៉ង់ បញ្ជាក់ឲ្យដឹងដែរថា ការសាកល្បងសេវាដឹកជញ្ជូនតាមរថយន្តក្រុងរយៈពេល៤សបា្តហ៏កន្លងមកនេះ ទទួលបានអ្នកជិះចំនួន៤២០០០នាក់ ក្នុងនោះរយៈពេល២សបា្តហ៏ដំបូងគិតជាមធ្យមមានប្រជាពលរដ្ឋជិះចំនួន១៧០០នាក់ក្នុងមួយថ្ងៃ និងពីរសបា្តហ៏ក្រោយទទួលបាន ១៥០០នាក់ក្នុងមួយថ្ងៃ ។
យ៉ាងណាក៏ដោយ បើតាមអ្នកនំាពាក្យសាលារាជធានីភ្នំពេញ ការសាកល្បងដាក់ឲ្យដំណើរការរថយន្តក្រុងរយៈពេល១ខែនេះ សាលារាជធានីភ្នំពេញទទួលបានជោគជ័យ ដោយសារទទួលបានការគំាទ្រពីប្រជាពលរដ្ឋតាមរយៈការធ្វើបទសម្ភាសន៏ ក្នុងនោះប្រជាពលរដ្ឋជាង៣០% បាននិយាយថា សេវាល្អណាស់ ៥៩ % និយាយថាសេវាល្អ និង សល់ប៉ុន្មាននិយាយថាសមរម្យ ៕
ចែករំលែកព័តមាននេះ