រាជធានីភ្នំពេញ ៖ មន្ត្រីរាជការសុទ្ធសឹងជាបុគ្គលិកបម្រើការងារនៅមន្ទីរពេទ្យបង្អែករាជធានីភ្នំពេញ ហៅមន្ទីរពេទ្យសម្ភពក្រុង ប្រមាណជាង៣០០នាក់ កាលពីព្រឹកថ្ងៃទី២៥ កុម្ភៈ បាននាំគ្នាតវ៉ាប្រៀបដូចជាការផ្ទុះគ្រាប់បែកទាំងព្រលឹមអុរ ប្រមូលផ្តុំគ្នាប្រដាប់ដោយបដា ឈរត្រៀមត្រានៅមុខមន្ទីរពេទ្យ នៅពេលទទួលដំណឹងថា អគារមន្ទីរពេទ្យដែលកំពុងបម្រើការងាររាល់ថ្ងៃ ស្ងាត់ៗត្រូវគេលួចលក់បាត់ទៅហើយ និងបង្ខំឱ្យរើតោករើហុឹង ទៅនៅអគារថ្មី ស្ថិតនៅខាងក្រោយ ។
ពេលទទួលបានព័ត៌មានថា មន្ទីរពេទ្យបង្អែករាជធានីភ្នំពេញ ហៅពេទ្យសម្ភពក្រុង ត្រូវគេលក់ស្ងាត់ៗនោះ មន្ត្រីរាជការជាបុគ្គលិកជាង១០០នាក់ បាននាំគ្នាលើកបដាព្រោងព្រាតនៅមុខអគារមន្ទីរពេទ្យ ដើម្បីតវ៉ាពីដំណឹងនៃការលួចលក់ឆ្នាំងបាយរបស់ពួកគេនោះ ហើយប្រមាណជាង២០០នាក់ទៀតនៅក្នុងប៊ុយរ៉ូ ក៏មិនធ្វើការដែរ ដែលពួកគេធ្វើដូច្នេះដើម្បីឱ្យថ្នាក់លើដោះស្រាយ កុំឱ្យមានការលក់ដូរអគាររដ្ឋតទៅទៀត ។ មន្ត្រីរាជការនៃមន្ទីរពេទ្យបង្អែករាជធានី បាននាំគ្នាសរសេរបដាលើកកាន់បង្ហាញខ្លឹមសារជូនអ្នកសារព័ត៌មាន និងដល់មហាជនដែលធ្វើដំណើរឆ្លងកាត់ទៅមកថា ប្រឆាំងដាច់ខាតការលក់ដូរមន្ទីរពេទ្យរដ្ឋ ចូលរួមបំបាត់អំពើពុករលួយ គ្មានឱ្យលក់ដូរនិងរុះរើទេ ។ល។ អ្នកខ្លះបានកាន់សេចក្តីប្រកាសរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាកច្រកម្ពុជា ដែលជម្រាបទៅក្រសួងមន្ទីរ រាជធានី-ខេត្ត ក្រុង ដែលមានខ្លឹមសារ មិនឱ្យមានការរុះរើដោះដូរ នូវទីតាំងសាលារៀន អគារសិក្សា មណ្ឌលសុខភាព និងមន្ទីរពេទ្យ ដោយសារការប្រឹងប្រែងអភិវឌ្ឍ គឺយើងត្រូវការមន្ទីរពេទ្យ សាលារៀនបន្ថែមទៀត ដើម្បីឆ្លើយតបទៅនឹងតម្រូវការ ។
អ្នកខ្លះក៏បានបញ្ចេញមតិតវ៉ាដាច់ខាតថា មិនឱ្យមានការរុះរើទីតាំងអគារមន្ទីរពេទ្យសម្ភពក្រុងនេះឡើយ ។ ក្នុងចំណោមក្រុមអ្នកតវ៉ា មានមន្ត្រីមន្ទីរពេទ្យម្នាក់ បានរៀបរាប់ប្រាប់កោះសន្តិភាពថា មន្ទីរពេទ្យបង្អែករាជធានីភ្នំពេញ ដែលហៅថា ពេទ្យសម្ភពក្រុង មាន៩ផ្ទះល្វែងដែលបានរៀបចំជាអគារមន្ទីរពេទ្យបង្អែក១ ស្ថិតនៅតាមបណ្តោយផ្លូវលេខ១៦៩ សង្កាត់វាលវង់ ខណ្ឌ៧ មករា បែរមុខចំបុរីកីឡា ។ មន្ទីរពេទ្យមានមន្ត្រីរាជការបម្រើការងារប្រមាណជាង៣០០នាក់ តាមផ្នែក តាមជំនាញនីមួយៗ ។ មន្ទីរពេទ្យសម្ភពក្រុងបានកើតមានតាំងពីក្រោយថ្ងៃរំដោះឆ្នាំ១៩៧៩ ម្លេ៉ះ។ មន្ទីរពេទ្យនេះមានផ្នែកចំនួន១២ គឺ ១-ផ្នែកសម្ភព និងរោគស្ត្រី ២-ផ្នែកត្រចៀក និងបំពង់ក ៣-ផ្នែកមាត់ និងធ្មេញ ៤-ផ្នែករដ្ឋបាល ៥-ផ្នែកគណនេយ្យ ៦-ផ្នែកទទួលជំងឺចេញចូល ៧-ផ្នែកឱសថ ៨-ផ្នែកប្រឹក្សាផ្តល់ឈាម និងអេដស៍ ៩-ផ្នែកអេកូសាស្ត្រ ១០-ផ្នែកឆ្លុះពោះវៀន និងក្រពះ ១១-ផ្នែកកាមរោគ និង១២-ផ្នែកឃ្លាំងឱសថ ។ មន្ត្រីពេទ្យខាងលើនិយាយរៀបរាប់បន្តថា មន្ទីរពេទ្យនេះគឺជាអង្គភាពរបស់រដ្ឋដែលមានលោក នេត សុវិរៈ ជាប្រធាន ។ បានជាមានការផ្ទុះការតវ៉ានាព្រឹកនេះ ព្រោះកាលពីល្ងាចថ្ងៃទី២៤ កុម្ភៈ មានលោកអនុប្រធានមន្ទីរសុខាភិបាលរាជធានីភ្នំពេញម្នាក់ បានមកកាន់មន្ទីរពេទ្យសម្ភពក្រុង ហើយបានហៅប្រធានមន្ទីរពេទ្យ និងប្រធានផ្នែកខ្លះទៅខ្សឹបប្រាប់ ឱ្យមន្ត្រីរាជការ និងបុគ្គលិកទាំងអស់រើសម្ភារចេញពីអគារនេះ ទៅបោះទីតំាងនៅខាងក្រោយ ដើម្បីយកទីតាំងជួសជុល ។
ពេលទទួលបានព័ត៌មានថា លោកអនុប្រធានមន្ទីរសុខាភិបាលម្នាក់ទៅខ្សឹបប្រាប់នៅមន្ទីរពេទ្យដូច្នោះ មន្ដ្រីរាជការ និងបុគ្កលិកជាង៣០០នាក់ ក៏រំជើបរំជួលតាំងពីល្ងាចមក ដោយបានប្រមូលផ្ដុំមតិគ្នាថា មិនមែនជាការរុះរើជួសជុលអគារទេ គឺមន្ទីរពេទ្យត្រូវបានគេលក់បាត់ហើយ លក់តាំងពីមុនបោះឆ្នោតតំណាងរាស្រ្ដមកម៉្លេះ មានតម្លៃរាប់លានដុល្លារដែលគ្មានអ្នកណាដឹងឡើយ ។ ពាក្យថារុះរើបណ្ដោះអាសន្នដើម្បីយកអគារជួសជុលនោះ គ្រាន់តែជាការបំភាន់ភ្នែកមន្ដ្រីរាជការដែលធ្វើការនៅទីនោះ ហើយពាក្យនេះមានបទពិសោធន៍ជាហូរហែ រហូតលក់ខ្ទេចលក់ខ្ទី ពេលនេះលក់រហូតដល់មន្ទីរពេទ្យបង្អែករាជធានីភ្នំពេញទៀត ហើយដេញឱ្យពួកគេទៅនៅអគារតូចចង្អៀតខាងក្រោយ ដែលមិនអាចធ្វើការបាន សូម្បីឡើយអ្នកជំងឺដេកព្យាបាលនោះ ។ បន្ទាប់ពីកើតមានផ្ទុះការតវ៉ានៅមុខមន្ទីរពេទ្យបង្អែករាជធានីភ្នំពេញ ប្រមាណជា២ទៅ៣ម៉ោងក្រោយមក គេបានសង្កេតឃើញលោក សុខ សុគន្ធ នាយកមន្ទីរសុខាភិបាលរាជធានីភ្នំពេញ អញ្ជើញទៅដល់ ហើយបានប្រកាសឱ្យមន្ដ្រីរាជការទាំងនោះចូលរួមប្រជុំដោះស្រាយគ្នានៅសាលប្រជុំរបស់មន្ទីរពេទ្យជាន់ទី២ ដោយមានការអនុញ្ញាតឱ្យអ្នកសារព័ត៌មានចូលរួមស្ដាប់ផងដែរ ។
ការជួបប្រជុំគ្នានោះ លោកនាយកមន្ទីរសុខាភិបាល បានបញ្ជាក់ថា អគារធ្វើការរបស់មន្ទីរពេទ្យរាល់ថ្ងៃនេះចាស់ទ្រុឌទ្រោម ហើយថ្នាក់លើតម្រូវឱ្យមានការរុះរើដោះដូរទៅកន្លែងថ្មីវិញគឺស្ថិតនៅក្នុងដីរដ្ឋខាងក្រោយគ្នានេះ ។ លោកនាយកមន្ទីរពេទ្យថ្លែងថា អគារចាស់ជួសជុលច្រើនដងហើយ ដោយបានចំណាយថវិការដ្ឋអស់ច្រើនណាស់ ហើយបើជួសជុលទៀតក៏ពិបាកដែរ ។ ក្រុមមន្ត្រីពេទ្យនិយាយទាំងមួម៉ៅប្រាប់កោះសន្តិភាពថា ការជួបប្រជុំនោះ លោកនាយកមន្ទីរមានប្រសាសន៍មិនចំទិសដៅនូវអ្វីដែលមន្ដ្រីរាជការឬហៅថាក្រុមអ្នកតវា៉ចង់បាននោះទេ ដែលពួកគេសុំអនុវត្តនៅនឹងកន្លែង ពោលគឺរុះរើជួសជុល ហើយសុំនៅធ្វើការទីនេះដដែល គ្មានការដោះដូរទៅណាទេ ។ ចំណោទដែលមន្ត្រីរាជការចង់បាន លោកនាយកមន្ទីរនិយាយថា អាស្រ័យថ្នាក់លើសម្រេច ។ ការជួបប្រជុំនោះរឹតតែធ្វើឱ្យមន្ត្រីរាជការមន្ទីរពេទ្យបង្អែករាជធានីភ្នំពេញ កាន់តែដាក់ការសង្ស័យថាពិតជាមានការលក់ដូរមែនហើយ ។ ទោះជាយា៉ងណា មន្ត្រីរាជការនៃមន្ទីរពេទ្យសម្ភពក្រុងនៅតែទទូចទៅដល់សាមីុក្រសួង ពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីជួយអន្តរាគមន៍ដល់ពួកគាត់ផង សុំទុកអគារនេះធ្វើការជាធម្មតា ។ ការជួបប្រជុំបានធ្វើឡើងមិនបានកន្លះម៉ោង នឹងមិនទាន់អស់សេចក្តីផង លោកនាយកមន្ទីរសុខាភិបាលប្រញាប់ប្រញាល់ឡើងរថយន្តចេញបាត់ទៅ ដែលទង្វើនោះបានធ្វើឱ្យមន្ត្រីរាជការទាំងអស់ នៅតែបន្តធ្វើការតវា៉ និងប្រកាសថាមិនព្រមរុះរើទៅទីណាឡើយ ។
ជាមួយបាតុភាពនេះ ក្រុមបុគ្គលិកបានលើកបង្ហាញលិខិតមួយ ចុះថ្ងៃទី៣ មិថុនា ២០១១ ដែលសាលារាជធានីតម្រូវឱ្យរុះរើកែលម្អអគារមន្ទីរពេទ្យបង្អែកចំការមន ដើម្បីបំពាក់ឧបករណ៍សម្ភារបរិក្ខារពេទ្យទំនើប ដែលត្រូវបញ្ជាឱ្យរើតោករើហុឹងចេញទៅនៅអគារផ្សេង ដើម្បីយកមន្ទីរពេទ្យជួសជុលថ្មី ។ ពួកគេនិយាយខ្លាំងៗថា ប៉ុន្តែផ្ទុយទៅវិញ ពេលបុគ្គលិកពេទ្យចាកចេញទៅផ្ញើខ្លួនរាយបា៉យតាមកន្លែងផ្សេងៗ ស្រាប់តែមន្ទីរពេទ្យបង្អែកចំការមននោះទាំងមូល មិនត្រឹមតែអត់ជួសជុលតាមការសន្យាទេ ថែមទាំងបាត់ខ្លួនពីផែនដីរហូតមក ។ ដោយប្រការភូតកុហកយកទីតាំងលក់បែបនេះហើយ វាក្លាយជាគំរូអាក្រក់មួយ ដែលគេលែងជឿរហូតមក ៕
ចែករំលែកព័តមាននេះ