យោងតាមវេជ្ជបណ្ឌិតជំនាញថា នៅពេលដែលប្រព័ន្ធការពាររាងកាយរបស់មនុស្សម្នាក់មានភាពរឹងមាំ នោះកោសិកាមហារីកនឹងត្រូវបានបំផ្លាញហើយការកកើតកូនចៅរបស់វាព្រមទាំងការបង្កើតជាដុំសាច់ក៏ត្រូវបានទប់ស្កាត់ផងដែរ ។
ទោះជាយ៉ាងនេះក្តី តាមអ្នកជំនាញខាងចំណីអាហារថា គេអាចបង្ការកុំឱ្យកើតមានជំងឺមហារីកបានតាមរយៈការទទួលទានអាហារដែលផ្តល់ផលប្រយោជន៍ដល់សុខភាពចំនួន១០ប្រភេទ ៖
១.មើមការ៉ុត ៖
វាត្រូវបានគេចាត់ទុកថាជាវីរបុរសអាហារបំប៉នរាងកាយ ដ្បិតមានសារធាតុចិញ្ចឹមច្រើនបំផុត ។ គ្មានផ្លែឈើឬបន្លែណាដែលផ្ទុកសារធាតុការ៉ូតែន(Carotene)ច្រើនជាងមើមការ៉ុតឡើយ ។ សារធាតុនេះហើយដែលរាងកាយបំលែងទៅជាវីតាមីន A ។ ការ៉ុតត្រូវអ្នកវិទ្យាសាស្ត្រដាក់ការសង្ស័យថា មានប្រសិទ្ធភាពប្រឆាំងនឹងមហារីកពោះវៀនធំ ។ នៅក្នុងមើមការ៉ុតដែលគេកិនម៉ដ្ឋទៅជាទឹកចំណុះ១ពែង មានសារធាតុចិញ្ចឹមដូចជា ៖ vitamin A407.6%,vitamin K20.1%,fiber(សារធាតុសរសៃ) 13.6%,vitamin C 12%,potassium 11.1%, vitamin B6 8.5%,vitamin B3 6% ,vitamin B1 5.3% ។ល។
២.ផ្កាខាត់ណា ៖
ជាបន្លែមួយប្រភេទដែលបណ្តាអ្នកវិទ្យាសាស្ត្របានកំពុងស្រាវជ្រាវដ្បិតចំណុចសំខាន់របស់វាគឺទប់ទល់នឹងជំងឺមហារីកបានច្រើនមុខ ។ សមាសធាតុគីមីនៅក្នុងផ្កាស្ពៃនេះត្រូវគេរកឃើញថា អាចប្រឆាំងនឹងជំងឺមហារីកប្លោកនោម មហារីកដោះ មហារីកពោះវៀនធំ មហារីកក្រពេញប្រូស្តាត និងមហារីកអូវែរផងដែរ ។ សារធាតុចិញ្ចឹមរបស់ខាត់ណាផ្កាមានដូចជា vitamin C 85.9%,vitamin K 20.7%, folate15.2%,choline11.1%,vitaminB6 10%, potassium9.1%, fiber8.5%, manganese 8.5%, ។ល។
៣.ពពួកផ្សិត ៖
រាប់ពាន់ឆ្នាំមកហើយ ផ្សិតគឺជាអាហារប្រពៃណីរបស់ប្រជាជន មិនត្រឹមតែនៅអាស៊ី តែនៅលោកខាងលិចផងដែរ ។ វាត្រូវបានគេគិតថា ជាប្រភពនៃសារធាតុបំប៉នរាងកាយដ៏មានថាមពល ។ វាគ្មានផ្ទុកសារធាតុខ្លាញ់ មានកាឡូរីនិងសូដ្យូមទាប ។ មានឥទ្ធិពលប្រឆាំងនឹងមហារីកដោះនិងក្រពេញប្រូស្តាត ។ នៅក្នុងផ្សិតឆៅទម្ងន់ ១៤១,៧៥ក្រាមមានផ្ទុកសារធាតុចិញ្ចឹម៖ selenium52.6%, vitaminB2 40.5%,copper(ទង់ដែង)35.5%,vitamin B3 26.9%, vitamin B 5 21.3%,potassium18.1%, phosphorus 17%,zinc(ស័ង្កសី)10.4%,manganese10%, vitamin B1 8.6%,protein 7% ។
៤.ដំឡូងជ្វា ៖
ដំឡូងជ្វាមិនត្រឹមតែមើលទៅដូចជាបង្អែមលាងមាត់ប៉ុណ្ណោះទេ ប៉ុន្តែវាផ្តល់នូវអត្ថប្រយោជន៍សុខភាពដ៏គួរឱ្យភ្ញាក់ផ្អើល ។ មនុស្សជាច្រើនគិតថា ដំឡូងជ្វាគ្មានអ្វីពិសេសនិងខុសពីដំឡូងដទៃទេ ។ ការសិក្សាក្នុងមន្ទីរពិសោធន៍ បង្ហាញថា ក្រៅពីមានរសជាតិផ្អែម ដំឡូងជ្វាមានប្រយោជន៍ប្រឆាំងនឹងពពួកផ្សិតក្នុងសរីរាង្គកាយនិងប្រឆាំងនឹងពពួកបាក់តេរី ។ នៅក្នុងដំឡូងស្ងោរឆ្អិនទម្ងន់ ១១៤ក្រាមគឺមានសារធាតុចិញ្ចឹមរាងកាយ ៖ vitamin A 438.1%, vitaminC37.2%,manganese28.4%,vitamin B616.5%, tryptophan15.6%,potassium15.4%,fiber 15%,vitamin B 5 10.1%,copper 9%,vitamin B 3 8.5% និង កាឡូរី 5% ។
៥.ផ្លែទំពាំងបាយជូរ ៖
តាមការស្រាវជ្រាវបានលាតត្រដាងថា ផ្លែទំពាំងបាយជូរស្រស់មានប្រសិទ្ធភាពជួយការពារប្រឆាំងនឹងជំងឺមហារីស្បែកព្រមទាំងជួយទប់ស្កាត់ភាពចាស់មុនអាយុ ។
បណ្តាអ្នកវិទ្យាសាស្ត្រមកពីសាកលវិទ្យាល័យបាសេឡូណានិងក្រុមប្រឹក្សាស្រាវជ្រាវជាតិរបស់ប្រទេសអេស្ប៉ាញបានបង្ហាញថា ហ្វ្លាវ៉ូណូអីុដ(flavonoids)មាននៅក្នុងផ្លែទំពាំងបាយជូរជាសារធាតុដែលជួយការពារកោសិកាស្បែកពីការបំផ្លាញដោយកាំរស្មីយូវី ។
សាស្ត្រាចារ្យបណ្ឌិត Marta Cascanteផ្នែកជីវគីមីនៅសាកលវិទ្យាល័យបាសេឡូណានិងជានាយកគម្រោងស្រាវជ្រាវលើកនេះបាននិយាយថា៖«លទ្ធផលស្រាវជ្រាវដែលគួរឱ្យលើកទឹកចិត្តនេះ វាគួរតែស្ថិតនៅក្នុងការពិចារណាក្នុងការបង្កើតនូវផលិតផលការពារស្បែក»។
នេះគឺជាលើកទី១ហើយដែលលទ្ធផលនៃការសិក្សារបស់អ្នកវិទ្យាសាស្ត្រអេស្ប៉ាញបង្ហាញថា ទំពាំងបាយជូរមានប្រសិទ្ធភាពជួយការពារកោសិកាពីកាំរស្មីយូវី ។
ចំណែកលទ្ធផលនៃការស្រាវជ្រាវមួយរបស់អីុតាលីបង្ហាញថា សារធាតុគីមីមួយប្រភេទនៅក្នុងស្រាទំពាំងបាយជូរ អាចបញ្ឈប់ជំងឺមហារីកដោះបាន។ ការសិក្សាតាមរយៈការធ្វើតេស្តិ៍ក្នុងមន្ទីរពិសោធន៍បានបង្ហាញថា Resveratrolដែលរកឃើញនៅក្នុងសម្បកផ្លែទំពាំងបាយជូរ អាចរំលាយចោលការវិវឌ្ឍរបស់ជំងឺតាមរយៈការរាំងខ្ទប់ប្រសិទ្ធភាពលូតលាស់នៃអ័រម៉ូនភេទ Oestrogen ។ វេជ្ជបណ្ឌិតសេបាស្ទីយ៉ាណូ អានដូនៃសាកលវិទ្យាល័យ Calabriaរបស់ប្រទេសអុីតាលីបាននិយាយថា៖«Resveratrol គឺជាឧបករណ៍ឱសថវិទ្យាដ៏មានសក្តានុពលមួយដែលត្រូវអភិវឌ្ឍឱ្យមានប្រសិទ្ធភាពនៅពេលដែលជំងឺមហារីកដោះស៊ាំទៅនឹងវិធីព្យាបាលតាមអ័រម៉ូន»។ Resveratrol ដំណើរការដោយការរាំងខ្ទប់ផ្លូវដែលអ័រម៉ូន Oestrogenប្រមូលផ្តុំគ្នាជាមួយDNAក្នុងរាងកាយស្ត្រីធ្វើឱ្យបាចសាចកោសិកាមហារីក ។ វេជ្ជបណ្ឌិតអានដូនិងសហការីបានរកឃើញថា ការលូតលាស់របស់កោសិកាមហារីកដោះត្រូវបានកាត់បន្ថយគួរឱ្យភ្ញាក់ផ្អើលនៅពេលវាត្រូវបានព្យាបាលដោយសមាសធាតុនៅក្នុងស្រាទំពាំងបាយជូរ ។
៦.ផ្លែក្រូចពោធិ៍សាត់ ៖
ការទទួលទានក្រូច១ផ្លែក្នុងមួយថ្ងៃអាចនឹងជួយឱ្យអ្នកឃ្លាតឆ្ងាយពីគ្រូពេទ្យ ។ យោងតាមការសិក្សាមួយដែលចុះផ្សាយនៅក្នុងព្រឹត្តិប័ត្រអាមេរិក Journal of the American College of Nutritionបញ្ជាក់ថា សារធាតុមួយប្រភេទក្នុងផ្លែក្រូចពោធិ៍សាត់អាចជួយបង្ការដំបៅឬមហារីកក្រពះ ។ ក្រូចទម្ងន់១៣១ក្រាមមានសារធាតុចិញ្ចឹមដូចតទៅ ៖ vitamin C 116.1%,fiber 12.5%, folate9.8%,vitamin B17.3%, potassium 6.7%, vitamin A 5.8%, calcium 5.2% និងកាឡូរី 3% ។
យោងតាមការសិក្សាស្រាវជ្រាវមួយដែលបានចុះផ្សាយនៅក្នុងព្រឹត្តិប័ត្រ Journal of the American Heart Associationបានបញ្ជាក់ថា សមាសធាតុមួយប្រភេទនៅក្នុងពពួកផ្លែក្រូច(ក្រូចពោធិ៍សាត់ ក្រូចថ្លុង ក្រូចជីបាងនិងក្រូចឆ្មារ…)អាចជួយកាត់បន្ថយហានិភ័យពីជំងឺដាច់សរសៃឈាមខួរក្បាលរបស់ស្ត្រីបានផងដែរ ។
៧.អាហារសមុទ្រ ៖
ប្រភេទអាហារសមុទ្រទាំងឡាយ ភាគច្រើនផ្ទុកទៅដោយសារធាតុកាល់ស្យូម ។ ការសិក្សាជាច្រើនបានបញ្ជាក់ថា អ្នកដែលមានសារធាតុនេះច្រើនក្នុងខ្លួនគឺស្ទើរតែគ្មានអត្រាគ្រោះថ្នាក់ដោយជំងឺមហារីកពោះវៀន(Colorectal cancer) នោះឡើយ ។
៨.ទំពាំងអូស្ត្រាលី Asparagus ៖
មានអត្ថប្រយោជន៍ជួយទប់ទល់នឹងការកកើតជំងឺមហារីកឈាមឬខួរឆ្អឹង Leukemia។ នៅក្នុងទំពាំងAsparagusទម្ងន់១៣៤ក្រាម មានផ្ទុក vitamin K 69.6% ខណៈ vitamin A 20.2% ។
៩.ផ្លែប៉េងប៉ោះ ៖
ប៉េងប៉ោះមានផ្ទុកសមាសធាតុម្យ៉ាងឈ្មោះ alpha-tomatineដែលជួយបន្ថយការប្រឈមនឹងជំងឺមហារីកក្រពេញប្រូស្តាតបុរស ។ នៅក្នុងប៉េងប៉ោះឆៅទម្ងន់ ១៨០ក្រាមមានផ្ទុកសមាសធាតុចិញ្ចឹមដូចតទៅ ៈ vitamin C 38.1%, vitamin A 29.9%, vitaminK 17.7%, potassium 12.1%, manganese 10.5% ។ល។
១០. សណ្តែកសៀង ៖
វាជាអាហារដែលប្រជាជនរាប់លាននាក់ទទួលទានរាប់ពាន់ឆ្នាំមកហើយ ។ បច្ចុប្បន្នសណ្តែកសៀងត្រូវគេរកឃើញថា ផ្តល់អត្ថប្រយោជន៍ប្រឆាំងនឹងជំងឺមហារីកបានផងដែរ។ គន្លឹះដ៏សំខាន់នៃអត្ថប្រយោជន៍របស់វាគឺសមាសធាតុ Genisteinដែលជាទូទៅគេស្គាល់ថា isoflavone ។ តាមរយៈការពិសោធGenisteinត្រូវគេរកឃើញថា មានសមត្ថភាពទប់ស្កាត់សកម្មភាពរបស់ប្រូតេអុីន kinasesនិងបន្ថយល្បឿនការកកើតជាដុំសាច់ ជាពិសេសពាក់ព័ន្ធនឹងករណីមហារីកដោះព្រមទាំងក្រពេញប្រូស្តាតផងដែរ ។ សណ្តែកសៀងក្នុងបរិមាណ១៧២ក្រាមមានសារធាតុចិញ្ចឹ ម ៈmolybdenum 172%, tryptophan(ប្រភេទអាមីណូអាស៊ីត)121.8%,manganese 71%,protein 57.2%, iron 49.1%, omega-3 fats 42.9%, phosphorus 42.1%, fiber 41.2%, vitamin K 41.2%និងកាឡូរី 16% ៕
ចែករំលែកព័តមាននេះ