រាជធានីភ្នំពេញ ៖ ភាពសប្បាយរីករាយមិនកើតទ្បើងទេ សម្រាប់មហាជនខ្មែរកាលពីម្សិលមិញ (៣ មីនា ឆ្នាំ២០១៤) ខណៈការរង់ចាំតាមដានយ៉ាងយកចិត្តទុកដាក់ តែខ្សែភាពយន្តរឿង «The Great Beauty» នៃប្រទេសអីុតាលីបានគ្រប់គ្រងពានរង្វាន់អូស្កា មិនមែនខ្សែភាពយន្តរឿង «រូបភាពដែលបាត់បង់» របស់ខ្មែរយើង ។
រាជធានីភ្នំពេញ ៖ ភាពសប្បាយរីករាយមិនកើតទ្បើងទេ សម្រាប់មហាជនខ្មែរកាលពីម្សិលមិញ (៣ មីនា ឆ្នាំ២០១៤) ខណៈការរង់ចាំតាមដានយ៉ាងយកចិត្តទុកដាក់ តែខ្សែភាពយន្តរឿង «The Great Beauty» នៃប្រទេសអីុតាលីបានគ្រប់គ្រងពានរង្វាន់អូស្កា មិនមែនខ្សែភាពយន្តរឿង «រូបភាពដែលបាត់បង់» របស់ខ្មែរយើង ។
មហោស្រពភាពយន្តពានរង្វាន់អូស្កាដ៏ធំនោះ ខ្សែភាពយន្តខ្មែរជាស្នាដៃរបស់ផលិតករដ៏ល្បីឈ្មោះលោក រិទ្ធី ប៉ាន់ មានកិត្តិយសបានចូលរួមដែរ ។ ខ្សែភាពយន្តរឿង «រូបភាពដែលបាត់បង់» របស់លោក រិទ្ធី បា៉ន់ ត្រូវបានជ្រើសរើសយកទៅប្រកួតប្រជែងដណ្តើមពានរង្វាន់អូស្កា កាលពីថ្ងៃទី៣ មីនា ឆ្នាំ២០១៤ នៅទីក្រុងទ្បូសអេនចឺទ្បេស សហរដ្ឋអាមេរិក រួមជាមួយនឹងខ្សែភាពយន្ត៤ផ្សេងទៀត ពីប្រទេសប៉ាទ្បេស្ទីន អីុតាលី ដាណឺម៉ាក និងប៊ែលហ្ស៊ិក ។ ទោះជាយ៉ាងណាក៏ដោយ យើងមានមោទភាព ដែលខ្សែភាពយន្តស្នាដៃផលិតករខ្មែរ បានលេចមុខនៅក្នុងការប្រកួតប្រជែងភាពយន្តជាលក្ខណៈអន្តរជាតិដណ្តើមពានរង្វាន់អូស្កា ។
ទាក់ទងនឹងការប្រកួតប្រជែងដ៏ធំនោះ នាព្រឹកថ្ងៃទី៣ មីនា ឆ្នាំ២០១៤ នៅមជ្ឈមណ្ឌលបណ្តុះបណ្តាលភាពយន្តបុប្ផាណារាជធានីភ្នំពេញ មានការជួបជុំមួយ ដើម្បីអបអរសាទរព្រឹត្តិការណ៍ផ្សាយបន្តផ្ទាល់នៃការប្រកួតប្រជែងពានរង្វាន់អូស្កា ពិសេសរង់ចាំមើលលទ្ធផលខ្សែភាពយន្តរឿងរូបភាពដែលបាត់បង់របស់ខ្មែរយើង ។
លោកសូ ច័ន្ទតារា អ្នកសម្របសម្រួលនៅមជ្ឈមណ្ឌលបណ្តុះបណ្តាលភាពយន្តបុប្ជាណារាជធានីភ្នំពេញ បានសម្តែងការសោកស្តាយ ដែលស្នាដៃរបស់ផលិតករខ្មែរយើងលោក រិទ្ធី ប៉ាន់ មិនទទួលបានពានរង្វាន់អូស្កា ប៉ុន្តែលោកថា យើងគួរតែមានមោទភាពបំផុត ខណៈដែលខ្សែភាពយន្តខ្មែរ ត្រូវគេជ្រើសរើសយកទៅប្រកួតប្រជែងចុងក្រោយ ដើម្បីដណ្តើមពានរង្វាន់អូស្កា ដែលជាពានរង្វាន់ដ៏ធំសម្រាប់វិស័យភាពយន្តលើពិភពលោក ។
លោកសូ ច័ន្ទតារា បានលើកទ្បើងថា អ្នកណាក៏មិនស្មានដល់ថា ខ្សែភាពយន្តខ្មែរអាចនឹងឈានដល់ការប្រកួតប្រជែងចុងក្រោយនៃពានរង្វាន់អូស្កានោះទេ ខណៈដែលប្រទេសយើងស្ថិតក្នុងបណ្តាប្រទេសកំពុងអភិវឌ្ឍន៍ ដែលមានកង្វះខាតទាំងឧបករណ៍ សម្ភារ ប្រាក់ សម្រាប់ផលិត និងធនធានមនុស្សខាងវិស័យភាពយន្ត ។ បើប្រៀបធៀបរវាងខ្សែភាពយន្តប្រទេសអីុតាលី ដែលទទួលបានពានរង្វាន់អូស្កាពេលនេះ និងខ្សែភាពយន្តរឿង «រូបភាពដែលបាត់បង់» របស់ខ្មែរយើងគឺខុសគ្នាឆ្ងាយណាស់អំពីប្រភពធនធាននៃការចំណាយ និងសមត្ថភាពនៃការដឹកនាំរឿង ។ ប៉ុន្តែអំពីខ្លឹមសារ និងគំនិតច្នៃប្រឌិតផលិតខ្សែភាពយន្តវិញ គឺវាប្រហាក់ប្រហែលគ្នា ដូច្នេះហើយទើបផលិតករខ្មែរយើងដែលបានរួមគ្នាផលិតខ្សែភាពយន្តរឿង «រូបភាពដែលបាត់បង់» សប្បាយរីករាយ រួមទាំងមានមោទនភាពយ៉ាងខ្លាំងបំផុតក្នុងពេលដែលខ្សែភាពយន្តខ្មែរយើងត្រូវបានជ្រើសរើសចូលរួមប្រកួតក្នុងជុំចុងក្រោយ ដើម្បីដណ្តើមពានរង្វាន់អូស្កាដ៏ធំនេះ ខណៈដែលខ្សែភាពយន្តជាច្រើនទៀតត្រូវបានជម្រុះចេញ ។ កន្លងមកលោក រិទ្ធី ប៉ាន់ មានស្នាដៃខ្សែភាពយន្តផ្សេងទៀត ដូចជារឿង«អ្នកស្រែ» និងរឿង«រាត្រីមួយក្រោយសង្គ្រាម»ជាដើម ។
លោកសូ ច័ន្ទតារា អំពាវនាវឱ្យប្រជាពលរដ្ឋគាំទ្រភាពយន្តខ្មែរ ព្រោះបច្ចុប្បន្នវិស័យភាពយន្តខ្មែរកំពុងតែមានការអភិវឌ្ឍគួរឱ្យកត់សម្គាល់ ហើយភាពយន្តខ្មែរយើងក៏អាចឈានទៅចូលរួមក្នុងការប្រកួតប្រជែងជាលក្ខណៈអន្តរជាតិផងដែរ ។
ចំពោះរឿង The Great Beauty និពន្ធ ដោយលោក Paolo Sorrentino និងដឹកនាំបច្ចេកទេសផលិតថតដោយ លោក Tino Servillo ។ ភាពយន្តនេះបរិយាយអំពីប្រវត្តិអ្នកនិពន្ធ ដែលរូបលោកមានបញ្ហាផ្លូវចិត្តនៅពេលលោកសម្លឹងមើលទៅអតីតកាលបន្ទាប់ពីខួបកំណើតលើកទី៦៥ បានប្រារព្ធធ្វើទ្បើង ។
នេះជាលើកទី១១ ហើយដែលខ្សែភាពយន្តរបស់អីុតាលី ទទួលបានពានរង្វាន់អូស្កា តាមរយៈការប្រកួតប្រជែងខ្សែភាពយន្តប្រើប្រាស់ភាសាបរទេស ។ កាលពីឆ្នាំ១៩៩៨ លោក Paolo Sorrentino ក៏ធ្លាប់ទទួលបានជ័យជម្នះសម្រាប់ខ្សែភាពយន្តមានចំណងជើងថា «Life is Beautiful» របស់លោកផងដែរ ។
ខ្សែភាពយន្តដែលបានឆ្លងកាត់ការជម្រុះ និងបានចូលរួមប្រកួតប្រជែងវគ្គផ្តាច់ព្រ័ត្រ រួមមានរឿង «The Broken Circle Breakdown» ជាខ្សែភាពយន្តរបស់ប្រទេសប៊ែលហ្ស៊ិក រឿង «Omar» ខ្សែភាពយន្តរបស់ប្រទេសប៉ាទ្បេស្ទីន រឿង«The Missing Picture» របស់កម្ពុជា រឿង «The Great Beauty» របស់អីុតាលី និងរឿង «Hunt» របស់ដាណឺម៉ាក ៕
ចែករំលែកព័តមាននេះ