រាជធានីភ្នំពេញ ៖ ក្រុមការងារបច្ចេកទេសរបស់គណបក្សសង្គ្រោះជាតិ និងគណបក្សប្រជាជនកម្ពុជា ដែលបានសម្រេចយកថ្ងៃទី២៧ កុម្ភៈ ខាងមុខនេះដើម្បីជួបប្រជុំគ្នាពិភាក្សាពីការបង្កើតគណៈកម្មការចម្រុះសម្រាប់ការកែទម្រង់ការបោះឆ្នោតដែលមានសមាសភាព៦រូបម្ខាងនោះត្រូវបានលុបចោលវិញ ។
រាជធានីភ្នំពេញ ៖ ក្រុមការងារបច្ចេកទេសរបស់គណបក្សសង្គ្រោះជាតិ និងគណបក្សប្រជាជនកម្ពុជា ដែលបានសម្រេចយកថ្ងៃទី២៧ កុម្ភៈ ខាងមុខនេះដើម្បីជួបប្រជុំគ្នាពិភាក្សាពីការបង្កើតគណៈកម្មការចម្រុះសម្រាប់ការកែទម្រង់ការបោះឆ្នោតដែលមានសមាសភាព៦រូបម្ខាងនោះត្រូវបានលុបចោលវិញ ។
លោក យឹម សុវណ្ណ បានបញ្ជាក់តាមទូរស័ព្ទនាព្រឹកថ្ងៃទី២៥ កុម្ភៈ ថា ការសម្រេចលើកពេលជួបចរចារវាងក្រុមការងារគណបក្សទាំងពីរក្នុងនាមគណៈកម្មការចម្រុះកែទម្រង់ការបោះឆ្នោត ដែលមានសមាសភាពម្ខាង៦រូប នាថ្ងៃទី២៧ កុម្ភៈ នោះ មិនមែនមកពីហេតុផលនយោបាយទេ គឺដោយសារតែបញ្ហាបច្ចេកទេសរបស់ក្រុមការងារគណបក្សទាំងពីរ និងមានការស្នើសុំពន្យារពីភាគីគណបក្សប្រជាជនកម្ពុជា ។ លោកបានបន្ដថា ការពន្យារពេលចរចានោះ មកពីគណបក្សប្រជាជនកម្ពុជា បានស្នើលើកពេលដោយមូលហេតុជាប់រវល់ ។ ប៉ុន្ដែក្រុមការងារគណបក្សទាំងពីរនឹងកំណត់ជួបគ្នាក្នុងពេលឆាប់ៗដែលអាចនៅសប្ដាហ៍ក្រោយ ។ កិច្ចប្រជុំចរចាក្នុងនាមគណៈកម្មការចម្រុះ ដើម្បីកែទម្រង់ការបោះឆ្នោតដែលគណបក្សទាំងពីរទើបតែព្រមព្រៀងបង្កើតមានសមាសភាពម្ខាង៦រូប ក្នុងនោះរបៀបវារៈសម្រាប់កិច្ចប្រជុំចរចានោះ នឹងជជែកលើកឡើងពីអាណត្ដិរបស់គណៈកម្មការចម្រុះ តួនាទី ភារកិច្ច និងក្របខ័ណ្ឌការងាររបស់គណៈកម្មការចម្រុះសម្រាប់កែទម្រង់ការបោះឆ្នោត ។
លោក យឹម សុវណ្ណ មិនបានឱ្យដឹងពីការជួបចរចារវាងក្រុមការងារបច្ចេកទេសដែលមានសមាសភាព៦រូបលើកក្រោយនៅកន្លែងណាច្បាស់លាស់នៅឡើយទេ គ្រាន់តែបញ្ជាក់ថាពេលកំណត់រួច នឹងប្រាប់ដល់អ្នកសារព័ត៌មានជាក្រោយ ។ ទាក់ទងនឹងការលើកឡើងរបស់អ្នកនាំពាក្យគណបក្សសង្គ្រោះជាតិថា លុបចោលនិងពន្យារពេលនៅសប្ដាហ៍ក្រោយ កោះសន្ដិភាពមិនអាចសុំការបកស្រាយពីលោក ព្រុំ សុខា ប្រធានក្រុមការងារចរចាបច្ចេកទេសរបស់គណបក្សប្រជាជនកម្ពុជា និងលោក ជាម យៀប សមាជិកជាន់ខ្ពស់ និងសមាជិកគណៈកម្មការចម្រុះសម្រាប់កែទម្រង់ការបោះឆ្នោតខាងគណបក្សប្រជាជនកម្ពុជាបានទេ ដោយទូរស័ព្ទចូលតែគ្មានអ្នកទទួល ។ ប៉ុន្ដែបើតាមលោក ឈាង វុន ប្រធានគណៈកម្មការកិច្ចការបរទេស សហប្រតិបត្ដិការអន្ដរជាតិ ឃោសនាការនិងព័ត៌មាន បានប្រាប់បន្ទាប់ពីចប់ជំនួបពិភាក្សាការងារជាមួយលោក Joachim Baronvan Maschall ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា បានឱ្យដឹងថា លោកក៏មានឈ្មោះជាសមាជិកមួយក្នុងចំណោមសមាជិក៦រូប ដែលត្រូវជួបចរចាគ្នាដែលបានរៀបចំជាស្រេចក្នុងការពិភាក្សាជាមួយក្រុមបច្ចេកទេសរបស់គណបក្សសង្គ្រោះជាតិនោះដែរ ។
លោក ឈាង វុន បានឱ្យដឹងថា ក្រុមការងារបច្ចេកទេសរបស់គណបក្សសង្គ្រោះជាតិ បានកំណត់យកវិមានព្រឹទ្ធសភាសម្រាប់ចរចាគ្នា តែសម្រាប់លោកវិញចង់ឱ្យការចរចាគ្នានៅវិមានរដ្ឋសភា ព្រោះថាវិមានរដ្ឋសភាគឺមិនមែន ជារបស់គណបក្សប្រជាជនតែម្នាក់ឯងនោះទេ វាសម្រាប់ប្រជាជនទូទៅក៏ដូចជាគណបក្សសង្គ្រោះជាតិ ។
គួរបញ្ជាក់ថា ការឈានដល់ការកំណត់ថ្ងៃទី២៧ កុម្ភៈ ជាថ្ងៃជួបគ្នានៃក្រុមបច្ចេកទេសទាំងពីរ រហូតដល់ការលុបចោលគម្រោងកិច្ចជួបវិញនោះ លោក សុន ឆ័យ ប្រធានក្រុមការងារបច្ចេកទេសរបស់គណបក្សសង្គ្រោះជាតិធ្លាប់មានប្រសាសន៍ថា កាលពីថ្ងៃទី២២ កុម្ភៈ ក្រុមបច្ចេកទេសរបស់គណបក្សសង្គ្រោះជាតិបានដាក់លិខិតស្នើសុំទៅក្រុមបច្ចេកទេសរបស់គណបក្សប្រជាជនកម្ពុជា ។ លោកក៏បានលើកឡើងទៀតថា ក្រុមការងារបច្ចេកទេសនេះមានឈ្មោះថា គណៈកម្មការចម្រុះដើម្បីរៀបចំ និងកំណែទម្រង់ការបោះឆ្នោត ដែលមាសសមាសភាពម្ខាងៗចំនួន៦នាក់ ដោយក្រុមការងារបច្ចេកទេសរបស់គណបក្សសង្គ្រោះជាតិ មានរូបលោកផ្ទាល់ (សុន ឆ័យ) លោក យឹម សុវណ្ណ លោក យ៉ែម បុញ្ញឫទ្ធិ លោក គួយ ប៊ុនរឿន លោក ម៉ៅ មុនីវណ្ណ និងលោក អេង ឆៃអ៊ាង ។ កាលនោះ លោក សុន ឆ័យ ក៏មិនបានបញ្ជាក់ពីទីកន្លែងដែលក្រុមបច្ចេកទេសទាំងពីរគ្រោងនឹងជួបគ្នាជាថ្មីច្បាស់លាស់នោះទេ គឺថាគ្រាន់តែស្នើជួបជាមួយក្រុមបច្ចេកទេស និងកំពុងរង់ចាំពីក្រុមបច្ចេកទេសរបស់គណបក្សប្រជាជនកម្ពុជា។
លោក សុន ឆ័យ បានឱ្យដឹងទៀតថា ការជួបរវាងក្រុមបច្ចេកទេសរបស់គណបក្សទាំងពីរ មិនអាចដោះស្រាយបញ្ហានយោបាយសព្វថ្ងៃ នេះទេ គឺមានតែថ្នាក់ដឹកនាំរបស់គណបក្សទាំង២ ទើបជាអ្នកសម្រេច ។ លោកថា ភាគីរបស់គណបក្សប្រជាជនក៏មានសមាសភាពចំនួន៦រូបផងដែរ ។ ការស្នើសុំជួបចរចារបស់ក្រុមការងារគណបក្សសង្គ្រោះជាតិ ទៅគណបក្សប្រជាជនកម្ពុជានោះ ក៏មានបណ្តាញផ្សព្វផ្សាយមួយចំនួន បានចុះផ្សាយពីសមាសភាពរបស់ក្រុមការងាររបស់គណបក្សប្រជាជនកម្ពុជារួចមកហើយដែរ ក្នុងនោះមាន លោក ជាម យៀប, លោក ឈាង វុន, លោក ប៉ែន បញ្ញា, លោក ស៊ិក ប៊ុនហុក, លោក ប៊ិន ឈិន និងលោកជំទាវ គ្រួច សំអាន៕
ចែករំលែកព័តមាននេះ