រាជធានីភ្នំពេញ ៖ យោងតាមលិខិតស្នើសុំអនុញ្ញាតរបស់តំណាងថ្នាក់ដឹកនាំសហភាព សហជីព និងកម្មករនិយោជិតនៃវិស័យកាត់ដេរសម្លៀកបំពាក់ និងស្បែកជើងទូទាំងប្រទេសកម្ពុជាដាក់ជូនសាលារាជធានីភ្នំពេញចុះថ្ងៃទី២៦ កុម្ភៈ ២០១៤ បានជូនដំណឹងថា តំណាងសហព័ន្ធសហជីព និងសមាគមរោងចក្រកាត់ដេរសម្លៀកបំពាក់ និងស្បែកជើងគ្រោងរៀបចំវេទិកាសាធារណៈនៅថ្ងៃទី៨ មីនា ២០១៤ នៅទីលានប្រជាធិបតេយ្យ។
សេចក្តីជូនដំណឹងបានឱ្យដឹងថា វេទិកាសាធារណៈនេះរៀបចំឡើងដើម្បីផ្តល់ឱកាសឱ្យកម្មករ និយោជិត និងប្រជាពលរដ្ឋរួមជាមួយតំណាងសំខាន់ៗ ដូចជាលោកឧបនាយករដ្ឋមន្ត្រីស ខេង រដ្ឋមន្ត្រីក្រសួងមហាផ្ទៃ លោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោកឧបនាយករដ្ឋមន្ត្រីប្រចាំការ គាត ឈន់ ប្រធានគណៈកម្មការប្រាក់ឈ្នួល លោកជីវ កេង ប្រធានតុលាការក្រុងភ្នំពេញដើម្បីមកឆ្លើយបំភ្លឺនៅចំពោះមុខមហាជនអំពីបញ្ហាបង្ក្រាប ចាប់ខ្លួន និងការដំឡើងប្រាក់ឈ្នួលជាដើម។
សេចក្តីជូនដំណឹងបានបញ្ជាក់ថា វេទិកានេះនឹងចាប់ផ្តើមពីវេលាម៉ោង៨ព្រឹកដល់ម៉ោង៨យប់ ដោយមានការចូលរួមពីកម្មករ និយោជិតតាមបណ្តារោងចក្រនានាក្នុងប្រទេសកម្ពុជា ព្រមទាំងមន្ត្រីរាជការផងដែរ។
ទាក់ទិននឹងការដាក់លិខិតស្នើសុំនេះ លោករ៉ុង ឈុន ប្រធានសមាគមគ្រូបង្រៀនឯករាជ្យ និងជាប្រធានសហភាព សហជីពកម្ពុជាបានឱ្យកោះសន្តិភាពដឹងនៅព្រឹកថ្ងៃទី២៧ កុម្ភៈ នេះថា តំណាងសហជីព និងសមាគមបានដាក់លិខិតជូនសាលារាជធានីភ្នំពេញរួចហើយ តែមិនទាន់បានទទួលដំណឹងពីការយល់ព្រម ឬមិនព្រមនៅឡើយ
ទេ៕
ចែករំលែកព័តមាននេះ