បណ្តាញសង្គមបានផ្តល់ភាពងាយស្រួលដល់មនុស្សក្នុងការប្រាស្រ័យទាក់ទងគ្នា និងទទួលព័ត៌មានបានលឿនជាងមុន ប៉ុន្តែវាក៏បានបើកឱកាសដ៏ទូលំទូលាយដល់អាជីវករទាំងធំទាំងតូចផងដែរ ។
ក្នុងរយៈពេលប៉ុន្មានឆ្នាំថ្មីៗនេះអ្នកប្រហែលជា ចាប់អារម្មណ៍ឃើញអ្នកលក់ទំនិញអនឡាញជាច្រើន ជាពិសេសតាមបណ្តាញសង្គមធំៗដូចជា Facebook និង Instagram ដែលចាប់ផ្តើមវាយលុកទីផ្សារ ។ មនុស្សជាច្រើនក៏ចាប់ផ្តើមងាកចេញពីការដើរផ្សារទៅទិញទំនិញអនឡាញវិញដែរ ព្រោះតែភាពងាយស្រួល និងរហ័សដែលបានផ្តល់ជូន ។ យ៉ាងណាក្តីដោយសារតែភាពងាយស្រួលនេះ មនុស្សជាច្រើនក៏ចាប់ផ្តើមមានទម្លាប់ចាយវាយខ្ជះខ្ជាយ និងការចាយវាយដែលមិនមានការគិតគូរពិចារណាបានត្រឹមត្រូវដែរ ដែលបង្កឲ្យខាតបង់ថវិកាសន្សំ ឬសម្រាប់វិនិយោគជាដើម ។
ដោយហេតុដូចនេះអ្នកដែលចូលចិត្តទិញទំនិញអនឡាញគួរតែពិចារណាលើសកម្មភាពទិញរបស់ខ្លួនឡើងវិញ និងចៀសវាងអន្ទាក់ដែលអ្នកលក់អនឡាញប្រើ ដើម្បីជំរុញឲ្យអ្នកទិញដោយមិនមានការគិតគូរ ។
Kit Yarrow ដែលជាអ្នកចិត្តសាស្ត្រសិក្សាពីអាកប្បកិរិយាអតិថិជន និងជាអ្នកនិពន្ធ សៀវភៅ Decoding the New Consumer Mind បានប្រាប់ដល់ CreditCards.com ថា ហាងទំនិញនៅក្រៅតែងតែប្រើការលក់បញ្ចុះតម្លៃ ដើម្បីទាក់ទាញភ្ញៀវ ហើយអ្នកលក់អនឡាញក៏មានយុទ្ធសាស្ត្រស្រដៀងគ្នាដែរ ។ អ្នកលក់តែងតែព្យាយាមបញ្ចុះបញ្ចូលឲ្យអ្នកទិញទំនិញបន្ថែម ដើម្បីទទួលបានអត្ថប្រយោជន៍ផ្សេងៗដូចជា ការដឹកជញ្ជូនឥតគិតថ្លៃ ឬការបញ្ចុះតម្លៃបានពី១០ទៅ២០% ជាដើម ។ មនុស្សមួយចំនួនធ្វើការសម្រេចចិត្តទិញបន្ថែម ដោយមិនដឹងថា តាមពិតខ្លួនកំពុងតែខាតបង់ទេ ។ ឧទាហរណ៍ដូចជា អ្នកសុខចិត្តចំណាយ ១០ដុល្លារបន្ថែម ដើម្បីសន្សំបានថ្លៃដឹកជញ្ជូន ១ដុល្លារជាដើម ។ វាមានន័យថា អ្នកចាយវាយបន្ថែមអស់ ៩ដុល្លារមិនមែនចំណេញទេ ។
មានអ្នកលក់ជាច្រើនដែលចូលចិត្តលក់បញ្ចុះតម្លៃទាំងការពិតពួកគេគ្រាន់តែតម្លើងថ្លៃផលិតផល មុននឹងបញ្ចុះមកវិញប៉ុណ្ណោះ ដូច្នេះអ្នកទិញក៏ត្រូវតែធ្វើការស្រាវជ្រាវឲ្យបានច្បាស់លាស់មុនពេលសម្រេចចិត្តផងដែរ ។
អ្នកជំនាញជាច្រើនផ្តល់យោបល់មកថា ប្រសិនបើអ្នកមិនចង់ទិញទំនិញអនឡាញច្រើនលើសលប់ទេនោះ អ្នកគួរតែមានបញ្ជីឈ្មោះផលិតផលដែលអ្នកចង់ទិញ ហើយធានាថាខ្លួនមិនទិញលើសពីអ្វីដែលមានលើក្រដាស ។ វិធីមួយទៀត គឺការកំណត់លុយសម្រាប់ការចំណាយលើថ្លៃទំនិញដែលអ្នកចង់ទិញជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ