ខេត្តបន្ទាយមានជ័យ ៖ កម្លាំងនគរបាលស្រុកថ្មពួកចំនួន៣នាក់កាលពីវេលាម៉ោង៦ល្ងាច ថ្ងៃទី២៥ កុម្ភៈ ២០១៤ បានបញ្ជូនជនសង្ស័យជាប់ចោទពីបទជួញដូរគ្រឿងញៀន២នាក់មកកាន់ស្នងការដ្ឋាននគរបាលខេត្តបន្ទាយមានជ័យ ខណៈមកដល់ចំណុចមុខផ្សារចំការគ ហៅផ្សារថ្មី ស្ថិតក្នុងភូមិ២ ខ្លាកូនចាស់ សង្កាត់កំពង់ស្វាយ ក្រុងសិរីសោភ័ណ ជនសង្ស័យម្នាក់បានស្រេកទឹក ពេលនោះមិនដឹងជាខ្នោះដៃរបូតតាំងពីពេលណាទេ គ្រាន់តែរថយន្តឈប់ភ្លាមជនសង្ស័យក៏បើកទ្វាររត់ចូលទៅក្នុងផ្សារបាត់ស្រមោលតែម្តង។
ជនសង្ស័យទាំង២នាក់ ម្នាក់ឈ្មោះមឿន សា ភេទប្រុស អាយុ២៩ឆ្នាំ រស់នៅភូមិដងរែក ឃុំបន្ទាយឆ្មារ ស្រុកថ្មពួក និងម្នាក់ទៀតដែលរត់គេចខ្លួនឈ្មោះឃុត ហ៊ុត ភេទប្រុស អាយុ៥០ឆ្នាំ រស់នៅភូមិជាមួយគ្នា។
តាមប្រភពព័ត៌មានពីនគរបាលវរសេនាតូចការពារព្រំដែនគោកលេខ៨០៧បានឱ្យដឹងថា ជនសង្ស័យទាំង២នាក់នេះត្រូវកម្លាំងនគរបាលប៉ុស្តិ៍ដងរែកនៃវរសេនាតូចការពារព្រំដែនគោកលេខ៨០៧ចុះបង្ក្រាបឃាត់ខ្លួនបានជាបន្តបន្ទាប់នៅកន្លែងផ្សេងគ្នា ដោយដកហូតបានថ្នាំញៀនប្រភេទមេតំហ្វេតាមីនសរុប១៩គ្រាប់ និងទូរស័ព្ទដៃចំនួន៤គ្រឿងប្រគល់ឱ្យអធិការនគរបាលស្រុកថ្មពួករៀបចំសំណុំរឿងតាមនីតិវិធី។
តាមការឱ្យដឹងពីលោកអនុសេនីយ៍ឯកឈូត ថា អធិការនគរបាលស្រុកថ្មពួកបានឱ្យដឹងថា បន្ទាប់ពីទទួលជនសង្ស័យ រួមទាំងវត្ថុតាងពីកម្លាំងនគរបាលវរសេនាតូចការពារព្រំដែនគោកលេខ៨០៧ កម្លាំងជំនាញរបស់អធិការដ្ឋានបានសួរចម្លើយ និងរៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ខណៈពេលដឹកមកដល់មុខផ្សារចំការគជនសង្ស័យបានស្រេកទឹករថយន្តក៏ឈប់ស្រាប់តែជននេះបើកទ្វាររថយន្តរត់ចូលទៅក្នុងផ្សារបាត់ស្រមោលតែម្តង ពេលនោះនគរបាលបាននាំគ្នាតាមរុករកដែរ តែដោយក្នុងផ្សារមានសភាពងងឹតពេកទើបជនសង្ស័យមានឱកាសរត់គេចខ្លួនរួច៕
ចែករំលែកព័តមាននេះ