អាំងស៊ុយលីនជាថ្នាំមួយប្រភេទបញ្ចេញមកពីលំពែងទប់ថ្លើមមិនឱ្យបញ្ចេញជាតិស្ករចូលទៅក្នុងសរសៃឈាមច្រើនលើសកំណត់ ហើយនាំស្ករពីក្នុងឈាមទៅចិញ្ចឹមកោសិកានានាក្នុងរាងកាយឱ្យមានចលនាប្រព្រឹត្តទៅបានល្អ ។ បើក្នុងខ្លួនមនុស្សគ្មានអ័រម៉ូនប្រភេទនេះការពារទេនឹងត្រូវស្លាប់ ។ លោកសាស្ត្រាចារ្យមហាបរិញ្ញាវេជ្ជបណ្ឌិត សេង សេរី ឯកទេសជំងឺទឹកនោមផ្អែមនៃមន្ទីរពេទ្យព្រះកុសុមៈ បានឱ្យដឹងថា មុខងារសំខាន់របស់អ័រមូ៉ននេះមាន ៖
១-ដឹកនាំស្ករពីឈាមទៅចិញ្ចឹមកោសិកា ធ្វើឱ្យអត្រាជាតិស្ករក្នុងឈាមថយចុះ ។
២-ដឹកនាំសារធាតុអំបិល ល្បាយឈ្មោះ ប៉ូតាស្យូមទៅឱ្យកោសិកា ។
៣-ការពារកោសិកាខ្លាញ់មិនឱ្យបំបែកខ្លាញ់ចូលក្នុងសរសៃឈាមធ្វើឱ្យបរិមាណខ្លាញ់ក្នុងឈាមថយចុះ ។
៤-ទប់ថ្លើមមិនឱ្យបញ្ចេញជាតិស្ករចូលក្នុងសរសៃឈាមច្រើន និងសារសំខាន់មួយទៀតគឺវាទប់ថ្លើមមិនឱ្យបញ្ចេញសារធាតុឈ្មោះ អាសេទោន ដែលអាចធ្វើឱ្យអ្នកជំងឺទឹកនោមផ្អែមសន្លប់ ឬអាចស្លាប់ភ្លាមៗបាន ។ ដូច្នេះអ្នកជំងឺទឹកនោមផ្អែមដែលខ្វះអាំងស៊ុយលីនការពារមិនអាចមានជីវិតរស់នៅបានយូរនោះទេ ។
អ្វីជាអាំងស៊ុយលីន?
ថ្នាំអាំងស៊ុយលីនគឺជាអ័រម៉ូនដែលគេចម្រាញ់ដាក់ក្នុងដបអំពូល សម្រាប់ចាក់ក្រោមស្បែកចូលក្នុងស្រទាប់ខ្លាញ់ឬសរសៃព្យាបាលអ្នកជំងឺទឹកនោមផ្អែមឱ្យរស់នៅបានយូរដូចមនុស្សធម្មតា ។ ចំពោះអ្នកជំងឺទឹកនោមផ្អែមខ្លះដែលកំពុងព្យាបាលដោយថ្នាំគ្រាប់ គ្រូពេទ្យអាចប្តូរមកចាក់អាំងស៊ុយលីនវិញនៅក្នុងករណីមានការវះកាត់ជំងឺធ្ងន់ធ្ងរផ្សេងៗ ។ ថ្នាំនេះមានច្រើនប្រភេទដែលគ្រូពេទ្យឯកទេសជាអ្នកជ្រើសរើស អ្វីដែលសំខាន់គឺអ្នកជំងឺត្រូវចងចាំចំនួននៃការចាក់ប៉ុន្មានដងក្នុងមួយថ្ងៃ? ប៉ុន្មាននាទីមុនបាយ? ឬចាក់រាល់ថ្ងៃនៅម៉ោងប៉ុន្មាន ។
មូលហេតុដែលត្រូវចាក់ ៖
១-រយៈពេលនៃការចាប់ផ្តើមធ្វើសកម្មភាពរបស់ថ្នាំ
២-រយៈពេលសកម្មភាពរបស់ថ្នាំខ្ពស់បំផុត
៣-រយៈពេលសកម្មភាពរបស់ថ្នាំធម្មតា
-ថ្នាំខ្លះធ្វើសកម្មភាពបាន១២ម៉ោងគេត្រូវចាក់ថ្នាំមួយថ្ងៃ២ដង ។
-ថ្នាំខ្លះរយៈពេលសកម្មភាពរបស់វាបាន២៤ម៉ោង គេត្រូវចាក់ថ្នាំមួយថ្ងៃ១ដង ។
ចំពោះលក្ខណៈរូបនៃថ្នាំខ្លះ មើលទៅឃើញមានពណ៌សថ្លា ខ្លះមានពណ៌សល្អក់ដូចទឹក បាយ ។ មុនពេលចាក់វា លោកអ្នកត្រូវគ្រលែងវា ឱ្យបាន២ទៅ៣ដង (កុំក្រឡុកវាព្រោះវាធ្វើឱ្យបែកគ្រាប់ថ្នាំ បណ្តាលឱ្យបាត់បង់ប្រសិទ្ធភាពរបស់ថ្នាំ) ។
លោកវេជ្ជបណ្ឌិតបានបន្តថា អ្នកជំងឺទឹកនោមផ្អែមច្រើនតែមានការខ្វាយខ្វល់ច្រើនពីការទុកដាក់ថ្នាំអាំងស៊ុយលីន តាមការពិតអាំងស៊ុយលីន ដែលយើងបើកគ្របប្រើវាដំបូង រួចហើយយើងអាចទុកវានៅតាមខ្លួនដូចជា កាបូបលុយ សម្ពៀតឬទុកវាក្នុងហោប៉ៅក៏បាន ដោយគ្រាន់តែលោកអ្នកត្រូវចៀសវាងកុំឱ្យត្រូវពន្លឺថ្ងៃនិងកម្តៅខ្លាំងពេក ដោយអាចរក្សាប្រសិទ្ធភាពរបស់វាបានល្អ ក្នុងរយៈពេល១ខែ ហើយដល់ខែទី២ ឬទី៣ អាចបាត់បង់ប្រសិទ្ធភាពខ្លះ ។ ដូច្នេះអាំងស៊ុយលីន ដែលលោកអ្នកចង់ទុកប្រើប្រាស់ឱ្យបានច្រើនខែតទៅមុខទៀត បើមិនទាន់បើកគ្របប្រើប្រាស់ទេលោកអ្នកគួរទុកវាក្នុងទូទឹកកក តែកុំដាក់នៅកន្លែងកក ៕
ចែករំលែកព័តមាននេះ