ខេត្តព្រះសីហនុ ៖ សំណុំរឿងកបា៉ល់អូសសាឡង់បើកបុកទូកនេសាទបណ្តាលឱ្យលិចស្លា.ប់កូនដៃទូករហូតដល់ទៅ៣នាក់ នៅក្នុងសមុទ្រខេត្តព្រះសីហនុ កាលពីថ្ងៃទី២៣ មករា រហូតមកដល់ពេលនេះ នៅមិនទាន់បានទទួលយុត្តិធម៌ណាមួយពីសាលាដំបូងខេត្តកោះកុងនៅឡើយទេ ។
ខេត្តព្រះសីហនុ ៖ សំណុំរឿងកបា៉ល់អូសសាឡង់បើកបុកទូកនេសាទបណ្តាលឱ្យលិចស្លាប់កូនដៃទូករហូតដល់ទៅ៣នាក់ នៅក្នុងសមុទ្រខេត្តព្រះសីហនុ កាលពីថ្ងៃទី២៣ មករា រហូតមកដល់ពេលនេះ នៅមិនទាន់បានទទួលយុត្តិធម៌ណាមួយពីសាលាដំបូងខេត្តកោះកុងនៅឡើយទេ ។ ការយឺតយា៉វលើចំណាត់ការនេះ បានធ្វើឱ្យភាគីខាងជនរងគ្រោះដាក់មន្ទិលសង្ស័យថា លោកចៅក្រមកាន់រឿងក្តីនេះអាចត្រូវថ្នាំសណ្តំពីភាគីម្ខាងទៀត ។
ទោះបីជាបែបណា នេះគ្រាន់តែជាការសង្ស័យ ខណៈដែលចំណាត់ការនានាយឺតដូចកៅស៊ូប៉ុណ្ណោះ ។ លោក ជួន ម៉េង ម្ចាស់ទូកនេសាទរងគ្រោះ បាននិយាយត្អូញត្អែរថា សាលាដំបូងខេត្តកោះកុងមិនទាន់ផ្តល់ភាពកក់ក្តៅលើសំណងមកដល់ជនរងគ្រោះនៅឡើយទេ បើគិតចាប់ពីថ្ងៃកើតហេតុមកដល់ពេលនេះមានរយៈពេល១ខែ ហើយ ។ ប៉ុន្តែកាលពីថ្ងៃទី១៩ កុម្ភៈ ឆ្នាំ២០១៤ ចៅក្រមកាន់រឿងក្តីនេះបានកោះហៅទៅសាកសួរម្តងដែរ ហើយក៏ស្ងាត់ឈឹងទៅវិញ ។ លោក ជួន ម៉េង បានបន្តថា អ្វីដែលគួរឱ្យមានការភ្ញាក់ផ្អើលនោះ គឺមានករណីមិនប្រក្រតីមួយ ទើបនឹងកើតឡើងនៅក្នុងសំណុំរឿងក្តីនេះដែរ ។ រឿងនោះគាត់បានដឹងថា ភាគីខាងក្រុមហ៊ុនថៃដឹកជញ្ជូនផ្លូវទឹក បានរត់ការទៅបញ្ចុះបញ្ចូលឱ្យគ្រួសារសពដែលជាកូនដៃទូកចំនួន៣នាក់នោះទទួលយកប្រាក់ក្នុងម្នាក់ៗ២.៣០០ដុល្លារអាមេរិក ។ បន្ទាប់មក គេបានធ្វើលិខិតស្នើសុំដកពាក្យបណ្តឹង និងស្នើសុំឱ្យអ្នកបើកបរកបា៉ល់ជាជនជាតិថៃម្នាក់ដែលកំពុងឃុំខ្លួនក្នុងពន្ធនាគារខេត្តកោះកុងបានចេញនៅក្រៅឃុំជាបណ្តោះអាសន្នទៀតផង ។
ការបែកធ្លាយរឿងនេះ គឺដោយសារលោកចៅក្រមជាអ្នកកាន់ក្តីបានយកមកបង្ហាញដោយផ្ទាល់ កាលពីពេលកោះហៅរូបគាត់ឱ្យចូលបំភ្លឺ នៅថ្ងៃទី១៩ កុម្ភៈ ២០១៤ ។
ម្ចាស់ទូកនេសាទដដែលនេះបានបន្ថែមទៀតថា គាត់ជាម្ចាស់ទូករងគ្រោះ និងម្ចាស់សពកូនដៃទូកចំនួន៣នាក់ និងពីរនាក់ទៀតដែលនៅរស់ សរុបជនរងគ្រោះទាំងអស់មាន៦នាក់បានដាក់ពាក្យពឹងពាក់មេធាវី តាំងពីថ្ងៃទី៥ កុម្ភៈ ឆ្នាំ២០១៤មកម៉្លេះ ។ ដូចនេះការបញ្ចុះបញ្ចូលគ្រួសារសពឱ្យទទួលប្រាក់ចំនួន២.៣០០ដុល្លារអាមេរិកក្នុងម្នាក់ៗនោះ គឺជាល្បិចកលដ៏គម្រក់មួយដើម្បីបំបែកសំណុំរឿងក្ដីនេះពីធំឱ្យមកតូចក្នុងគោលបំណងដោះលែងជនសង្ស័យជាអ្នកបើកបរកបា៉ល់ជនជាតិថៃម្នាក់នៅក្នុងពន្ធនាគារខេត្តកោះកុង ឱ្យនៅក្រៅឃុំជាថ្នូរ នឹងអំពើពុករលួយមួយគួរឱ្យភ្ញាក់ផ្អើល ។ លោកមេធាវីអីុវ ចំរើន ក៏បានឱ្យដឹងដែរថា សម្រាប់រូបលោកជាមេធាវីការពារក្ដីដោយអាណត្តិ លោកមិនខ្វល់រឿងបញ្ចុះបញ្ចូលកូនក្ដីរបស់លោកនោះទេ ព្រោះកូនក្ដីរបស់លោកមិនបានជូនដំណឹងណាមួយដល់លោកនោះទេ ដូចនេះដំណើររឿងក្ដីនៅដដែល ។ លោកមេធាវីរូបនោះបានបញ្ជាក់ថា ក្នុងសំណុំរឿងនេះកូនក្ដីបានដាក់ពាក្យបណ្ដឹងពឹងពាក់រូបលោកជាមេធាវីមានចំនួន៦នាក់ ក្នុងនោះអាណាព្យាបាលសពចំនួន៣នាក់ កូនដៃទូក និងអ្នកបើកបរដែលនៅរស់ចំនួន២នាក់ និងម្ចាស់ទូកម្នាក់ទៀត ។
លោក មីន មករា ចៅក្រមសាលាដំបូងខេត្តកោះកុង កោះសន្ដិភាពមិនអាចទាក់ទងសុំការបំភ្លឺបានទេនៅថ្ងៃទី២៦ កុម្ភៈ តែទោះជាយ៉ាងនេះក្ដីមន្ត្រីអ្នកច្បាប់មួយរូបនៅសាលាដំបូងខេត្តកោះកុងបានបង្ហើបថា សំណុំរឿងនេះមិនមានអ្វីពិបាកទេ ព្រោះភាគីខាងជនរងគ្រោះត្រូវការតែសំណងសមរម្យមួយដែលអាចទទួលយកបានប៉ុណ្ណោះ មិនមានអ្វីចង់ឈ្នះចង់ចាញ់នោះទេ ដូច្នេះសីុសងលើចៅក្រមអ្នកកាន់សំណុំរឿងក្ដីនេះបើមានសុច្ឆន្ទៈដោះស្រាយចប់ទៅហើយ ។ ប៉ុន្តែបើចៅក្រមកាន់ក្ដីនោះបក្ខពួកនិយម ពុករលួយព្យាយាមបំបែកសំណុំរឿងពីធំមកតូចក្នុងគោលបំណងអ្វីមួយនោះ ជនរងគ្រោះពិតជាវេទនាមិនខាន ៕
ចែករំលែកព័តមាននេះ