ខេត្តបន្ទាយមានជ័យ ៖ ពិធីបិទសន្និបាតបូកសរុបការងារសុខាភិបាលខេត្តបន្ទាយមានជ័យ ឆ្នាំ២០១៣ និងទិសដៅបន្តឆ្នាំ២០១៤ បានធ្វើឡើងកាលពីរសៀលថ្ងៃទី២៥ កុម្ភៈ ២០១៤ នៅសាលប្រជុំមន្ទីរសុខាភិបាល ខេត្តបន្ទាយមានជ័យ ដែលអញ្ជើញជាគណៈធិបតីមាន លោក ជូ យិនស៊ីម រដ្ឋលេខាធិការក្រសួងសុខាភិបាល និងចូលរួមមាន លោក ប៉ុក សាលុយ ប្រធានក្រុមប្រឹក្សាខេត្តបន្ទាយមានជ័យ លោក អ៊ី ឡុង អភិបាលរងខេត្ត និងមន្ត្រីសុខាភិបាលជាច្រើនរូបទៀត។
លោក អ៊ី ឡុង អភិបាលរងខេត្តបន្ទាយមានជ័យ បានមានមតិស្វាគមន៍ និងកោតសរសើរចំពោះមន្ត្រីសុខាភិបាល ខេត្តបន្ទាយមានជ័យ បានបម្រើវិស័យសុខាភិបាលជូនដល់បងប្អូនប្រជាពលរដ្ឋបានល្អប្រសើរ ប៉ុន្តែ មានរឿងអវិជ្ជមានមួយចំនួនដែលកើតឡើងចំពោះមន្ត្រីសុខាភិបាល បញ្ហាផ្ទៃក្នុងការងារ គឺធ្វើការមាននិយមបក្ខពួក ដែលមានមន្ត្រីសុខាភិបាលមួយចំនួនរកស៊ីក្រៅមិនរវល់ការងាររដ្ឋ មានការច្រណែននិន្ទាគ្នា និងគិតតែប្រយោជន៍ផ្ទាល់ខ្លួន ជាអំពើពុករលួយ ដែលទង្វើទាំងនេះ នៅក្នុងឆ្នាំ២០១៤ ត្រូវកំណែទម្រង់ឲ្យក្លាយជាមន្ត្រីល្អ។
លោក ជូ យិនស៊ីម បានមានមតិលើកឡើងថា នៅខេត្តបន្ទាយមានជ័យ មានបាតុភាពជាច្រើន ដែលកើតចំពោះវិស័យសុខាភិបាល ដែលត្រូវបានចោទប្រកាន់ ដូចជាចោទថា មន្ត្រីពេទ្យឲ្យបង់លុយហើយទើបឲ្យចូលព្យាបាល និងថ្មីៗនេះ ព័ត៌មានបានផ្សព្វផ្សាយថា មានស្ត្រីម្នាក់ក្រីក្រហើយគ្មានលុយត្រូវបានគ្រូពេទ្យនៅមន្ទីរពេទ្យបង្អែកប៉ោយប៉ែត មិនឲ្យចូលព្យាបាល គឺខុសពីការពិតដែលស្ត្រីរូបនោះ ត្រូវបានសាកសួរផ្ទាល់ និងច្បាស់ហើយ គឺចេញសម្រាកព្យាបាលពីពេទ្យបម្រុងទៅផ្ទះ តែដេកចាំបងប្អូនយកម៉ូតូមកទទួលយក។
លោកបានផ្តាំផ្ញើដល់មន្ត្រីសុខាភិបាលទាំងអស់ ទិសដៅបន្តនៅឆ្នាំ២០១៤ គឺត្រូវកំណែទម្រង់ធ្វើយ៉ាងណាត្រូវតែអនុវត្តន៍ការងារតាមវិជ្ជាជីវៈរបស់ខ្លួន ត្រូវបម្រើប្រជាពលរដ្ឋ និងប្រទេសជាតិ ឲ្យវិស័យសុខាភិបាលមានការអភិវឌ្ឍន៍កាន់តែប្រសើរឡើងថែមទៀត។ ក្នុងពិធីនោះដែរ គណៈអធិបតីបានប្រគល់បណ្ណសរសើរជូនដល់ប្រធានការិយាល័យ និងប្រធានមន្ទីរពេទ្យ ព្រមទាំងប្រធានមន្ទីរពេទ្យបង្អែក មណ្ឌលសុខភាព ជាច្រើនផងដែរ៕
ចែករំលែកព័តមាននេះ