រាជធានីភ្នំពេញ ៖ នៅក្នុងមួយរយៈពេលប្រមាណ ២ ឆ្នាំចុងក្រោយនេះ កំណើនកង់បីឥណ្ឌានៅក្នុងប្រទេសកម្ពុជាហាក់កើនឡើងខ្ពស់ពីមួយឆ្នាំទៅមួយឆ្នាំ ដែលតួលេខកន្លងមកគឺមានចំនួនជាង ២ ម៉ឺនគ្រឿងទូទាំងប្រទេសកម្ពុជា ជាពិសេសយើងអាចមើលដឹងតាមរយៈការធ្វើចរាចរណ៍នៅតាមដងផ្លូវនានាជាពិសេសនៅរាជធានីភ្នំពេញ…
រាជធានីភ្នំពេញ ៖ នៅក្នុងមួយរយៈពេលប្រមាណ ២ ឆ្នាំចុងក្រោយនេះ កំណើនកង់បីឥណ្ឌានៅក្នុងប្រទេសកម្ពុជាហាក់កើនឡើងខ្ពស់ពីមួយឆ្នាំទៅមួយឆ្នាំ ដែលតួលេខកន្លងមកគឺមានចំនួនជាង ២ ម៉ឺនគ្រឿងទូទាំងប្រទេសកម្ពុជា ជាពិសេសយើងអាចមើលដឹងតាមរយៈការធ្វើចរាចរណ៍នៅតាមដងផ្លូវនានាជាពិសេសនៅរាជធានីភ្នំពេញ គឺពោរពេញដោយវត្តមានរបស់កង់៣ឥណ្ឌារត់ប្រដេញគ្នា ។
ខណៈកំណើនកង់បីឥណ្ឌា ហាក់ធ្វើឲ្យមតិមហាជនខ្លះមិនពេញចិត្តចំពោះការបើកបរលើដងផ្លូវ តែក៏បានបង្កើតជាឱកាសក្នុងការជំរុញអាជីវកម្មបញ្ចូលហ្គាសរថយន្ត និងយានយន្តបានឡើងខ្ពស់មួយកម្រិតផងដែរ ដោយសារតែកង់បីឥណ្ឌាជាប្រភេទជាយានយន្តដែលប្រើហ្គាស ។ ក៏ប៉ុន្តែតម្លៃហ្គាសនៅភ្នំពេញហាក់មានតម្លៃខ្ពស់ជាងនៅតាមបណ្តាខេត្តមួយចំនួន ជាក់ស្តែងនៅក្រុងភ្នំពេញកន្លែងខ្លះតម្លៃ ១ ៧០០ រៀល ទៅ ១ ៨០០ រៀលក្នុងមួយលីត្រ ខណៈនៅតាមខេត្តដូចជាកំពតជាដើមតម្លៃត្រឹមតែ ១៥០០ រៀលក្នុងមួយលីត្រ ។
បើតាមបុគ្គលិកបញ្ចូលហ្កាសយានយន្តមួយកន្លងនៅបណ្ដោយផ្លូវជាតិលេខ ៤ បានអោយដឹងថា បន្ទាប់ពីមានវត្តមានកង់បីឥណ្ឌា ដែលជាយានយន្តប្រើហ្គាសនៅកម្ពុជាដែរនោះ ការបញ្ចូលហ្គាសយានយន្តរាងមមាញឹកជាងមុនបន្តិចតែមិនខ្លាំងប៉ុន្មាននោះទេ ព្រោះអីអាជីវកម្មបែបនេះ ក៏មានច្រើនដែរ នៅភ្នំពេញនិងតាមបណ្ដាខេត្ត ។
លោកបានបន្តថា «បងអើយ ការបញ្ចូលហ្គាសជាពិសេសពេលព្រឹក មមាញឹកណាស់ ដោយសារតែបងៗអ្នករត់កង់បីឥណ្ឌា ត្រូវចេញពីផ្ទះនិងបញ្ចូលហ្គាសដើម្បីរត់ដឹកម៉ូយរបស់ពួកគាត់ តែយ៉ាងណាមិនមានច្រើនប៉ុន្មាននោះទេ តែពិតជាច្រើនជាងមុន» ។ ប្រភពដដែលបានបន្តថា ការបញ្ចូលហ្គាសកង់បីឥណ្ឌា មិនប្រើពេលយូរប៉ុន្មាននោះទេ ព្រោះអីវាមានធុងហ្គាសតូច បញ្ចូលតែប្រមាណពី៧ទៅ១០លីត្រពេញហើយ តែបើបញ្ចូលហ្គាសរថយន្ត គឺត្រូវប្រើពេលយូរបន្តិច ដោយសារតែធុងវាធំជាងធុងហ្គាសកង់បីឥណ្ឌា ។
លោកបានបន្ថែមទៀតថា « អាជីវកម្មនេះ បើថាអោយកើនក៏វាមិនកើនខ្លាំងប៉ុន្មានដែរ ព្រោះអីកង់បីឥណ្ឌាបញ្ចូលតែបន្តិចៗទេ ហើយតម្លៃហ្គាសបញ្ចូលសម្រាប់កង់បីនីមួយៗ ក៏បានតិចៗដែរ ជាក់ស្ដែងកង់បីឥណ្ឌាមួយៗបញ្ចូលមួយពេញបានប្រមាណតែ២ម៉ឺនរៀលប៉ុណ្ណោះ » ។
ដោយឡែកអាជីវករបញ្ចូលហ្កាសយានយន្តមួយរូបទៀតនៅផ្សារកំពង់ត្រាចខេត្តកំពត បានអោយដឹងថា ពីមុនគេបញ្ចូលតែសម្រាប់រថយន្តនិងចង្ក្រាន តែពេលនេះ មានកង់បីឥណ្ឌាខ្លះៗហើយនៅស្រុកកំពង់ត្រាចបានចាប់ផ្តើមសេវាកម្មកង់៣ឥណ្ឌានៅខេត្តមួយនេះ ដូច្នេះហើយអាជីវកម្មនេះហាក់កើនបន្តិច តែមិនច្រើនប៉ុន្មានទេ ព្រោះអីអ្នករត់កង់បីឥណ្ឌា មិនមែនចាក់រាល់ថ្ងៃទេ គាត់ចាក់ម៉ាពេញ តែជាង២០០០០រៀល តែគាត់អាចរត់បានពីរ ទៅបីថ្ងៃ បើសិនជាមិនសូវរវល់ ។
លោក ម៉េង សុខនី អ្នករត់កង់បីឥណ្ឌាមួយរូបបាននិយាយថា តាមពិតទៅកង់បីឥណ្ឌា ប្រើប្រាស់ឥន្ធនៈតិចជាងកង់បីខ្មែរ ជាក់ស្ដែង លោកចាក់តែ១០លីត្រ តម្លៃ១៥០០០ទៅ១៨០០០ ( តម្លៃតាមតំបន់ ) លោកអាចប្រើបានពីរបីថ្ងៃតែបើសិនជាកង់បីខ្មែរ ចាក់ចាក់តែ៥ លីត្រ តម្លៃជិត២ម៉ឺនរៀល ហើយរត់បានតិចជាងកង់បីឥណ្ឌាទៅទៀត ។
លោកបានបន្តថា ចាប់តាំងពីលោកប្តូរពីកង់បីខ្មែរមកប្រើកង់បីឥណ្ឌាចំណូលរបស់លោកបានច្រើនជាងមុនបន្តិច បន្ទាប់ពីទូទាត់រួច ហើយម្យ៉ាងទៀតអ្នកដំណើរក៏ពេញនិយមជិះកង់បីឥណ្ឌា ជាងកង់បីខ្មែរដែរ ពីព្រោះវាអាចគិតចំងាយត្រឹមត្រូវនិងមានតម្លៃទាបជាងរម៉ក់ម៉ូតូខ្មែរ (កង់បីខ្មែរ) ។ យ៉ាងណាក៏ដោយ វត្តមានកង់បីឥណ្ឌាកាន់តែច្រើននៅកម្ពុជា ជាពិសេសរាជធានីភ្នំពេញ ក៏បានបង្កបញ្ហាមួយដល់សង្គមដែរ ដូចជាអ្នកបើកបរ មិនគោរពច្បាប់ចរាចរណ៍ត្រឹមត្រូវ បើកវ៉ាជែងមិនប្រុងប្រយ័ត្ន និងពូកែ ប្រជ្រៀតធ្វើឱ្យស្ទះកាន់តែខ្លាំង ។
អ្នកនាំពាក្យសាលារាជធានីភ្នំពេញ លោកម៉េត មាសភក្ដី បានអោយដឹងថា ពេលនេះ សាលារាជធានីភ្នំពេញ និងមន្ទីរសាធារណៈការនិងដឹកជញ្ជូន ក៏ដូចជាក្រសួង បាននិងកំពុងបើកវគ្គបណ្ដុះបណ្ដាលដល់អ្នកបើកបរកង់បីពីច្បាប់ចរាចរណ៍កម្ពុជា ដោយមិនតម្រូវឱ្យបង់ប្រាក់ឡើយ ។ នៅពេលបន្ទាប់ ពេលដែលចំនួន អ្នករៀនច្បាប់ចរាចរណ៍នៃអ្នកបើកបរកង់បីឥណ្ឌាមានចំនួនច្រើន នៅពេលសាលាក្រុងនឹងចាត់វិធានការ ដោយនឹងផាកពិន័យពួកគាត់ តែវិធានការយ៉ាងណានោះ នៅមិនទាន់បានកំនត់ និងប្រជុំជាផ្លូវការនៅឡើយ អ្វីដែលត្រូវធ្វើពេលនេះ គឺត្រុវឱ្យអ្នកបើកបរទាំងអស់រៀនពីច្បាប់ចរាចរណ៍អោយបានយល់ដឹងច្រើនសិន ៕ (កែសម្រួលដោយ ៖ បុប្ផា)
ចែករំលែកព័តមាននេះ